യുഎസ്എസ് ജെറാൾഡ് ഫോർഡ് ഇസ്രയേൽ തീരത്ത്, സർവ്വ സജ്ജമെന്ന് യുഎസ് നാവിക സേന, പടയൊരുക്കം പൂർണമായെന്ന് ഇറാന് മുന്നറിയിപ്പ്; സമാധാന ചർച്ചയിൽ പ്രതീക്ഷ

ലോകത്തിലെ ഏറ്റവും വലിയ യുദ്ധക്കപ്പലായ യുഎസ്എസ് ജെറാൾഡ് ഫോർഡ് ഇസ്രയേൽ തീരത്ത് നങ്കൂരമിട്ടതോടെ മിഡിൽ ഈസ്റ്റിൽ അമേരിക്കൻ സേനാവിന്യാസം പൂർണ്ണമായി. സാങ്കേതിക തകരാറുകൾ മൂലം യാത്ര വൈകിയത് വലിയ ചർച്ചയായിരുന്നുവെങ്കിലും, പ്രശ്നങ്ങൾ പരിഹരിച്ച് കപ്പൽ ഇപ്പോൾ സർവ്വസജ്ജമാണെന്ന് യുഎസ് നാവികസേന പ്രഖ്യാപിച്ചു. ഇറാന്റെ ഭാഗത്തുനിന്ന് ഉണ്ടായേക്കാവുന്ന ഏതൊരു പ്രത്യാക്രമണത്തെയും നേരിടാൻ ഹൈഫ തീരത്ത് വിന്യസിച്ചിരിക്കുന്ന ഈ വിമാനവാഹിനിക്കപ്പൽ സജ്ജമാണ്.

മേഖലയിൽ യുദ്ധസമാനമായ സാഹചര്യം നിലനിൽക്കെ, ഇറാന് അമേരിക്ക നൽകിയ സമയപരിധി അവസാനിക്കാറായിരിക്കുകയാണ്. തങ്ങളുടെ ആണവ കേന്ദ്രങ്ങൾ നശിപ്പിക്കണമെന്നും സമ്പുഷ്ടീകരിച്ച യുറേനിയം ശേഖരം കൈമാറണമെന്നുമുള്ള കടുത്ത നിബന്ധനകൾ ഇറാൻ തള്ളിയതായാണ് റിപ്പോർട്ടുകൾ. ജനീവയിൽ നടന്ന ചർച്ചകളിൽ പുരോഗതിയില്ലാത്തതും സമ്പുഷ്ടീകരണം പാടില്ലെന്ന അമേരിക്കൻ നിലപാടിനെ ഇറാൻ എതിർത്തതും സംഘർഷം രൂക്ഷമാക്കിയിട്ടുണ്ട്.

യുഎസ്എസ് ജെറാൾഡ് ഫോർഡിന് പുറമെ യുഎസ്എസ് എബ്രഹാം ലിങ്കൺ സ്ട്രൈക്ക് ഗ്രൂപ്പും എഫ്-22 യുദ്ധവിമാനങ്ങളും നിലവിൽ മേഖലയിൽ നിലയുറപ്പിച്ചിട്ടുണ്ട്. ഉപരോധങ്ങൾ നീക്കണമെന്ന ആവശ്യം ഇറാൻ ശക്തമായി ഉന്നയിക്കുമ്പോഴും വിട്ടുവീഴ്ചയ്ക്ക് തയ്യാറാകാത്ത അമേരിക്കൻ നിലപാട് വലിയൊരു സൈനിക നീക്കത്തിനുള്ള സാധ്യത വർധിപ്പിക്കുന്നു. വരും ദിവസങ്ങളിൽ ഇറാന്റെ പ്രതികരണം എന്തായിരിക്കും എന്നതിനെ ആശ്രയിച്ചിരിക്കും മേഖലയുടെ ഭാവി.

USS Gerald Ford off Israeli coast, US Navy warns Iran that it is fully prepared; hopes for peace talk