ഇറാൻ പ്രസിഡന്റ് മസൂദ് പെസെഷ്കിയാനുമായി ശനിയാഴ്ച ടെലിഫോൺ വഴി സംസാരിച്ച് പ്രധാനമന്ത്രി നരേന്ദ്രമോദി. ഈദ്, നൗറൂസ് ആഘോഷങ്ങളുടെ ആശംസകൾ കൈമാറുന്നതിനൊപ്പം പശ്ചിമേഷ്യയിലെ നിലവിലെ സാഹചര്യവും ഇരുവരും ചര്ച്ച ചെയ്തു. ഡോ. മസൂദ് പെസഷ്കിയാനുമായി സംസാരിച്ചു, ഈദ്, നൗറൂസ് ആശംസകൾ അറിയിച്ചു. ഈ ആഘോഷകാലം പശ്ചിമേഷ്യയ്ക്ക് സമാധാനം, സ്ഥിരത, സമൃദ്ധി എന്നിവ കൊണ്ടുവരുമെന്ന് പ്രതീക്ഷിക്കുന്നുവെന്നും അറിയിച്ചുവെന്ന് നരേന്ദ്രമോദി പറഞ്ഞു.
സംഭാഷണത്തിനിടെ, പ്രദേശത്തെ പ്രധാന അടിസ്ഥാന സൗകര്യങ്ങളെ ലക്ഷ്യമിട്ട് നടന്ന ആക്രമണങ്ങളെക്കുറിച്ച് പ്രധാനമന്ത്രി ആശങ്ക പ്രകടിപ്പിച്ചു. പ്രദേശത്തിന്റെ സ്ഥിരതയെ ഭീഷണിപ്പെടുത്തുകയും ആഗോള വിതരണ ശൃംഖലകളെ ബാധിക്കുകയും ചെയ്യുന്ന പ്രധാന അടിസ്ഥാന സൗകര്യങ്ങളിലേക്കുള്ള ആക്രമണങ്ങളെ ഞങ്ങൾ അപലപിക്കുന്നുവെന്നും മോദി പറഞ്ഞു. ആഗോള വ്യാപാരം തടസ്സമില്ലാതെ മുന്നോട്ടുപോകേണ്ടതിന്റെ ആവശ്യകതയും അദ്ദേഹം ഊന്നിപ്പറഞ്ഞു. നാവിഗേഷൻ സ്വാതന്ത്ര്യം സംരക്ഷിക്കുകയും കപ്പൽ ഗതാഗത മാർഗങ്ങൾ തുറന്നും സുരക്ഷിതവുമായിരിക്കണം എന്നതിന്റെ പ്രാധാന്യം വീണ്ടും ആവർത്തിച്ചു,” എന്നും മോദി കൂട്ടിച്ചേർത്തു.
അതേസമയം, ഫെബ്രുവരി 28ന് പശ്ചിമേഷ്യയിൽ സംഘർഷം ആരംഭിച്ചതിന് ശേഷം പ്രധാനമന്ത്രി മോദിയും ഇറാൻ പ്രസിഡന്റും തമ്മിലുള്ള രണ്ടാമത്തെ ടെലിഫോൺ സംഭാഷണമാണിത്. ഈ മാസം ആദ്യം, പ്രദേശത്തെ “ഗൗരവമുള്ള സാഹചര്യം” സംബന്ധിച്ച് പെസഷ്കിയാനുമായി സംസാരിച്ചതായി മോദി പറഞ്ഞിരുന്നു. സംഘർഷം വഷളാകുന്നതും സാധാരണ ജനങ്ങളുടെ ജീവഹാനിയും അടിസ്ഥാന സൗകര്യങ്ങളുടെ നാശനഷ്ടങ്ങളും സംബന്ധിച്ച് അദ്ദേഹം ഗൗരവമായ ആശങ്ക പ്രകടിപ്പിച്ചിരുന്നു.
ഇന്ത്യൻ പൗരന്മാരുടെ സുരക്ഷയും “വസ്തുക്കളുടെയും ഊർജത്തിന്റെയും തടസ്സമില്ലാത്ത ഗതാഗതവും” ഇന്ത്യയുടെ “പ്രധാന മുൻഗണനകളാണ്” എന്നും പ്രധാനമന്ത്രി ചൂണ്ടിക്കാട്ടി. ഗൾഫ് മേഖലയിൽ തുടരുന്ന സംഘർഷത്തിനിടയിൽ ഇന്ത്യയുടെ നേതൃത്വം വിവിധ രാജ്യങ്ങളുമായി നിരന്തരം ബന്ധത്തിൽ തുടരുന്നു. വിദേശകാര്യ മന്ത്രി എസ് ജയശങ്കർ ഇറാനിലെ സഹമന്ത്രി സെയ്ദ് അബ്ബാസ് അഗരാചിയുമായി പലവട്ടം ചര്ച്ചകൾ നടത്തിയെന്നും വിദേശകാര്യ മന്ത്രാലയം പറഞ്ഞു.
കപ്പൽ ഗതാഗത മാർഗങ്ങൾ സുരക്ഷിതമാക്കേണ്ടതിന്റെ ആവശ്യകത പ്രധാനമന്ത്രി ഉന്നയിച്ചതിന് പിന്നാലെ, പേർഷ്യൻ ഗൾഫ് മേഖലയിൽ 20-ലധികം ഇന്ത്യൻ കപ്പലുകൾ കുടുങ്ങിയിരിക്കുകയാണ്. ഹോർമുസ് കടലിടുക്ക് വഴിയുള്ള ഗതാഗതത്തെ സംഘർഷം വളരെയധികം ബാധിച്ചിട്ടുണ്ട്. കഴിഞ്ഞ ആഴ്ച, 92,712 മെട്രിക് ടൺ എൽപിജി വഹിച്ചിരുന്ന “ശിവാലിക്”, “നന്ദാദേവി” എന്നീ ഇന്ത്യൻ പതാകയുള്ള കപ്പലുകൾ വിജയകരമായി ഈ കടൽപ്പാത വഴി കടന്ന് ഇന്ത്യയിലെത്തിയിരുന്നു.
“Shipping routes must be open and safe”: PM Narendra Modi speaks to Iranian President
