ആരോഗ്യമന്ത്രി വീണാ ജോർജിന്റെ ശാരീരിക അസ്വസ്ഥതകളെയും കെഎസ്യു പ്രതിഷേധത്തോടുള്ള പ്രതികരണങ്ങളെയും രൂക്ഷമായ ഭാഷയിൽ പരിഹസിച്ച് പ്രതിപക്ഷ നേതാവ് വി.ഡി. സതീശൻ. പ്രതിഷേധക്കാരുടെ മുദ്രാവാക്യം കേട്ടാൽ പെടലിക്ക് വേദന വരുമോ എന്ന് അദ്ദേഹം ചോദിച്ചു. മുദ്രാവാക്യം വിളികൾ കൊണ്ട് പെടലി വേദന വരുമെങ്കിൽ താനും രമേശ് ചെന്നിത്തലയുമൊക്കെ വേദന കൊണ്ട് എന്നേ കിടപ്പിലാകുമായിരുന്നുവെന്നും സതീശൻ പരിഹസിച്ചു. മന്ത്രിയുടെ അഭിനയത്തിന് ഓസ്കർ അവാർഡ് തന്നെ നൽകണമെന്നും വെറും ഉർവശി അവാർഡ് ഒന്നും പോരെന്നും അദ്ദേഹം പറഞ്ഞു.
കണ്ണൂർ റെയിൽവേ സ്റ്റേഷനിൽ കെഎസ്യു പ്രവർത്തകർ നടത്തിയ കരിങ്കൊടി പ്രതിഷേധത്തിനിടെ മന്ത്രിക്കു പരിക്കേറ്റുവെന്ന വാദങ്ങളെ തള്ളിക്കൊണ്ടായിരുന്നു സതീശന്റെ പ്രതികരണം. മന്ത്രിക്കെതിരെ യാതൊരു വിധ ആക്രമണവും ഉണ്ടായിട്ടില്ലെന്നും അവർ വെറും അഭിനയം കാഴ്ചവെക്കുകയാണെന്നും അദ്ദേഹം ആരോപിച്ചു. സർക്കാരിന്റെ പരാജയങ്ങൾ മറച്ചുവെക്കാൻ മന്ത്രി രാഷ്ട്രീയ നാടകം കളിക്കുകയാണെന്നും പ്രതിപക്ഷത്തിന്റെ പ്രതിഷേധങ്ങൾ തുടരുമെന്നും സതീശൻ വ്യക്തമാക്കി.
സിപിഎം സംഘപരിവാറിന്റെ ബി ടീമായി മാറിക്കൊണ്ടിരിക്കുകയാണെന്നും വി.ഡി. സതീശൻ ആരോപിച്ചു. വർഗീയത ആര് പറഞ്ഞാലും യുഡിഎഫ് ചോദ്യം ചെയ്യുമെന്നും അദ്ദേഹം പറഞ്ഞു. രക്തസാക്ഷികൾ സിപിഎമ്മിന് ലോട്ടറി അടിക്കുന്നത് പോലെയാണെന്നും അവരുടെ പേരിൽ ഫണ്ട് പിരിച്ച് വെട്ടിക്കാനാണ് പാർട്ടിക്ക് താല്പര്യമെന്നും അദ്ദേഹം കുറ്റപ്പെടുത്തി. ജനങ്ങളെ തെറ്റിദ്ധരിപ്പിക്കുന്ന ഇത്തരം നാടകങ്ങൾ കേരളം തിരിച്ചറിയുമെന്നും പ്രതിപക്ഷ നേതാവ് കൂട്ടിച്ചേർത്തു.
‘Veena George deserves an Oscar’: V.D. Satheesan mocks Kerala Health Minister
