വത്തിക്കാൻ സിറ്റി: ഇറാനിൽ നടന്നുകൊണ്ടിരിക്കുന്ന യുദ്ധം ഉടനടി അവസാനിപ്പിക്കണമെന്നും സമാധാനത്തിൻ്റെ പാത സ്വീകരിക്കണമെന്നും ശക്തമായ ഭാഷയിൽ ആഹ്വാനം ചെയ്ത് ലിയോ പതിനാലാമൻ മാർപ്പാപ്പ. ഞായറാഴ്ച വത്തിക്കാനിൽ നടന്ന പ്രാർത്ഥനയ്ക്കിടെയാണ് യുദ്ധത്തിന് കാരണക്കാരായ ഭരണാധികാരികളെ നേരിട്ട് അഭിസംബോധന ചെയ്തുകൊണ്ട് അദ്ദേഹം സംസാരിച്ചത്.
“മിഡിൽ ഈസ്റ്റിലെ ക്രൈസ്തവർക്കും നന്മ ആഗ്രഹിക്കുന്ന മുഴുവൻ മനുഷ്യർക്കും വേണ്ടി ഞാൻ ഈ സംഘർഷത്തിന് ഉത്തരവാദികളായവരോട് അഭ്യർത്ഥിക്കുന്നു; ദയവായി വെടിനിർത്തുക. സംഭാഷണത്തിനുള്ള വഴികൾ വീണ്ടും തുറക്കാൻ ഇത് അത്യാവശ്യമാണ്. അക്രമത്തിലൂടെ ഒരിക്കലും നീതിയോ സമാധാനമോ കൈവരിക്കാനാവില്ല,” മാർപ്പാപ്പ പറഞ്ഞു.
അമേരിക്കയെയോ ഇസ്രായേലിനെയോ പേരെടുത്ത് പറഞ്ഞില്ലെങ്കിലും, യുദ്ധത്തിൻ്റെ ആദ്യ ദിനങ്ങളിൽ ഇറാനിലെ ഒരു പ്രൈമറി സ്കൂളിന് നേരെയുണ്ടായ മിസൈൽ ആക്രമണത്തെ മാർപ്പാപ്പ രൂക്ഷമായി വിമർശിച്ചു. 165-ലധികം പേർ കൊല്ലപ്പെട്ട ഈ സംഭവത്തെ ‘യുദ്ധത്തിൻ്റെ മുഖം’ എന്നാണ് വത്തിക്കാൻ്റെ ഔദ്യോഗിക പത്രം വിശേഷിപ്പിച്ചത്. സ്കൂളുകൾക്കും ആശുപത്രികൾക്കും നേരെയുള്ള ആക്രമണങ്ങളിൽ അദ്ദേഹം ആഴത്തിലുള്ള ദുഃഖം രേഖപ്പെടുത്തി.
അമേരിക്കൻ പൗരത്വമുള്ള ആദ്യ മാർപ്പാപ്പയായ ലിയോ പതിനാലാമൻ, യുദ്ധത്തിൻ്റെ ആദ്യ രണ്ടാഴ്ചകളിൽ നയതന്ത്രപരമായ മിതത്വം പാലിച്ചിരുന്നു. എന്നാൽ നിലവിലെ സാഹചര്യം കണക്കിലെടുത്താണ് അദ്ദേഹം നിലപാട് കടുപ്പിച്ചത്. യുദ്ധത്തിന് ഉത്തരവാദികളായ ക്രിസ്ത്യൻ നേതാക്കൾ സ്വന്തം മനസ്സാക്ഷി പരിശോധിക്കണമെന്നും അദ്ദേഹം ഓർമ്മിപ്പിച്ചു.
അതേസമയം, വാഷിംഗ്ടൺ മുന്നോട്ടുവെക്കുന്ന ‘പ്രതിരോധ യുദ്ധം’ എന്ന വാദത്തെ വത്തിക്കാൻ സെക്രട്ടറി ഓഫ് സ്റ്റേറ്റ് കർദ്ദിനാൾ പിയട്രോ പരോളിൻ തള്ളിക്കളഞ്ഞു. യുദ്ധം ധാർമ്മികമായി ന്യായീകരിക്കാനാവില്ലെന്ന് അമേരിക്കയിലെ പ്രമുഖ കർദ്ദിനാൾമാരും വ്യക്തമാക്കിയിട്ടുണ്ട്. ലെബനനിലെ ക്രൈസ്തവ സമൂഹത്തിൻ്റെ സുരക്ഷയിലും വത്തിക്കാൻ ആശങ്ക പ്രകടിപ്പിച്ചു.
Stop the Iran war: Pope makes direct appeal to world leaders
