തമിഴ്നാട് നിയമസഭാ തിരഞ്ഞെടുപ്പിൽ മുഖ്യമന്ത്രി എം.കെ. സ്റ്റാലിന്റെ നേതൃത്വത്തിലുള്ള ഡിഎംകെ സഖ്യം അധികാരം നിലനിർത്തുമെന്ന് ലോക്പോൾ സർവേ പ്രവചിക്കുന്നു. സംസ്ഥാനത്ത് ‘സ്റ്റാലിൻ 2.0’ ഭരണത്തിന് സാധ്യത കൽപ്പിക്കുന്ന സർവേ, ഡിഎംകെ സഖ്യം 181 മുതൽ 189 വരെ സീറ്റുകൾ നേടി വൻ വിജയം കൈവരിക്കുമെന്ന് സൂചിപ്പിക്കുന്നു. അതേസമയം, പ്രധാന പ്രതിപക്ഷമായ എഐഎഡിഎംകെ സഖ്യത്തിന് കടുത്ത തിരിച്ചടി നേരിടുമെന്നാണ് കണക്കുകൾ പറയുന്നത്. 38 മുതൽ 42 വരെ സീറ്റുകൾ മാത്രമേ എഐഎഡിഎംകെ സഖ്യത്തിന് ലഭിക്കാനിടയുള്ളൂ എന്നാണ് സർവേ ഫലം.
കന്നി തിരഞ്ഞെടുപ്പിനിറങ്ങുന്ന നടൻ വിജയിന്റെ തമിഴക വെട്രി കഴകം (ടിവികെ) സംസ്ഥാന രാഷ്ട്രീയത്തിൽ നിർണ്ണായക ശക്തിയായി മാറുമെന്നും സർവേ ചൂണ്ടിക്കാട്ടുന്നു. 24 ശതമാനം വോട്ട് വിഹിതം നേടുന്ന വിജയിന്റെ പാർട്ടി 8 മുതൽ 10 വരെ സീറ്റുകൾ പിടിച്ചെടുക്കാൻ സാധ്യതയുണ്ട്. മുഖ്യമന്ത്രി സ്ഥാനത്തേക്ക് ജനങ്ങൾ ഏറ്റവുമധികം പിന്തുണയ്ക്കുന്നത് എം.കെ. സ്റ്റാലിനെ തന്നെയാണ് (41 ശതമാനം). എന്നാൽ, രാഷ്ട്രീയത്തിലെ പ്രമുഖ നേതാക്കളെയെല്ലാം പിന്നിലാക്കി 27.1 ശതമാനം പേരുടെ പിന്തുണയോടെ വിജയ് രണ്ടാമതെത്തിയത് തമിഴ് രാഷ്ട്രീയത്തിലെ വലിയ ചലനമായാണ് വിലയിരുത്തപ്പെടുന്നത്.
സംസ്ഥാനത്തെ എല്ലാ മണ്ഡലങ്ങളിലും 500 പേരെ വീതം നേരിൽ കണ്ട് തയ്യാറാക്കിയതാണ് ഈ സർവേ റിപ്പോർട്ടെന്ന് ലോക്പോൾ അവകാശപ്പെടുന്നു. പരമ്പരാഗത ദ്രാവിഡ പാർട്ടികൾക്കിടയിലേക്ക് വിജയ് എന്ന താരം നടത്തുന്ന കടന്നുകയറ്റം വോട്ട് വിഹിതത്തിൽ വലിയ മാറ്റങ്ങൾ ഉണ്ടാക്കുമെന്നാണ് സർവേ വ്യക്തമാക്കുന്നത്. ഭരണത്തുടർച്ചയ്ക്കുള്ള സാധ്യതകൾ ഡിഎംകെ ക്യാമ്പിന് ആത്മവിശ്വാസം നൽകുമ്പോൾ, വിജയിന്റെ കുതിപ്പ് വരുംകാല രാഷ്ട്രീയത്തിൽ പുതിയ പോരാട്ടങ്ങൾക്ക് വഴിതുറക്കുമെന്ന് ഉറപ്പായി.
Stalin’s DMK set for sweep in Tamil Nadu; Actor Vijay emerges as second choice for CM in Lokpoll survey
