കാലിഫോര്ണിയ: കുട്ടികള് വളരെ ഇഷ്ടമുള്ള ചീറ്റോസും ഡോറിറ്റോസും അടക്കം ചില ലഘുഭക്ഷണങ്ങള് കാലിഫോര്ണിയയിലെ പൊതുവിദ്യാലയങ്ങളില് നിന്ന് ഉടന് നിരോധിക്കപ്പെട്ടേക്കാമെന്ന് റിപ്പോര്ട്ട്. അമേരിക്കയില് വലിയ തോതില് വിറ്റുപോകുന്നതും കുട്ടികളുടെ ഇഷ്ട സ്നാക്സ് എന്ന നിലയിലും പേരെടുത്ത ചില ലഘു പാക്കറ്റ് ഭക്ഷണങ്ങള് ആരോഗ്യത്തിന് ദോഷം ചെയ്യുമെന്നാണ് കണ്ടെത്തല്.
ഇത് സംബന്ധിച്ച പുതിയ ബില് അനുസരിച്ച് കൃത്രിമ രാസവസ്തുക്കളും നിറങ്ങളും ഉള്പ്പെടുന്ന ഭക്ഷണങ്ങളും നിരോധനത്തിന്റെ വക്കിലാണ്. പ്രത്യേകിച്ച് സ്കൂളുകളില് നിന്നും ഇത്തരം ഇനങ്ങള് ഒഴിവാക്കുന്നതിന് ലക്ഷ്യമിട്ടുള്ള നിര്ദ്ദിഷ്ട ബില് അനുസരിച്ച് Flamin’ Hot Cheetos, Doritos, Taksi എന്നിവയ്ക്ക് സംസ്ഥാന വ്യാപകമായി നിരോധനം ഏര്പ്പെടുത്തിയേക്കാം.
സിബിഎസ് ന്യൂസ് റിപ്പോര്ട്ട് ചെയ്യുന്നതിനുസരിച്ച് ബില് നിയമമായാല്, ‘ചുവപ്പ് 40, മഞ്ഞ 5, മഞ്ഞ 6, നീല 1, നീല 2, പച്ച 3’ എന്നിവയുള്പ്പെടെ ആറ് സിന്തറ്റിക് ഫുഡ് കളറുകള് അടങ്ങിയ ഭക്ഷണങ്ങള് വില്ക്കുന്നതില് നിന്ന് സ്കൂളുകളെ വിലക്കും. കൂടാതെ, ടൈറ്റാനിയം ഡയോക്സൈഡ് എന്നറിയപ്പെടുന്ന സൗന്ദര്യവര്ദ്ധക വസ്തുക്കളിലും പെയിന്റുകളിലും സാധാരണയായി ഉപയോഗിക്കുന്ന ഒരു കളറിംഗ് ഏജന്റും നിരോധിക്കപ്പെടും. ഫ്രൂട്ടി പെബിള്സ്, ഫ്രൂട്ട് ലൂപ്പുകള് തുടങ്ങിയ ധാന്യങ്ങളിലും അതുപോലെ ഫ്ലമിന് ഹോട്ട് ചീറ്റോകളിലും ഡോറിറ്റോസ് പോലുള്ള ചിപ്സുകളിലും ആരോഗ്യത്തിന് ദോഷമായ ഇത്തരം നിറങ്ങളുണ്ടെന്നും കണ്ടെത്തലുണ്ട്.
