ന്യൂഡല്‍ഹി: തിന്മയ്ക്കെതിരെയുള്ള നന്മയുടെ വിജയമാണ് വിജയദശമിയായി രാജ്യം ആഘോഷിക്കുന്നതെന്ന് പ്രതിരോധമന്ത്രി രാജ്നാഥ് സിങ്. ചൈന അതിര്‍ത്തിക്ക് സമീപം ഇന്ത്യയുടെ തന്ത്രപ്രധാന മേഖലയായ തവാങ്ങില്‍ സൈനികര്‍ക്കൊപ്പം ആയുധ പൂജ നടത്തിയ ശേഷം വിജയദശമിയുടെ പ്രാധാന്യം വിവരിക്കുകയായിരുന്നു പ്രതിരോധ മന്ത്രി. കരസേന മേധാവി ജനറല്‍ മനോജ് പാണ്ഡെ രാജ്നാഥ് സിങ്ങിനെ അനുഗമിച്ചു.
സൈനികരുമായി ആശയവിനിമയം നടത്തിയ രാജ്നാഥ് സിങ് നിലവിലെ ആഗോള സാഹചര്യത്തില്‍ രാജ്യത്തിന്റെ സുരക്ഷാ സംവിധാനങ്ങള്‍ ശക്തിപ്പെടുത്തുന്നതില്‍ ഒരു വീട്ടുവീഴ്ചയ്ക്കും തയ്യാറല്ലെന്നും ചൂണ്ടിക്കാട്ടി. പ്രതിരോധ സാമഗ്രികള്‍ തദ്ദേശീയമായി നിര്‍മ്മിച്ച് സൈന്യത്തിന്റെ കരുത്ത് വര്‍ധിപ്പിക്കാന്‍ എല്ലാവിധ ശ്രമങ്ങളും നടത്തിവരുന്നതായും അദ്ദേഹം അറിയിച്ചു. അചഞ്ചലമായ പ്രതിബദ്ധതയും സമാനതകളില്ലാത്ത ധൈര്യവും പ്രകടിപ്പിച്ച് അതിര്‍ത്തി കാത്ത് സംരക്ഷിക്കുന്ന സൈന്യത്തെ രാജ്നാഥ് സിങ് അഭിനന്ദിച്ചു.
ബം- ലാ പാസും മറ്റു ഫോര്‍വേര്‍ഡ് പോസ്റ്റുകളും സന്ദര്‍ശിച്ച ശേഷമായിരുന്നു സൈനികരുമായുള്ള ആശയവിനിമയം. കിഴക്കന്‍ ലഡാക്കില്‍ കഴിഞ്ഞ മൂന്ന് വര്‍ഷമായി ചൈനയുമായി നിലനില്‍ക്കുന്ന സംഘര്‍ഷങ്ങളുടെ പശ്ചാത്തലത്തിലാണ് രാജ്നാഥ് സിങ്ങിന്റെ തവാങ് സന്ദര്‍ശനം. തവാങ് യുദ്ധ സ്മാരകത്തില്‍ രാജ്നാഥ് സിംഗ് പുഷ്പാര്‍ച്ചനയും നടത്തി. അസമിലും അരുണാചലിലുമായി രണ്ടു ദിവസത്തെ സന്ദര്‍ശനത്തിന് രാജ്നാഥ് സിങ് തിങ്കളാഴ്ചയാണ് തുടക്കമിട്ടത്. ഇന്ത്യ- ചൈന അതിര്‍ത്തി തര്‍ക്കം പ്രദേശത്ത് കഴിഞ്ഞ മൂന്നു വര്‍ഷങ്ങളായി രൂക്ഷമാണ്. 3500 കിലോമീറ്റര്‍ ദൂരമുള്ള അതിര്‍ത്തിയില്‍ ഇന്ത്യ സൈനിക സംഘത്തെ വിന്യസിച്ചിട്ടുണ്ട്.
