ന്യൂയോർക്ക്: അമേരിക്കയിലെ പ്രമുഖ ഉന്നതവിദ്യാഭ്യാസ സ്ഥാപനമായ കോർണൽ സർവ്വകലാശാലയിലെ കൂട്ടബലാത്സംഗക്കേസ് അന്വേഷണത്തിൽ ഇരയായ യുവതിക്ക് എല്ലാ ഘട്ടത്തിലും നീതി നിഷേധിക്കപ്പെട്ടതായി ന്യൂയോർക്ക് ഗവർണർ കാത്തി ഹോച്ചുൾ. പ്രാദേശിക പ്രൊസിക്യൂട്ടറിലും ക്യാമ്പസ് പൊലീസിലുമുള്ള വിശ്വാസം പൂർണ്ണമായും നഷ്ടപ്പെട്ടതിനെ തുടർന്ന് കേസിന്റെ പുതിയ അന്വേഷണ ചുമതല ന്യൂയോർക്ക് അറ്റോർണി ജനറൽ ലെറ്റീഷ്യ ജെയിംസിന് കൈമാറിയതായി ഗവർണർ വാർത്താസമ്മേളനത്തിൽ അറിയിച്ചു.
നിയമരേഖകളിൽ ‘ജെയിൻ ഡോ’ എന്ന് വിശേഷിപ്പിക്കപ്പെടുന്ന വിദ്യാർത്ഥിനിയാണ് 2024 ഒക്ടോബറിൽ സർവ്വകലാശാലയിലെ ഫ്രറ്റേണിറ്റി ഹൗസിൽ വെച്ച് ലഹരിമരുന്ന് നൽകി കൂട്ടബലാത്സംഗത്തിന് ഇരയായതായി പരാതി നൽകിയത്. അക്കാലത്ത് കേസ് അന്വേഷിച്ചെങ്കിലും പ്രതികൾക്കെതിരെ കുറ്റപത്രം സമർപ്പിക്കാതെ കേസ് അവസാനിപ്പിക്കുകയായിരുന്നു. കഴിഞ്ഞ മാസം യുവതി സർവ്വകലാശാലയ്‌ക്കെതിരെ സിവിൽ നിയമനടപടി ആരംഭിച്ചതോടെയാണ് സംഭവം വീണ്ടും ദേശീയ ശ്രദ്ധയാകർഷിച്ചതും പുനരന്വേഷണത്തിന് വഴിയൊരുങ്ങിയതും.
കേസ് കൈകാര്യം ചെയ്ത രീതി തന്നെ അങ്ങേയറ്റം അസ്വസ്ഥയാക്കുന്നു എന്ന് വ്യക്തമാക്കിയ ഗവർണർ, പരാതിക്കാരിയെ നേരിട്ട് കണ്ട് മൊഴിയെടുക്കാൻ പോലും പ്രാദേശിക പ്രൊസിക്യൂട്ടർമാർ തയ്യാറാകാത്തതിലുള്ള രോഷം പ്രകടിപ്പിച്ചു. ക്രൂരമായ പീഡനത്തിന് ഇരയായ യുവതിയെ സംരക്ഷിക്കാൻ ബാധ്യതയുണ്ടായിരുന്ന മനുഷ്യരും സ്ഥാപനങ്ങളും ഓരോ ഘട്ടത്തിലും അവളെ പരാജയപ്പെടുത്തുകയായിരുന്നു എന്ന് ഗവർണർ കുറ്റപ്പെടുത്തി.
ഇര സ്വന്തം ഇഷ്ടപ്രകാരം മദ്യമോ മയക്കുമരുന്നോ കഴിച്ച സാഹചര്യങ്ങളിൽ പ്രതികൾക്കെതിരെ ബലാത്സംഗക്കുറ്റം ചുമത്തുന്നതിൽ നിന്ന് പ്രൊസിക്യൂട്ടർമാരെ തടയുന്ന ന്യൂയോർക്കിലെ നിലവിലെ നിയമത്തിലെ വലിയ പോരായ്മ (ലൂപ്ഹോൾ) അടിയന്തരമായി പരിഹരിക്കുമെന്ന് ഗവർണർ ഉറപ്പുനൽകി. ഒരാൾക്ക് സമ്മതം നൽകാൻ കഴിയാത്തവിധം ലഹരിയിലാണെങ്കിൽ, അവർ സ്വന്തം ഇഷ്ടപ്രകാരമാണോ ലഹരി ഉപയോഗിച്ചതെന്നത് പ്രസക്തമല്ലെന്നും ‘സ്വമേധയാ ഉള്ള ലഹരി കൂട്ടബലാത്സംഗത്തിനുള്ള ലൈസൻസല്ല’ എന്നും ഗവർണർ കാത്തി ഹോച്ചുൾ ശക്തമായ ഭാഷയിൽ ഓർമ്മിപ്പിച്ചു.
വസ്തുതകളുടെയും നിയമത്തിന്റെയും അടിസ്ഥാനത്തിൽ കൃത്യമായ അന്വേഷണം നടത്തുമെന്നും ആവശ്യമെങ്കിൽ ശക്തമായ പ്രൊസിക്യൂഷൻ നടപടികളുമായി മുന്നോട്ട് പോകുമെന്നും വാർത്താസമ്മേളനത്തിൽ പങ്കെടുത്ത അറ്റോർണി ജനറൽ ലെറ്റീഷ്യ ജെയിംസ് വ്യക്തമാക്കി.
അതേസമയം, കുറ്റപത്രം സമർപ്പിക്കാതിരുന്ന തന്റെ മുൻ തീരുമാനത്തെ ന്യായീകരിച്ച് മുൻപ് കേസ് അന്വേഷിച്ച ഡിസ്ട്രിക്റ്റ് അറ്റോർണി മാത്യു വാൻ ഹൗട്ടൻ രംഗത്തെത്തി. നടപടികളിലേക്ക് കടക്കാൻ ആവശ്യമായ തെളിവുകൾ സർവ്വകലാശാല തങ്ങൾക്ക് കൈമാറിയിരുന്നില്ലെന്നും ഇപ്പോൾ പുറത്തുവരുന്ന പല വിവരങ്ങളും അന്ന് മറച്ചുവെച്ചതായും അദ്ദേഹം ആരോപിച്ചു. എന്നാൽ, സംഭവദിവസം പ്രതികൾ നടത്തിയ സ്നാപ്ചാറ്റ് ഗ്രൂപ്പ് ചാറ്റുകൾ ഉൾപ്പെടെയുള്ള എല്ലാ തെളിവുകളും അന്ന് തന്നെ ഡിസ്ട്രിക്റ്റ് അറ്റോർണിയുടെ ഓഫീസിന് കൈമാറിയിരുന്നു എന്നാണ് സർവ്വകലാശാലയുടെ വാദം.കേസ് വീണ്ടും സജീവമായതോടെ ഇരയായ യുവതി സോഷ്യൽ മീഡിയയിൽ വലിയ രീതിയിലുള്ള സൈബർ ആക്രമണവും വ്യക്തിത്വം വെളിപ്പെടുത്താനുള്ള ശ്രമങ്ങളും നേരിടുകയാണെന്ന് അവളുടെ അഭിഭാഷകൻ തോമസ് ജിയുഫ്ര അറിയിച്ചു. നിലവിൽ അമേരിക്കയിലെ പകുതിയോളം സംസ്ഥാനങ്ങളിൽ ലഹരി സ്വമേധയാ ഉള്ളതാണോ അല്ലയോ എന്നത് ബലാത്സംഗക്കേസുകളിൽ ഇളവ് നൽകാനുള്ള മാനദണ്ഡമല്ല. വരാനിരിക്കുന്ന നിയമസഭാ സമ്മേളനത്തിൽ ന്യൂയോർക്കിലും ഈ നിയമഭേദഗതി ബില്ല് പാസാക്കുമെന്നും അതിനായി പ്രത്യേക സമ്മേളനം വിളിക്കാൻ പോലും തയ്യാറാണെന്നും ഗവർണർ കൂട്ടിച്ചേർത്തു
Serious lapses in the Cornell harassment case investigation; Governor Kathy Hochul intervenes urgently to ensure justice for the victim.
