ന്യൂഡൽഹി: രാജ്യത്തിന്റെ വിവിധ ഭാഗങ്ങളിൽ നടക്കുന്ന വിഷയാധിഷ്ഠിത പ്രതിഷേധങ്ങളുടെ വിവരങ്ങൾ ഒരിടത്ത് ലഭ്യമാക്കുന്നതിനായി കോൺഗ്രസ് എംപിയും ലോക്സഭയിലെ പ്രതിപക്ഷ നേതാവുമായ രാഹുൽ ഗാന്ധി ‘സത്യാഗ്രഹ’ എന്ന ഡിജിറ്റൽ പ്ലാറ്റ്ഫോം ആരംഭിച്ചു. മഹാത്മാഗാന്ധിയുടെ 157-ാം ജന്മവാർഷികത്തിന് പിന്നാലെയാണ് വെബ്സൈറ്റ് ആരംഭിച്ചത്. സത്യത്തിനായുള്ള സമാധാനപരമായ പോരാട്ടം എന്ന ഗാന്ധിജിയുടെ ‘സത്യാഗ്രഹ’ ആശയത്തെ അടിസ്ഥാനമാക്കിയാണ് പ്ലാറ്റ്ഫോമിന് പേര് നൽകിയിരിക്കുന്നത്.
പ്രതിഷേധിക്കുന്നവർക്ക് തങ്ങളുടെ ആവശ്യങ്ങളും സമരവിവരങ്ങളും വെബ്സൈറ്റിലൂടെ നൽകാം. രാജ്യത്തിന്റെ വിവിധ ഭാഗങ്ങളിൽ സമാന വിഷയങ്ങളിൽ നടക്കുന്ന പ്രതിഷേധങ്ങൾ ഇന്ററാക്ടീവ് മാപ്പിലൂടെ കണ്ടെത്താനും ആവശ്യമായ പിന്തുണ തേടാനും സൗകര്യമുണ്ട്. “രാജ്യത്തിന്റെ വിവിധ ഭാഗങ്ങളിൽ ജനങ്ങൾ അവകാശങ്ങൾക്കായി പോരാടുകയാണ്. പലപ്പോഴും അവർ ഒറ്റയ്ക്കാണ് പോരാടുന്നത്. ജെൻ Z, വിദ്യാർഥികൾ, കർഷകർ, ആദിവാസികൾ, ദളിതർ, സ്ത്രീകൾ തുടങ്ങി ഓരോ പോരാട്ടത്തിനും അതിന്റേതായ കഥയുണ്ട്. എന്നാൽ ഒറ്റയ്ക്ക് ഉയരുന്ന ശബ്ദം പലപ്പോഴും അടിച്ചമർത്തപ്പെടുന്നു,” എന്ന് രാഹുൽ ഗാന്ധി എക്സിൽ കുറിച്ചു.
“ഈ ശബ്ദങ്ങളെ ഒരേ മാപ്പിൽ ഒരുമിപ്പിക്കുകയാണ് ‘സത്യാഗ്രഹ’യുടെ ലക്ഷ്യം. സത്യം ഏറ്റവും വലിയ ആയുധമാണെന്ന് ബാപ്പു നമ്മെ പഠിപ്പിച്ചു. എന്നാൽ സത്യത്തിനൊപ്പം ഒരുമിച്ച് നിൽക്കുന്നതാണ് അതിലും വലിയ ശക്തി. അനീതിക്കെതിരെ നിങ്ങളും പോരാടുന്നുണ്ടെങ്കിൽ നിങ്ങളുടെ കഥ പങ്കുവയ്ക്കുക. നിങ്ങളുടെ സമരം മാപ്പിൽ പ്രത്യക്ഷപ്പെടും. നിങ്ങളെപ്പോലെ പോരാടുന്ന മറ്റുള്ളവരെ കാണാനും കഴിയും. പ്രതിപക്ഷ നേതാവെന്ന നിലയിൽ പാർലമെന്റിലൂടെയോ തെരുവുകളിലൂടെയോ കത്തുകളിലൂടെയോ നിങ്ങൾക്ക് ആവശ്യമായിടത്ത് നിങ്ങളോടൊപ്പം നിൽക്കാൻ കഴിയുന്നതെല്ലാം ഞാൻ ചെയ്യും. അത് എന്റെ ഉത്തരവാദിത്തമാണ്,” എന്നും ഗാന്ധി കൂട്ടിച്ചേർത്തു.
രാജ്യത്തിന്റെ വിവിധ ഭാഗങ്ങളിൽ നടക്കുന്ന പ്രതിഷേധങ്ങളുടെ വിവരങ്ങൾ ഒരിടത്ത് ഏകോപിപ്പിക്കുക എന്നത് പ്രതിപക്ഷ നേതാവെന്ന നിലയിൽ തന്റെ ഉത്തരവാദിത്തമാണെന്നും രാജ്യത്തിന്റെ എല്ലാ ഭാഗങ്ങളിലും പ്രതിഷേധങ്ങൾ നടക്കുകയാണ്. വിദ്യാർഥികളുടെ പ്രശ്നങ്ങളെക്കുറിച്ചും സ്ത്രീകളുടെ പ്രശ്നങ്ങളെക്കുറിച്ചും വിലക്കയറ്റത്തിനെതിരെയും നിരവധി സമരങ്ങൾ നടക്കുന്നു. ഇത്തരത്തിൽ ലക്ഷക്കണക്കിന് പ്രതിഷേധങ്ങളുണ്ട്. ഈ വിവരങ്ങളെല്ലാം ഒരിടത്ത് ഏകോപിപ്പിക്കണമെന്നായിരുന്നു എന്റെ ആഗ്രഹം. അതിനാലാണ് ‘സത്യാഗ്രഹ’ വെബ്സൈറ്റ് ആരംഭിച്ചത്,” എന്നും വീഡിയോ സന്ദേശത്തിൽ രാഹുൽ ഗാന്ധി പറഞ്ഞു.
പ്രതിഷേധം ചെറുതോ വലുതോ ആയിക്കോട്ടെ, പേര്, സംഘടനയുടെ പേര്, പ്രതിഷേധത്തിന്റെ വിഷയം എന്നിവ രേഖപ്പെടുത്താം. സഹായം ആവശ്യമുണ്ടെങ്കിൽ പിന്തുണ നൽകുമെന്നും രാഹുൽ ഗാന്ധി കൂട്ടിച്ചേർത്തു. വെബ്സൈറ്റിൽ ഇതിനകം 150-ലധികം സമരങ്ങൾ രജിസ്റ്റർ ചെയ്തിട്ടുണ്ട്. ഇതിൽ ഏറ്റവും കൂടുതൽ സമരങ്ങൾ വിദ്യാഭ്യാസ മേഖലയുമായി ബന്ധപ്പെട്ടതാണ്. 36 സമരങ്ങളാണ് വിദ്യാഭ്യാസവുമായി ബന്ധപ്പെട്ട് രജിസ്റ്റർ ചെയ്തിരിക്കുന്നത്.പേപ്പർ ചോർച്ചയുമായി ബന്ധപ്പെട്ട് വിവിധ സംസ്ഥാനങ്ങളിൽ വിദ്യാർഥി പ്രതിഷേധങ്ങളും നടന്നിരുന്നു.
നീറ്റ്-യുജി പരീക്ഷാ പേപ്പർ ചോർച്ചയെ തുടർന്ന് യുവജനങ്ങളുടെ നേതൃത്വത്തിൽ നടന്ന പ്രതിഷേധങ്ങൾക്കിടെയാണ് അന്നത്തെ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ ജൂലൈയിൽ രാജിവച്ചത്. ഡൽഹിയിലെ ജന്തർ മന്തറിൽ നടന്ന പ്രതിഷേധങ്ങൾക്ക് യുവജന സംഘടനയായ കോക്രോച്ച് ജനതാ പാർട്ടി നേതൃത്വം നൽകിയിരുന്നു.
Rahul Gandhi launches ‘Satyagraha’ website for information on current protests across India
