പശ്ചിമേഷ്യയിൽ യുദ്ധസാഹചര്യം ശക്തമാകുന്ന പശ്ചാത്തലത്തിൽ യുഎഇയിലെ ഇന്ത്യൻ പൗരന്മാർക്കായി അബുദാബിയിലെ ഇന്ത്യൻ എംബസി സുരക്ഷാ നിർദ്ദേശം പുറപ്പെടുവിച്ചു. മേഖലയിലെ മാറിക്കൊണ്ടിരിക്കുന്ന സുരക്ഷാ സാഹചര്യങ്ങൾ കണക്കിലെടുത്ത് പ്രവാസികൾ ജാഗ്രത പാലിക്കണമെന്ന് എംബസി അറിയിച്ചു. നിലവിലെ സംഘർഷങ്ങൾ ഗൾഫ് രാജ്യങ്ങളെയും ബാധിക്കാൻ സാധ്യതയുള്ളതിനാലാണ് മുൻകരുതൽ എന്ന നിലയിൽ ഈ നടപടി. അപകടങ്ങൾ നടന്ന സ്ഥലങ്ങളുടെയോ വിമാനത്താവളങ്ങളുടെയോ മറ്റ് നിയന്ത്രിത മേഖലകളുടെയോ അനധികൃതമായ ഫോട്ടോകളോ വീഡിയോകളോ എടുക്കുന്നവർക്കെതിരെ യുഎഇ അധികൃതർ കർശനമായ നിയമനടപടികൾ സ്വീകരിക്കുമെന്ന് എംബസി അറിയിച്ചു. കൂടാതെ, മിസൈലുകളുടെയോ സ്ഫോടനാവശിഷ്ടങ്ങളുടെയോ അവശിഷ്ടങ്ങളുടെ ചിത്രങ്ങൾ സോഷ്യൽ മീഡിയ പ്ലാറ്റ്ഫോമുകൾ വഴി പ്രചരിപ്പിക്കുന്നത് ഒഴിവാക്കണമെന്നും അധികൃതർ ആവശ്യപ്പെട്ടു.
അനാവശ്യ യാത്രകൾ ഒഴിവാക്കണമെന്നും പ്രാദേശിക ഭരണകൂടം നൽകുന്ന സുരക്ഷാ നിർദ്ദേശങ്ങൾ കൃത്യമായി പാലിക്കണമെന്നും എംബസി നിർദ്ദേശിച്ചു. അടിയന്തര സാഹചര്യങ്ങളിൽ സഹായത്തിനായി എംബസിയുമായോ ദുബായിലെ കോൺസുലേറ്റുമായോ ബന്ധപ്പെടാൻ പ്രത്യേക ഹെൽപ്പ് ലൈൻ നമ്പറുകളും സജ്ജമാക്കിയിട്ടുണ്ട്. ഇന്ത്യക്കാർ താമസിക്കുന്ന മേഖലകളിൽ നിലവിൽ ആശങ്കപ്പെടേണ്ട സാഹചര്യമില്ലെങ്കിലും അതീവ ജാഗ്രത തുടരണമെന്ന് അറിയിപ്പിൽ പറയുന്നു.
യുഎസ്-ഇസ്രയേൽ സഖ്യം ഇറാന് നേരെ ആക്രമണം ശക്തമാക്കിയതോടെ പശ്ചിമേഷ്യയിലുടനീളം യുദ്ധഭീതി നിലനിൽക്കുകയാണ്. ഇറാന്റെ തിരിച്ചടി ഉണ്ടാകാൻ സാധ്യതയുള്ളതിനാൽ അയൽരാജ്യങ്ങളും നിരീക്ഷണം കർശനമാക്കിയിട്ടുണ്ട്. യുഎഇയിലെ വൻതോതിലുള്ള ഇന്ത്യൻ സാന്നിധ്യം കണക്കിലെടുത്ത് അവരുടെ സുരക്ഷ ഉറപ്പാക്കാൻ ഇന്ത്യൻ വിദേശകാര്യ മന്ത്രാലയം സ്ഥിതിഗതികൾ സസൂക്ഷ്മം വിലയിരുത്തി വരികയാണ്.
UAE Indian Embassy issues security alert amid Middle East conflict
