തമിഴ് സൂപ്പർതാരം വിജയ്യുടെ അവസാന ചിത്രമെന്ന വിശേഷണത്തോടെ എത്തുന്ന ‘ജനനായകന്’ പ്രദർശനാനുമതി നിഷേധിച്ച മദ്രാസ് ഹൈക്കോടതി ഡിവിഷൻ ബെഞ്ച് വിധിക്കെതിരെ നിർമാതാക്കൾ സുപ്രീം കോടതിയെ സമീപിച്ചു. ചിത്രത്തിന് അടിയന്തരമായി യു/എ (U/A) സർട്ടിഫിക്കറ്റ് നൽകണമെന്ന സിംഗിൾ ബെഞ്ച് ഉത്തരവ് ഡിവിഷൻ ബെഞ്ച് സ്റ്റേ ചെയ്തതോടെയാണ് സിനിമയുടെ അണിയറപ്രവർത്തകർ രാജ്യത്തെ പരമോന്നത നീതിപീഠത്തെ അഭയം പ്രാപിച്ചത്. സെൻസർ ബോർഡ് നൽകിയ അപ്പീലിലാണ് ഡിവിഷൻ ബെഞ്ചിന്റെ നടപടി ഉണ്ടായത്.
പൊങ്കൽ റിലീസായി ചിത്രം തീയേറ്ററുകളിൽ എത്തിക്കാനായിരുന്നു നിർമാതാക്കളായ കെ.വി.എൻ പ്രൊഡക്ഷൻസ് ലക്ഷ്യമിട്ടിരുന്നത്. എന്നാൽ സെൻസർ സർട്ടിഫിക്കറ്റുമായി ബന്ധപ്പെട്ട നിയമതടസ്സങ്ങൾ നീങ്ങാത്തതിനാലും കേസ് ജനുവരി 21-ലേക്ക് മാറ്റിയതിനാലും നിശ്ചയിച്ച സമയത്ത് റിലീസ് നടക്കില്ലെന്ന് ഉറപ്പായി. എച്ച്. വിനോദ് സംവിധാനം ചെയ്ത ഈ രാഷ്ട്രീയ ചിത്രം ജനുവരി 9-ന് റിലീസ് ചെയ്യാനായിരുന്നു നേരത്തെ തീരുമാനിച്ചിരുന്നത്.
സിനിമയുടെ റിലീസ് അനിശ്ചിതത്വത്തിലായതോടെ ആവിഷ്കാര സ്വാതന്ത്ര്യത്തിന് നേരെയുള്ള കടന്നുകയറ്റത്തിനെതിരെ കലാകാരന്മാർ ഒന്നിക്കണമെന്ന് നടൻ കമൽ ഹാസൻ സോഷ്യൽ മീഡിയയിലൂടെ ആഹ്വാനം ചെയ്തു. വിജയ് രാഷ്ട്രീയത്തിലേക്ക് ഇറങ്ങുന്നതിന് മുൻപുള്ള അവസാന ചിത്രമായതിനാൽ ആരാധകർ വലിയ ആവേശത്തോടെയാണ് സിനിമയ്ക്കായി കാത്തിരിക്കുന്നത്. സുപ്രീം കോടതിയിൽ നിന്നുള്ള അനുകൂല വിധിയിൽ പ്രതീക്ഷയർപ്പിച്ചിരിക്കുകയാണ് അണിയറപ്രവർത്തകർ.
