വാഷിംഗ്ടൺ: ഇറാനെതിരെയുള്ള സൈനിക നടപടികൾ രണ്ടോ മൂന്നോ ആഴ്ചയ്ക്കുള്ളിൽ അവസാനിപ്പിക്കാനാകുമെന്ന് യുഎസ് പ്രസിഡൻ്റ് ഡോണൾഡ് ട്രംപ്. ചൊവ്വാഴ്ച മാധ്യമപ്രവർത്തകരോട് സംസാരിക്കവെയാണ് വരാനിരിക്കുന്ന ആഴ്ചകളിൽ യുദ്ധം അവസാനിപ്പിക്കാൻ കഴിയുമെന്ന് അദ്ദേഹം പ്രത്യാശ പ്രകടിപ്പിച്ചത്.
ഇറാനുമായി നിലവിൽ ചർച്ചകൾ നടക്കുന്നുണ്ടെന്നും ഔദ്യോഗികമായ ഒരു കരാർ ഇല്ലാതെ തന്നെ യുദ്ധം അവസാനിപ്പിക്കാൻ സാധിക്കുമെന്നും ട്രംപ് പറഞ്ഞു. എന്നാൽ അമേരിക്കയുമായി നേരിട്ട് ചർച്ചകൾ നടത്തുന്ന കാര്യം ഇറാൻ നിഷേധിച്ചു. അതേസമയം, മധ്യസ്ഥർ മുഖേന ഇരുരാജ്യങ്ങളും സന്ദേശങ്ങൾ കൈമാറുന്നുണ്ടെന്ന് ഇറാൻ സ്ഥിരീകരിച്ചിട്ടുണ്ട്.
യുദ്ധത്തെത്തുടർന്ന് കുതിച്ചുയരുന്ന ഇന്ധനവിലയെക്കുറിച്ചുള്ള ചോദ്യത്തിന്, ഇറാനിൽ നിന്നുള്ള സൈനിക പിന്മാറ്റം ഉടൻ ഉണ്ടാകുമെന്നും അതോടെ വില കുറയുമെന്നും അദ്ദേഹം മറുപടി നൽകി. “എനിക്ക് ഇറാനിൽ നിന്ന് പിന്മാറേണ്ട കാര്യമേയുള്ളൂ, അത് ഉടൻ സംഭവിക്കും,” ട്രംപ് വ്യക്തമാക്കി. ഇതോടെ മേഖലയിൽ സമാധാനം പുനഃസ്ഥാപിക്കപ്പെടുമെന്ന പ്രതീക്ഷയിലാണ് ലോകരാജ്യങ്ങൾ.
ഫെബ്രുവരി 28-നാണ് അമേരിക്കയും ഇസ്രായേലും ചേർന്ന് ഇറാനിലെ ആണവ കേന്ദ്രങ്ങളും സൈനിക താവളങ്ങളും ലക്ഷ്യമിട്ട് വൻതോതിലുള്ള വ്യോമാക്രമണം ആരംഭിച്ചത്. യുഎസ്-ഇസ്രായേൽ സംയുക്ത ആക്രമണത്തിൽ ഇറാൻ്റെ പരമോന്നത നേതാവ് ആയത്തൊള്ള അലി ഖമേനി ഉൾപ്പെടെയുള്ള പ്രമുഖ നേതാക്കൾ കൊല്ലപ്പെട്ടു. അമേരിക്കൻ സൈനിക താവളങ്ങൾക്കും ഇസ്രായേലിനും നേരെ ഇറാൻ ഡ്രോണുകളും മിസൈലുകളും ഉപയോഗിച്ച് ശക്തമായ തിരിച്ചടി നൽകിയിരുന്നു.
Trump says Iran war will end in two to three weeks; fuel prices will drop soon
