റഷ്യയിൽ നിന്നുള്ള എണ്ണ ഇറക്കുമതി ഇന്ത്യ അവസാനിപ്പിക്കുമെന്ന യുഎസ് പ്രസിഡന്റ് ഡോണൾഡ് ട്രംപിന്റെ അവകാശവാദത്തിൽ വ്യക്തമായ മറുപടി നൽകാതെ വിദേശകാര്യ മന്ത്രാലയം. 140 കോടി ജനങ്ങളുടെ ഊർജ്ജ സുരക്ഷ ഉറപ്പാക്കുക എന്നതിനാണ് സർക്കാർ പ്രഥമ പരിഗണന നൽകുന്നതെന്ന് മന്ത്രാലയ വക്താവ് രൺധീർ ജയ്സ്വാൾ വാർത്താ സമ്മേളനത്തിൽ അറിയിച്ചു. രാജ്യാന്തര വിപണിയിലെ സാഹചര്യങ്ങളും വാണിജ്യ ലാഭവും കണക്കിലെടുത്ത് ഊർജ്ജ സ്രോതസ്സുകൾ വൈവിധ്യവൽക്കരിക്കുക എന്നതാണ് ഇന്ത്യയുടെ നയമെന്നും അദ്ദേഹം കൂട്ടിച്ചേർത്തു.
വെനസ്വേല ഉൾപ്പെടെയുള്ള രാജ്യങ്ങളിൽ നിന്ന് എണ്ണ വാങ്ങുന്ന കാര്യത്തിൽ ഇന്ത്യക്ക് തുറന്ന നിലപാടാണുള്ളതെന്ന് മന്ത്രാലയം വ്യക്തമാക്കി. ലാഭകരമാണെങ്കിൽ ഏത് രാജ്യത്തുനിന്നും എണ്ണ വാങ്ങാൻ ഇന്ത്യ തയ്യാറാണ്. വെനസ്വേലയുമായി ദീർഘകാല പങ്കാളിത്തമുണ്ടായിരുന്നെങ്കിലും ഇടക്കാലത്ത് ഉപരോധങ്ങൾ കാരണം ഇറക്കുമതി തടസ്സപ്പെട്ടിരുന്നു. നിലവിൽ വാണിജ്യപരമായ നേട്ടങ്ങൾ പരിശോധിച്ച് മാത്രമേ ഇത്തരം തീരുമാനങ്ങൾ കൈക്കൊള്ളൂ എന്നും എണ്ണ ഇറക്കുമതിയിൽ ഇന്ത്യയുടെ മുൻഗണനകളിൽ മാറ്റമില്ലെന്നും വക്താവ് വിശദീകരിച്ചു.
ഇന്ത്യ-യുഎസ് വ്യാപാരക്കരാറിന്റെ ഭാഗമായി റഷ്യൻ എണ്ണ ഒഴിവാക്കുമെന്ന് ട്രംപ് പ്രഖ്യാപിച്ചിരുന്നെങ്കിലും ഇന്ത്യൻ സർക്കാരോ പ്രധാനമന്ത്രിയോ ഇക്കാര്യത്തിൽ ഔദ്യോഗിക സ്ഥിരീകരണം നൽകിയിട്ടില്ല. എണ്ണ ഇറക്കുമതി സംബന്ധിച്ച് ഇന്ത്യയിൽ നിന്ന് പ്രത്യേക അറിയിപ്പുകളൊന്നും ലഭിച്ചിട്ടില്ലെന്ന് റഷ്യയും പ്രതികരിച്ചു. അതേസമയം, ഇറാനിൽ തടവിലായിരുന്ന 16 ഇന്ത്യൻ നാവികരിൽ എട്ടുപേരെ മോചിപ്പിച്ചതായും ബാക്കിയുള്ളവരുടെ മോചനത്തിനായി ചർച്ചകൾ തുടരുകയാണെന്നും വിദേശകാര്യ മന്ത്രാലയം അറിയിച്ചു.
Will India Stop Russian Oil? MEA Prioritizes Energy Security Over Trump’s Claims
