ഇറാനിൽ സംഘർഷം ശക്തമാകുന്ന സാഹചര്യത്തിൽ പശ്ചിമേഷ്യയിലേക്ക് തങ്ങളുടെ കരുത്തുറ്റ വിമാനവാഹിനിക്കപ്പലിനെ നിയോഗിച്ച് അമേരിക്ക. ദക്ഷിണ ചൈനാ കടലിൽ വിന്യസിച്ചിരുന്ന യുഎസ്എസ് നിമിറ്റ്സ് (USS Nimitz) എന്ന യുദ്ധക്കപ്പലിനെയാണ് അടിയന്തരമായി പശ്ചിമേഷ്യൻ മേഖലയിലേക്ക് മാറ്റിയത്. വിയറ്റ്നാമിൽ നിശ്ചയിച്ചിരുന്ന സന്ദർശനം റദ്ദാക്കിയാണ് കപ്പലിന്റെ ഈ നിർണ്ണായക നീക്കം. അമേരിക്കൻ നാവികസേനയുടെ അഞ്ചാമത്തെ നിമിറ്റ്സ് ക്ലാസ് (Nimitz-class) വിമാനവാഹിനിക്കപ്പലായ യുഎസ്എസ് എബ്രഹാം ലിങ്കൺ എത്തുമ്പോൾ മേഖലയിൽ ഭീതി കനക്കുകയാണ്. ഏകദേശം 104,300 ടൺ ഭാരവും 1,092 അടി നീളവുമുള്ള ഈ കപ്പൽ രണ്ട് ആണവ റിയാക്ടറുകളുടെ സഹായത്തോടെയാണ് പ്രവർത്തിക്കുന്നത്.
മേഖലയിലെ സുരക്ഷ ശക്തമാക്കുന്നതിന്റെ ഭാഗമായി യുഎസ്എസ് കാൾ വിൻസൺ (USS Carl Vinson) സ്ട്രൈക്ക് ഗ്രൂപ്പിനൊപ്പം നിമിറ്റ്സും ചേരും. അഞ്ച് ഡിസ്ട്രോയറുകളും ഒൻപത് എയർ സ്ക്വാഡ്രണുകളും ഈ കപ്പലിന് അകമ്പടിയായുണ്ട്. പശ്ചിമേഷ്യയിലെ അമേരിക്കൻ സൈനിക താവളങ്ങളുടെ സുരക്ഷ ഉറപ്പാക്കുന്നതിനും ശത്രുനീക്കങ്ങളെ പ്രതിരോധിക്കുന്നതിനുമാണ് പെന്റഗൺ ഈ നടപടി സ്വീകരിച്ചിരിക്കുന്നത്.
ഇറാനിലെ സൈനിക, ആണവ കേന്ദ്രങ്ങളെ ലക്ഷ്യമാക്കി ഇസ്രായേൽ നടത്തിയ ആക്രമണങ്ങൾക്ക് പിന്നാലെ മേഖലയിൽ യുദ്ധസാധ്യത വർദ്ധിച്ചിരിക്കുകയാണ്. ഇതിനെത്തുടർന്ന് തങ്ങളുടെ പൗരന്മാരോടും സൈനികരുടെ കുടുംബാംഗങ്ങളോടും സുരക്ഷിത സ്ഥാനങ്ങളിലേക്ക് മാറാൻ അമേരിക്ക നിർദ്ദേശം നൽകിയിട്ടുണ്ട്. കൂടുതൽ പ്രതിരോധ സംവിധാനങ്ങളും ഇന്ധനം നിറയ്ക്കുന്ന വിമാനങ്ങളും അമേരിക്ക മേഖലയിൽ എത്തിച്ചിട്ടുണ്ട്.
