തിരുവനന്തപുരം: കരിമണല് കമ്പനിയില് നിന്ന് മാസപ്പടി വാങ്ങിയെന്നത് സംബന്ധിച്ച വിവാദത്തില് അന്വേഷണം ആവശ്യപ്പെട്ട് മാത്യു കുഴല്നാടന് വിജിലന്സ് ഡയറക്ടര്ക്ക് പരാതി നല്കി. അഴിമതി നിരോധനനിയമപ്രകാരം മുഖ്യമന്ത്രിക്കും മകള്ക്കുമെതിരെ കേസ് എടുക്കണമെന്നാവശ്യപ്പെട്ടാണ് ഡിജിപിക്ക് പരാതി നല്കിയത്. അഴിമതിയുടെ വിശദാംശങ്ങള് പുറത്തുവന്നിട്ടും താന് ഉന്നയിച്ച ചോദ്യങ്ങള്ക്കൊന്നും മുഖ്യമന്ത്രി വ്യക്തമായി മറുപടി നല്കിയില്ലെന്നും കുഴല്നാടന് ആരോപിച്ചു.
ആരോപണം ഉന്നയിച്ച് പുകമറ സൃഷ്ടിക്കുന്നതിനോ, മാധ്യമശ്രദ്ധ ലഭിക്കുന്നതിനോ വേണ്ടിയല്ല താന് ഇത് ഏറ്റെടുത്തതെന്നും വ്യക്തമായ തെളിവുകള് സഹിതം ആരോപണം ഉന്നയിച്ചിട്ടും ഇക്കാര്യത്തില് മുഖ്യമന്ത്രിയോ ബന്ധപ്പെട്ടവരോ പ്രതികരിച്ചില്ലെന്നും കുഴല്നാടന് പറഞ്ഞു. പിവി എന്നത് മുഖ്യമന്ത്രി പിണറായി വിജയന് തന്നെയാണെന്ന് തങ്ങള് തെളിയിക്കുമെന്നും കുഴല്നാടന് പറഞ്ഞു.
പിവി എന്ന പരാമര്ശം തന്നെക്കുറിച്ചല്ലെന്ന് പറഞ്ഞാണ് മുഖ്യമന്ത്രി മറുപടി തരാതിരുന്നതെന്നും ഇനി നിയമപോരാട്ടം ആരംഭിക്കുകയാണെന്നും കുഴല്നാടന് മാധ്യമങ്ങളോട് പറഞ്ഞു. ഔദ്യോഗിക പരാതിയും തെളിവിനായി ബന്ധപ്പെട്ട രേഖകളും വിജിലന്സ് ഡയറക്ടര്ക്ക് കൈമാറിയിട്ടുണ്ട്. തന്റെ നിയമപോരാട്ടത്തിന് പാര്ട്ടിയുടെ അനുമതിയും പിന്തുണയും ഉണ്ടെന്നും മാത്യു കുഴല്നാടന് കൂട്ടിച്ചേര്ത്തു.
