തിരുവനന്തപുരം: ഗവര്ണര്ക്കെതിരെ സംസ്ഥാന സര്ക്കാര് സമര്പ്പിച്ച ഹര്ജി സുപ്രീം കോടതി നാളെ പരിഗണിക്കാനിരിക്കെ നിയമസഭ പാസാക്കിയ നാല് സുപ്രധാന ബില്ലുകളിന്മേല് തീരുമാനം രാഷ്ട്രപതിക്ക് വിട്ട് ഗവര്ണര് ആരിഫ് മുഹമ്മദ് ഖാന്. ലോകായുക്ത ബില്, സര്വകലാശാല ഭേദഗതി ബില്, ചാന്സലര് ബില്, സഹകരണ നിയമഭേദഗതി ബില് എന്നിവയാണ് ഗവര്ണര് രാഷ്ട്രപതിക്ക് വിട്ടത്. ഇക്കാര്യം നാളെ ഗവര്ണറുടെ സെക്രട്ടറി കോടതിയെ അറിയിക്കും.
രാഷ്ട്രപതിക്ക് ബില്ല് വിടുകയാണെങ്കില് ഇതിന് സമയപരിധി നിശ്ചയിക്കാന് കഴിയില്ല. സര്ക്കാരിനും ബില്ലിന് മേല് യാതൊരു വിധത്തിലുള്ള നിയമനടപടികളും കൊണ്ടു വരാന് കഴിയില്ല. ഇനി രാഷ്ട്രപതി ഇക്കാര്യത്തില് തീരുമാനം എടുക്കും. അതനുസരിച്ചാകും തുടര് നടപടി. ഗവര്ണര്ക്കെതിരെ സംസ്ഥാന സര്ക്കാര് ഹര്ജി നല്കിയ സാഹചര്യത്തിലാണ് ഗവര്ണറുടെ നയപരമായ നീക്കം.
നിയമസഭ പാസാക്കിയ ബില്ലുകളില് പലതും ഒരു വര്ഷത്തോളം ഗവര്ണര് ഒപ്പുവെയ്ക്കാതെ ഇരുന്ന സാഹചര്യത്തില് ഗവര്ണര് ബില്ലുകള് വൈകിപ്പിക്കുന്നതിനെതിരെയാണ് സര്ക്കാര് കോടതിയെ സമീപിച്ചത്. എട്ടില് നാല് ബില്ലുകളാണ് ഗവര്ണര് രാഷ്ട്രപതിക്ക് വിട്ടത്. ഇതില് രണ്ടെണ്ണം ഗവര്ണറുടെ അധികാരത്തെ ബാധിക്കുന്നതാണ്. ചാന്സലര് സ്ഥാനത്ത് നിന്നും ഗവര്ണറെ നീക്കാനുള്ള ബില്ലാണ്-ചാന്സലര് ബില്, മറ്റൊന്ന് വിസി നിയമനത്തില് ഗവര്ണറുടെ അധികാരം കുറയ്ക്കാനുള്ള ബില്ലാണ്- സര്വകലാശാല ഭേദഗതി ബില്. അതേസമയം നിയമസഭ പാസാക്കിയ പൊതുജനാരോഗ്യ ബില്ലിന് ഗവര്ണര് അംഗീകാരം നല്കിയിട്ടുണ്ട്.
