ഹൂസ്റ്റണ്‍: ഇന്ത്യന്‍ ക്രിസ്ത്യന്‍ എക്യൂമെനിക്കല്‍ കമ്മ്യൂണിറ്റി ഓഫ് ഹൂസ്റ്റണിന്റെ (ഐസിഇസിഎച്ച്) ആഭിമുഖ്യത്തില്‍ നടത്തുന്ന ‘ആത്മസംഗീതം’ സംഗീത സന്ധ്യയുടെ ടിക്കറ്റ് കിക്ക് ഓഫ് നടന്നു. ഹൂസ്റ്റണ്‍ നഗരത്തിലെ ഇരുപതു ഇടവകകളുടെ പൂര്‍ണ സഹകരണത്തില്‍ ഈ മാസം 28 ന് ശനിയാഴ്ച വൈകിട്ട് 6 മണിക്ക് ഹൂസ്റ്റന്‍ സെന്റ് തോമസ് കത്തീഡ്രല്‍ ഓഡിറ്റോറിയത്തില്‍ വച്ചാണ് ആത്മീയ സംഗീത സന്ധ്യ നടത്തപ്പെടുന്നത്.
ഈ മാസം 1 ന് ഞായറാഴ്ച രാവിലെ സെന്റ് പീറ്റഴ്‌സ് ആന്‍ഡ് സെന്റ് പോള്‍സ് ഓര്‍ത്തഡോക്‌സ് ചര്‍ച്ച് ഓഫ് ഹൂസ്റ്റനില്‍ വി. കുര്‍ബാനയ്ക്കുശേഷം നടന്ന പ്രത്യേക ചടങ്ങില്‍ വച്ച് ഐസിഇസിഎച്ച് എക്സിക്യൂട്ടീവ് അംഗങ്ങളും പ്രസ്തുത പരിപാടിയുടെ സ്‌പോണ്‍സര്‍മാരും ചേര്‍ന്ന് ഇടവക മാനേജിങ് കമ്മിറ്റിയുടെയും ഇടവക അംഗങ്ങളുടെയും സഹകരണത്തില്‍ ഐസിഇസിഎച്ച് പ്രസിഡണ്ട് റവ ഫാ. ഡോ. ഐസക് ബി. പ്രകാശ് ടിക്കറ്റ് സെയില്‍ ഉദ്ഘാടനം നിര്‍വഹിച്ചു.
പ്രധാന സ്‌പോണ്‍സര്‍മാരായ രെഞ്ചു രാജ്, തോമസ് മാത്യു, ഐസിഇസിഎച്ച് സെക്രട്ടറി റെജി ജോര്‍ജ്, പിആര്‍ഓ ജോണ്‍സണ്‍ ഉമ്മന്‍, ബിജു ചാലക്കല്‍, ഷീജ ബെന്നി തുടങ്ങിയവരും സന്നിഹിതരായിരുന്നു. ക്രൈസ്തവ സംഗീത മേഖലയിലെ പ്രശസ്ത ഗായകരായ റോയ് പുത്തൂര്‍, സുധീപ് കുമാര്‍, ലിബിന്‍ സ്‌കറിയ, കുമാരി ശ്രേയ എന്നിവരടങ്ങുന്ന ഒന്‍പതംഗ സംഘം ആത്മീയ സംഗീത പരിപാടിക്കു നേതൃത്വം നല്‍കും. എല്ലാവരെയും സംഗീത പരിപാടിയിലേക്കു സ്വാഗതം ചെയ്യുന്നുവെന്നു ഭാരവാഹികള്‍ അറിയിച്ചു. പ്രവേശന ടിക്കറ്റുകള്‍ ഐസിഇസിഎച്ച് അംഗത്വ ഇടവകകളുടെ ഭാരവാഹികള്‍ മുഖേന ലഭ്യമാണ്.
