തിരഞ്ഞെടുപ്പിൽ വിജയിച്ച് യുഡിഎഫ് അധികാരത്തിലെത്തിയാൽ കെ.സി. വേണുഗോപാൽ മുഖ്യമന്ത്രിയാകാനുള്ള സാധ്യത തള്ളാതെ കെപിസിസി പ്രസിഡന്റ് സണ്ണി ജോസഫ്. എംഎൽമാരിൽ നിന്ന് പുറത്തുള്ളയാൾ മുഖ്യമന്ത്രിയാകാൻ സാധ്യതയുണ്ടോ എന്ന ചോദ്യത്തിന് കൂടിയാലോചിച്ച് ഉചിതമായ തീരുമാനം ഉണ്ടായാൽ എല്ലാവരും അംഗീകരിക്കുമെന്നായിരുന്നു സണ്ണി ജോസഫിൻ്റെ മറുപടി.
കെ. സുധാകരനെതിരെ കത്തയച്ചത് സിപിഎമ്മാണെന്നും താനെഴുതിയതാണെന്ന് തെളിയിക്കാൻ വെല്ലുവിളിക്കുന്നുവെന്നും സണ്ണി ജോസഫ് പറഞ്ഞു. സുധാകരനെതിരെ എഴുതിയ കത്ത് എഴുതിയത് താനാണെന്ന തെളിവുമായി ആരെങ്കിലും രംഗത്ത് വരട്ടെയെന്ന് വെല്ലുവിളിയ്ക്കുന്നതായി പറഞ്ഞ സണ്ണി ജോസഫ്, ഇക്കാര്യത്തിൽ ഡിജിപിക്ക് പരാതി കൊടുത്തിട്ടുള്ളതായും കൂട്ടിച്ചേർത്തു. വിഷയത്തിൽ, ഡിജിപി നടപടിയെടുക്കുന്നില്ലെങ്കിൽ താനും പ്രതിപക്ഷനേതാവും ഹൈക്കോടതിയെ സമീപിച്ച് ഇത് മറ്റൊരു കാഫിർ സ്ക്രീൻഷോട്ടാണെന്ന് കേരളത്തിലെ ജനങ്ങൾക്ക് മുന്നിൽ തെളിയിക്കും.
കോൺഗ്രസ് വിരുദ്ധ കേന്ദ്രങ്ങളിൽ നിന്നാണ് ഈ കത്ത് വന്നിട്ടുള്ളതെന്നും അദ്ദേഹം ആരോപിച്ചു.യുഡിഎഫിന് ഉപമുഖ്യമന്ത്രി സ്ഥാനമുണ്ടാകില്ലെന്നും ഉപമുഖ്യമന്ത്രി സ്ഥാനം ആരും ആവശ്യപ്പെട്ടിട്ടില്ലെന്ന് പറഞ്ഞ സണ്ണി ജോസഫ് ലീഗിന് ഉപമുഖ്യമുഖ്യമന്ത്രി സ്ഥാനം ആവശ്യമില്ലെന്ന് പി.കെ. കുഞ്ഞാലിക്കുട്ടി പറഞ്ഞ കാര്യവും ഓർമിപ്പിച്ചു. വയനാട്ടിൽ സ്ഥലം ലഭിക്കാൻ വൈകിയതാണ് വീടുനിർമ്മാണപദ്ധതിയ്ക്ക് തടസ്സമായതെന്നും അദ്ദേഹം പറഞ്ഞു.
ഫണ്ട് വകമാറ്റമോ അഴിമതിയോ ഇക്കാര്യത്തിൽ സംഭവിച്ചിട്ടില്ലെന്നും ആരോപണങ്ങൾ തള്ളിക്കളഞ്ഞു കൊണ്ട് അദ്ദേഹം വ്യക്തമാക്കി.ഇക്കഴിഞ്ഞ നിയമസഭാ തിരഞ്ഞെടുപ്പിനെ ആത്മവിശ്വാസത്തോടെയും പാർട്ടിയിലെ എല്ലാ അംഗങ്ങളുടെയും പൂർണസഹകരണത്തോടെയുമാണ് നേരിടാൻ സാധിച്ചത്. തിരഞ്ഞെടുപ്പ് വിജയം പൊതുആവശ്യമാണെന്ന് കണ്ട് ടീം സ്പിരിറ്റിലാണ് പ്രവർത്തിച്ചതെന്നും തദ്ദേശതിരഞ്ഞെടുപ്പിലെ വിജയം ആത്മവിശ്വാസം വർധിപ്പിച്ചുവെന്നും സണ്ണി ജോസഫ് മാധ്യമങ്ങളോട് പറഞ്ഞു.
Sunny Joseph leaves door open for KC Venugopal as potential CM candidate for 2026
