ന്യൂഡൽഹി: ബ്രിക്സ് (BRICS) കൂട്ടായ്മയിൽ പൂർണ്ണ അംഗത്വം നേടുന്നതിനായി പാക്കിസ്ഥാൻ ഔദ്യോഗികമായി അപേക്ഷ സമർപ്പിച്ചിട്ടുണ്ട്. 2026-ൽ ഇന്ത്യ ബ്രിക്സിന്റെ അധ്യക്ഷപദവി വഹിക്കുന്ന സാഹചര്യത്തിൽ പാക്കിസ്ഥാന്റെ ഈ അപേക്ഷ അതീവ പ്രാധാന്യത്തോടെയാണ് അന്താരാഷ്ട്ര സമൂഹം നോക്കിക്കാണുന്നത്.
2023-ലാണ് പാക്കിസ്ഥാൻ അംഗത്വത്തിനായി ഔദ്യോഗികമായി അപേക്ഷ നൽകിയത്. 2026-ലെ ഉച്ചകോടിയിൽ പൂർണ്ണ അംഗത്വം ലഭിക്കുമെന്നാണ് പാക്കിസ്ഥാൻ പ്രതീക്ഷിക്കുന്നത്. പാക്കിസ്ഥാന്റെ നീക്കത്തിന് ചൈനയും റഷ്യയും പരസ്യമായി പിന്തുണ പ്രഖ്യാപിച്ചിട്ടുണ്ട്. എന്നാൽ, പുതിയ അംഗങ്ങളെ ചേർക്കുന്നതിന് നിലവിലുള്ള എല്ലാ രാജ്യങ്ങളുടെയും സമ്മതം ആവശ്യമാണ്. ഭീകരവാദം ഉൾപ്പെടെയുള്ള വിഷയങ്ങളിൽ പാക്കിസ്ഥാനുമായി നിലനിൽക്കുന്ന ഭിന്നതകൾ കാരണം ഇന്ത്യ ഈ നീക്കത്തെ പിന്തുണയ്ക്കാൻ സാധ്യത കുറവാണെന്ന് വിദഗ്ധർ വിലയിരുത്തുന്നു. ഇന്ത്യ നിലവിൽ അധ്യക്ഷ പദവി അലങ്കരിക്കുന്നതിനാൽ, പാക്കിസ്ഥാന്റെ അപേക്ഷയുടെ കാര്യത്തിൽ ഇന്ത്യയുടെ തീരുമാനം നിർണ്ണായകമാണ്.
അതേസമയം, രാജ്യത്തെ കടുത്ത സാമ്പത്തിക പ്രതിസന്ധിയിൽ നിന്ന് കരകയറ്റാൻ ബ്രിക്സിന്റെ ‘ന്യൂ ഡെവലപ്മെന്റ് ബാങ്കിൽ’ (NDB) നിന്ന് വായ്പകൾ ലഭ്യമാക്കുക എന്നതാണ് പാക്കിസ്ഥാന്റെ ഒരു പ്രധാന ലക്ഷ്യം. കൂടാതെ, ആഗോളതലത്തിൽ കൂടുതൽ രാഷ്ട്രീയ പ്രസക്തി നേടാനും അവർ ആഗ്രഹിക്കുന്നു.
നിലവിൽ ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക, ഈജിപ്ത്, എത്യോപ്യ, ഇറാൻ, യു.എ.ഇ, ഇന്തോനേഷ്യ (2025 ജനുവരിയിൽ ചേർന്നു) എന്നിങ്ങനെ 10 രാജ്യങ്ങളാണ് ബ്രിക്സിലുള്ളത്. പാക്കിസ്ഥാൻ നിലവിൽ ഈ കൂട്ടായ്മയിൽ ഒരു പങ്കാളിത്ത അംഗം പോലുമല്ല
Pakistan wants to join BRICS. While China and Russia support it, India’s move as chairman is crucial
