പി.എം കെയേഴ്സ് ഫണ്ടിന്റെ സാമ്പത്തിക ഇടപാടുകളെയും വിനിയോഗത്തെയും കുറിച്ച് പാർലമെന്റിൽ ചോദ്യങ്ങൾ ചോദിക്കുന്നതിന് കേന്ദ്ര സർക്കാർ വിലക്കേർപ്പെടുത്തി. ഇത് സംബന്ധിച്ച ചോദ്യങ്ങൾ ഉന്നയിക്കാനാവില്ലെന്ന് ലോക്സഭ സെക്രട്ടേറിയറ്റ് അംഗങ്ങളെ അറിയിച്ചു. പി.എം കെയേഴ്സ് ഫണ്ട് സർക്കാരിന്റെ നിയന്ത്രണത്തിലുള്ളതല്ലെന്നും അത് ഒരു പൊതു അതോറിറ്റിയല്ലെന്നും ചൂണ്ടിക്കാട്ടിയാണ് നടപടി. ഇതോടെ ഫണ്ടിന്റെ വരവുചെലവ് കണക്കുകളെക്കുറിച്ച് പാർലമെന്റിൽ ചർച്ച ചെയ്യാനുള്ള പബ്ലിക് അക്കൗണ്ട്സ് കമ്മിറ്റിയുടെ (പി.എ.സി) ശ്രമങ്ങൾക്കും തിരിച്ചടിയേറ്റു.
കോവിഡ് കാലത്ത് രൂപീകരിച്ച ഈ ഫണ്ടിലേക്ക് കോടക്കണക്കിന് രൂപ സംഭാവനയായി എത്തിയിട്ടുണ്ട്. എന്നാൽ ഈ തുക എങ്ങനെയൊക്കെ വിനിയോഗിച്ചു എന്നതിനെക്കുറിച്ച് സുതാര്യതയില്ലെന്ന് പ്രതിപക്ഷം നേരത്തെ തന്നെ ആരോപിച്ചിരുന്നു. ഫണ്ടിനെ വിവരാവകാശ നിയമത്തിന്റെ പരിധിയിൽ നിന്ന് ഒഴിവാക്കിയതും സി.എ.ജി ഓഡിറ്റിംഗിന് വിധേയമാക്കാത്തതും വലിയ വിവാദമായിരുന്നു. ഇപ്പോൾ പാർലമെന്റിലും ചോദ്യങ്ങൾ ചോദിക്കാൻ അനുമതി നിഷേധിച്ചത് ജനാധിപത്യ മൂല്യങ്ങളെ തകർക്കുന്നതാണെന്ന് പ്രതിപക്ഷ കക്ഷികൾ കുറ്റപ്പെടുത്തി.
സർക്കാരിന്റെ ഈ തീരുമാനത്തിനെതിരെ പ്രതിഷേധം ശക്തമാക്കാനാണ് പ്രതിപക്ഷത്തിന്റെ നീക്കം. പി.എം കെയേഴ്സ് ഫണ്ട് സ്വകാര്യ ട്രസ്റ്റാണെന്ന വാദം അംഗീകരിക്കാനാവില്ലെന്നും സർക്കാർ സംവിധാനങ്ങളും ചിഹ്നങ്ങളും ഉപയോഗിച്ച് ശേഖരിക്കുന്ന തുകയെക്കുറിച്ച് പാർലമെന്റിനോട് മറുപടി പറയാൻ കേന്ദ്രത്തിന് ബാധ്യതയുണ്ടെന്നും നേതാക്കൾ ആവർത്തിക്കുന്നു. വരും ദിവസങ്ങളിൽ പാർലമെന്റിന്റെ ഇരുസഭകളിലും ഈ വിഷയം ഉയർത്തിക്കൊണ്ടുവരാനും സഭാനടപടികൾ തടസ്സപ്പെടുത്താനുമാണ് ‘ഇന്ത്യ’ സഖ്യം ആലോചിക്കുന്നത്.
Questions on PM Cares Fund Barred in Parliament Amid Transparency Concerns
