കർണാടകയിലെ കുടകിൽ ട്രക്കിംഗിനിടെ കാണാതായ കോഴിക്കോട് നാദാപുരം സ്വദേശി ശരണ്യയെ കണ്ടെത്താൻ തിരച്ചിൽ ഊർജിതമാക്കി. കൊച്ചിയിൽ സോഫ്റ്റ്വെയർ എൻജിനീയറായി ജോലി ചെയ്യുന്ന ശരണ്യയെ കഴിഞ്ഞ മൂന്ന് ദിവസമായാണ് കുടകിലെ മലനിരകളിൽ വെച്ച് കാണാതായത്. ഈ മാസം രണ്ടിന് തടിയന്റെമോൾ മലയിൽ ഒറ്റയ്ക്ക് ട്രക്കിംഗിന് എത്തിയ യുവതിക്ക് വഴിതെറ്റുകയായിരുന്നു. തനിക്ക് വഴിതെറ്റിയ വിവരം ശരണ്യ താമസസ്ഥലത്ത് ഫോൺ വിളിച്ച് അറിയിച്ചിരുന്നെങ്കിലും പിന്നീട് വിവരമൊന്നും ലഭിച്ചില്ല.
യുവതിയെ കണ്ടെത്താൻ കർണാടക പൊലീസും വനംവകുപ്പും സംയുക്തമായി വിപുലമായ പരിശോധനയാണ് നടത്തുന്നത്. നാല് പ്രത്യേക സംഘങ്ങളായി തിരിഞ്ഞ് ഡ്രോൺ ക്യാമറകൾ ഉപയോഗിച്ചാണ് വനമേഖലയിൽ തിരച്ചിൽ നടത്തുന്നത്. ഇതിന് പുറമെ നക്സൽ വിരുദ്ധ സേനയും (ANF) ഇന്ന് മുതൽ തിരച്ചിലിൽ പങ്കുചേർന്നിട്ടുണ്ട്. യുവതിയുടെ മൊബൈൽ സിം കാർഡ് ലൊക്കേഷൻ കേന്ദ്രീകരിച്ചും അന്വേഷണം പുരോഗമിക്കുകയാണ്.
ശരണ്യയുടെ പിതാവ് ഗോപിയും കുടുംബാംഗങ്ങളും കർണാടക മുഖ്യമന്ത്രിയുടെ നിയമോപദേശകനും വിരാജ്പേട്ട എംഎൽഎയുമായ എ.എസ്. പൊന്നണ്ണയെ കണ്ട് സഹായം അഭ്യർത്ഥിച്ചു. കുടുംബത്തെ ആശ്വസിപ്പിച്ച എംഎൽഎ, തിരച്ചിലിന് കൂടുതൽ ഉദ്യോഗസ്ഥരെ വിന്യസിക്കാനും അത്യാധുനിക സാങ്കേതിക വിദ്യകൾ ഉപയോഗിക്കാനും സംസ്ഥാന അധികാരികൾക്ക് നിർദ്ദേശം നൽകി. കുടകിന്റെ പ്രകൃതിഭംഗിയെക്കുറിച്ച് ഗൂഗിളിലൂടെ അറിഞ്ഞാണ് മകൾ ട്രക്കിംഗിന് എത്തിയതെന്ന് പിതാവ് ഗോപി പറഞ്ഞു.
കനത്ത വനമേഖലയായതിനാൽ തിരച്ചിൽ ദൗത്യം ഏറെ വെല്ലുവിളികൾ നിറഞ്ഞതാണ്. എങ്കിലും മകൾ ഉടൻ തിരിച്ചെത്തുമെന്ന പ്രതീക്ഷയിലാണ് കുടുംബം. പ്രദേശവാസികളും വനംവകുപ്പ് ഉദ്യോഗസ്ഥരും യുവതിക്കായി തിരച്ചിൽ തുടരുകയാണ്. കഴിഞ്ഞ ഏതാനും വർഷങ്ങളായി കുടകിലെ ട്രക്കിംഗ് പാതകളിൽ സഞ്ചാരികൾ വഴിതെറ്റുന്ന സംഭവങ്ങൾ റിപ്പോർട്ട് ചെയ്യപ്പെടുന്ന പശ്ചാത്തലത്തിൽ അതീവ ജാഗ്രതയോടെയാണ് ദൗത്യം മുന്നോട്ട് പോകുന്നത്.
Search intensifies for missing Kerala woman trekker in Coorg; anti-naxal force joins operation
