പശ്ചിമേഷ്യയിൽ ഇസ്രായേലും അമേരിക്കയും ഇറാനും തമ്മിൽ വർധിച്ചുവരുന്ന യുദ്ധസാഹചര്യം ഒഴിവാക്കാൻ ഇന്ത്യൻ പ്രധാനമന്ത്രി നരേന്ദ്ര മോദിയുടെ സഹായം തേടണമെന്ന് മുൻ യുഎസ് ആർമി ഓഫീസർ കൊളോണൽ ഡഗ്ലസ് മക്ഗ്രെഗർ. പ്രമുഖ അമേരിക്കൻ മാധ്യമപ്രവർത്തകൻ ടക്കർ കാൾസണുമായുള്ള അഭിമുഖത്തിലാണ് അദ്ദേഹം ഈ നിർദ്ദേശം മുന്നോട്ടുവെച്ചത്. ഇറാനും ഇസ്രായേലുമായും ഒരേപോലെ നല്ല ബന്ധം പുലർത്തുന്ന മോദിക്ക് ഈ പ്രതിസന്ധിയിൽ മികച്ച മധ്യസ്ഥനാകാൻ കഴിയുമെന്ന് അദ്ദേഹം അഭിപ്രായപ്പെട്ടു.
ഇറാൻ വിഷയത്തിൽ അമേരിക്കയും ഇസ്രായേലും വലിയ സൈനിക നീക്കങ്ങളുമായി മുന്നോട്ട് പോകുന്ന പശ്ചാത്തലത്തിലാണ് ഈ പ്രസ്താവന വരുന്നത്. നിലവിലെ സാഹചര്യത്തിൽ ഒരു മൂന്നാം കക്ഷിയുടെ ഇടപെടൽ അനിവാര്യമാണെന്നും, അതിന് ഏറ്റവും അനുയോജ്യനായ വ്യക്തി നരേന്ദ്ര മോദിയാണെന്നും മക്ഗ്രെഗർ ചൂണ്ടിക്കാട്ടി. മോദിയുടെ ഒരു ഫോൺ കോളിന് യുദ്ധം അവസാനിപ്പിക്കാൻ സാധിക്കുമെന്ന് യുഎഇയുടെ മുൻ ഇന്ത്യൻ സ്ഥാനപതി ഹുസൈൻ ഹസ്സൻ മിർസയും നേരത്തെ സമാനമായ അഭിപ്രായം പ്രകടിപ്പിച്ചിരുന്നു.
റഷ്യ-യുക്രെയ്ൻ യുദ്ധകാലത്ത് ഇരുരാജ്യങ്ങളുമായും സംസാരിച്ച് സമാധാനത്തിനായി മോദി നടത്തിയ ഇടപെടലുകൾ അന്താരാഷ്ട്ര തലത്തിൽ ശ്രദ്ധിക്കപ്പെട്ടിരുന്നു. ഇറാന്റെ എണ്ണ ഇറക്കുമതി ചെയ്യുന്ന പ്രധാന രാജ്യങ്ങളിൽ ഒന്നെന്ന നിലയിലും ഇസ്രായേലിന്റെ അടുത്ത സുഹൃത്തെന്ന നിലയിലും മോദിയുടെ വാക്കുകൾക്ക് വലിയ സ്വാധീനമുണ്ടാകുമെന്നാണ് വിലയിരുത്തൽ. പശ്ചിമേഷ്യയിലെ സംഘർഷം ആഗോള ഇന്ധന വിപണിയെയും സാമ്പത്തിക രംഗത്തെയും ഗുരുതരമായി ബാധിക്കുന്ന സാഹചര്യത്തിൽ ഇന്ത്യയുടെ നിലപാട് ലോകരാജ്യങ്ങൾ ഉറ്റുനോക്കുകയാണ്.
Retired US Army Officer Urges Trump to Seek PM Modi’s Help as Mediator in Iran Conflict
