ന്യൂയോര്‍ക്ക്: മാര്‍ത്തോമ്മാ സഭയുടെ വടക്കേ അമേരിക്കന്‍ ഭദ്രാസനം ഇദംപ്രഥമമായി നടത്തുന്ന ക്രിസ്മസ് വിളംബര ഗാനസന്ധ്യയായ ‘ഹെവന്‍ലി ട്രമ്പറ്റ്’ അഥവാ ‘സ്വര്‍ഗ്ഗീയ കാഹളം’ എന്ന ക്രിസ്മസ് ഗാനസന്ധ്യ നവംബര്‍ 30 ന്. വൈകുന്നേരം നാലു മണിക്ക് എല്‍മോണ്ടിലുള്ള സിറോ മലങ്കര കത്തോലിക്ക എപ്പാര്‍ക്കി ആഡിറ്റോറിയത്തില്‍ (1510 DePaul Street, Elmont, NY 11003) വെച്ചാണ് പരിപാടി നടത്തപ്പെടുന്നത്.
ഭദ്രാസനാധ്യക്ഷന്‍ ഡോ. ഏബ്രഹാം മാര്‍ പൗലോസ് എപ്പിസ്‌കോപ്പ ഉദ്ഘാടനം നിര്‍വ്വഹിക്കും. മുഖ്യാതിഥി മലങ്കര കാത്തോലിക്ക സഭയുടെ യു.എസ്.എ-കാനഡ രൂപതാധ്യക്ഷന്‍ ഡോ. ഫിലിപ്പോസ് മാര്‍ സ്‌തെഫനോസ് ക്രിസ്മസ് ദൂത് നല്‍കും.
ഹെവന്‍ലി ട്രമ്പറ്റിലൂടെ ക്രിസ്മസ് ആഘോഷങ്ങള്‍ക്ക് തിരശ്ശീല ഉയര്‍ത്തുന്ന ഈ രാവില്‍ 140-അംഗ ഗായക സംഘത്തോടൊപ്പം 50-തോളം കുരുന്നുകളെ ഉള്‍പ്പെടുത്തിയുള്ള ജൂനിയര്‍ കൊയറും ഗാനങ്ങള്‍ ആലപിക്കുന്നു. ക്രിസ്തുവിന്റെ തിരുജനനത്തെ ആവിഷ്‌ക്കരിക്കുന്ന സ്റ്റേജ് ഷോയും പരിപാടിയെ വര്‍ണ്ണാഭമാക്കും.
അമേരിക്കയുടെ വടക്ക് കിഴക്കന്‍ മേഖലയിലുള്ള ഇടവകകളുടെ കൂട്ടായ്മയായ മാര്‍ത്തോമ്മ നോര്‍ത്ത് ഈസ്റ്റ് ആര്‍എസി-യുടെയും (Northeast RAC) നോര്‍ത്ത് ഈസ്റ്റ് റീജന്‍ ഡി. എസ്സ്. എം. സി. യുടെയും (DSMC) സഹകരണത്തോടെയാണ് ഈ പരിപാടി ക്രമീകരിക്കുന്നത്. ആര്‍.എ.സിയുടെ കമ്മിറ്റിയും ഭദ്രാസനത്തിലെ വടക്കുകിഴക്കന്‍ മേഖലയിലുള്ള സംഘടനകളുടെ ചുമതലക്കാരുമുള്‍പ്പെട്ട കമ്മിറ്റി പരിപാടിയുടെ വിജയത്തിനായി പ്രവര്‍ത്തിക്കുന്നു.
