ന്യൂഡൽഹി: വിദ്യാർഥി പ്രതിഷേധക്കാർക്കെതിരായ പൊലീസ് അതിക്രമത്തിൽ എഫ്ഐആർ രജിസ്റ്റർ ചെയ്യുന്നില്ലെന്ന് ആരോപിച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. കേരളത്തിൽ നിന്നുള്ള ആതിര, രാജസ്ഥാനിൽ നിന്നുള്ള റിതു എന്നിവരടക്കം യുവതികളെ പൊലീസ് മർദിച്ച വിഷയത്തിലാണ് ആരോപണം.
സംഭവത്തിൽ കേരള ആഭ്യന്തരമന്ത്രി രമേശ് ചെന്നിത്തലയുമായും രാജസ്ഥാൻ കോൺഗ്രസ് അധ്യക്ഷൻ ഗോവിന്ദ് സിങ് ദോത്‌സരയുമായും സംസാരിച്ചതായി രാഹുൽ എക്സിൽ കുറിച്ചു. കേരളത്തിൽ സീറോ എഫ്ഐആർ രജിസ്റ്റർ ചെയ്തിട്ടുണ്ടെന്നും കുറ്റക്കാരായ ഉദ്യോഗസ്ഥർക്കെതിരെ നിയമനടപടി സ്വീകരിക്കുമെന്നും അദ്ദേഹം വ്യക്തമാക്കി.
“കേരളത്തിൽ നിന്നുള്ള ആതിര, രാജസ്ഥാനിൽ നിന്നുള്ള റിതു എന്നിവരടക്കം നിരവധി യുവതികളെ ഡൽഹി പൊലീസ് മർദിച്ചു. അമിത് ഷായുടെ കീഴിലുള്ള ഡൽഹി പൊലീസിന്റെ അതിക്രമം നടപടികളില്ലാതെ കടന്നുപോകാൻ അനുവദിക്കില്ല,” രാഹുൽ കുറിച്ചു.
1930ലെ ധരസാന സത്യാഗ്രഹം അനുസ്മരിച്ച രാഹുൽ, ലാത്തിച്ചാർജിനെ തിരിച്ചടിക്കാതെ നേരിട്ട സരോജിനി നായിഡുവിന്റെ നേതൃത്വത്തിലുള്ള സമരക്കാരെയും പരാമർശിച്ചു. “പൊലീസിന് എല്ലൊടിക്കാം. സത്യാഗ്രഹത്തെ തകർക്കാനാവില്ല,” അദ്ദേഹം പറഞ്ഞു.
ഇന്ത്യൻ യുവജനങ്ങൾ, പ്രത്യേകിച്ച് യുവതികൾ, ജനാധിപത്യ സംരക്ഷണത്തിനായി നിർഭയമായും ഉറച്ച നിലപാടോടെയും ഒറ്റക്കെട്ടായി മുന്നോട്ടുവരികയാണെന്നും താൻ അവർക്കൊപ്പമാണെന്നും രാഹുൽ വ്യക്തമാക്കി.
അതിനിടെ, കൊണാട്ട് പ്ലേസിൽ ‘ലഹ്‌റാ ദോ തിരംഗ’ പ്രതിഷേധത്തിൽ പങ്കെടുക്കാൻ പോകുന്നതിനിടെ സി.ജെ.പി നേതാവ് അഭിജീത് ദിപ്‌കെയെയും ഐസ അധ്യക്ഷ നെഹ ബോറയെയും ഡൽഹി പൊലീസ് കസ്റ്റഡിയിലെടുത്തു. അനുമതിയില്ലാതെ റാലി നടത്തിയാൽ നിയമനടപടി സ്വീകരിക്കുമെന്ന് പൊലീസ് മുന്നറിയിപ്പ് നൽകിയിരുന്നു. പ്രതിഷേധത്തിന് മുന്നോടിയായി കൊണാട്ട് പ്ലേസിൽ സുരക്ഷ ശക്തമാക്കുകയും ഗതാഗത നിയന്ത്രണങ്ങൾ ഏർപ്പെടുത്തുകയും ചെയ്തു.
‘The police may break bones, but they cannot crush a satyagraha’; Rahul Gandhi speaks out against the Delhi Police for attacking individuals including Malayali student Athira.
