ചരിത്ര വിജയം നേടി അധികാരത്തിലേറിയ തിരുവനന്തപുരം കോർപറേഷനിൽ നഗരവികസന രേഖ പ്രഖ്യാപിക്കാൻ പ്രധാനമന്ത്രി നരേന്ദ്ര മോദി ഈ മാസം 23-ന് എത്തിയേക്കും. തദ്ദേശ സ്വയംഭരണ തിരഞ്ഞെടുപ്പ് പ്രചാരണ വേളയിൽ ബിജെപി നൽകിയ വാഗ്ദാനങ്ങൾ പാലിക്കുന്നതിന്റെ ഭാഗമായാണ് ഈ സന്ദർശനം. തിരുവനന്തപുരം കോർപറേഷനിൽ ഭരണം ലഭിച്ചാൽ നഗരത്തിനായി പ്രത്യേക വികസന രേഖ പ്രഖ്യാപിക്കുമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖർ നേരത്തെ അറിയിച്ചിരുന്നു.
ജനുവരി 28-ന് പാർലമെന്റ് സമ്മേളനം ആരംഭിക്കാനിരിക്കുന്നതിനാൽ, അതിനു മുൻപായി സന്ദർശനം പൂർത്തിയാക്കാനാണ് ബിജെപി നേതൃത്വത്തിന്റെ നീക്കം. പ്രധാനമന്ത്രിയുടെ വരവ് സംബന്ധിച്ച് ഔദ്യോഗിക സ്ഥിരീകരണം ഉടൻ ഉണ്ടാകുമെന്നാണ് സൂചന. വികസന രേഖയ്ക്ക് പുറമെ, വരാനിരിക്കുന്ന നിയമസഭാ തിരഞ്ഞെടുപ്പിൽ കേരളത്തിൽ അധികാരം പിടിക്കുന്നതിനുള്ള ബിജെപിയുടെ ‘മിഷൻ 2026’ കർമ്മപദ്ധതിയും ഈ ചടങ്ങിൽ പ്രധാനമന്ത്രി പ്രഖ്യാപിച്ചേക്കും.
തിരുവനന്തപുരത്തെ തദ്ദേശ തിരഞ്ഞെടുപ്പ് വിജയാഘോഷത്തിൽ കേന്ദ്ര ആഭ്യന്തര മന്ത്രി അമിത് ഷാ പങ്കെടുത്തതിന് പിന്നാലെയാണ് പ്രധാനമന്ത്രിയുടെ സന്ദർശനവും നിശ്ചയിച്ചിരിക്കുന്നത്. പ്രധാനമന്ത്രിയുടെ വരവോടെ കേരളത്തിലെ രാഷ്ട്രീയ സാഹചര്യത്തിൽ വലിയ മാറ്റങ്ങൾ വരുത്താനാണ് ബിജെപി ലക്ഷ്യമിടുന്നത്. നഗരവികസനത്തിന് കേന്ദ്ര സഹായത്തോടെയുള്ള വൻ പദ്ധതികൾ സന്ദർശന വേളയിൽ പ്രഖ്യാപിക്കപ്പെടുമെന്നാണ് പാർട്ടി വൃത്തങ്ങൾ നൽകുന്ന സൂചന.
PM Modi likely to visit Thiruvananthapuram on Jan 23 to announce city development plan
