അനിൽ ആറന്മുള
ഹ്യൂസ്റ്റൺ: ഹ്യൂസ്റ്റണിലെ ആദ്യകാല ദേവാലയങ്ങളിൽ ഒന്നായ സെൻ്റ് തോമസ് ഓർത്തഡോക്സ് കത്തീഡ്രൽ സുവർണ ജൂബിലി നിറവിൽ. 1974 ൽ സ്ഥാപിതമായ ഈ കത്തീഡ്രലിൽ ജൂബിലിയോട് അനുബന്ധിച്ച് ഒരുവർഷത്തെ ആഘോഷപരിപാടികൾ നടത്തി. അതിന്റെ സമാപന ചടങ്ങുകൾ സെപ്റ്റംബർ 18 മുതൽ 22 വരെ നടക്കുമെന്ന് വാർത്താ സമ്മേളനത്തിൽ ഇടവക വികാരി ഫാ. പി.എം ചെറിയാൻ അറിയിച്ചു.
ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കത്തോലിക്കാ ബാവാ സുവർണ ജൂബിലി ആഘോഷ സമാപന പരിപാടികൾക്ക് നേതൃത്വം നൽകും. സെപ്റ്റംബർ 18 നു ഹൂസ്റ്റണിൽ എത്തുന്ന പരിശുദ്ധ കത്തോലിക്കാ ബാവയെ സ്വീകരിക്കുന്നതിനു വൻ ഒരുക്കങ്ങളാണ് നടക്കുന്നത്. അദ്ദേഹം കാർമികത്വം വഹിക്കുന്ന പരിശുദ്ധ കുർബാനയോടെ ആയിരിക്കും ജൂബിലി ആഘോഷ ചടങ്ങുകൾ അവസാനിക്കുക. കുർബാനയിൽ ആയിരത്തിൽ അധികം വിശ്വാസികൾ പങ്കെടുക്കും. സെപ്റ്റംബർ ഒന്നിന് സ്റ്റാഫോർഡ് സിവിക് സെന്ററിൽ ഇടവകാംഗങ്ങൾ അവതരിപ്പിക്കുന്ന എക്സ്ട്രാവഗൻസാ ടാലന്റ് ഷോയോടെ ആയിരിക്കും സമാപന ചടങ്ങുകളുടെ തുടങ്ങുക.
ഹ്യൂസ്റ്റണിലെയും പ്രാന്തപ്രദേശങ്ങളിലെയും ജീവിതം വഴിമുട്ടി നിൽക്കുന്നവരും നിർധനരുമായ ആളുകളെ കൈപിടിച്ചു കയറ്റാനായി ഒരുലക്ഷം ഡോളറിന്റെ ധനസഹായമാണ് ഇടവക നൽകുക. ഏതാണ്ട് എണ്പത്തിനായിരത്തോളം അപേക്ഷകൾ ലഭിച്ചതിൽ നിന്ന് അർഹരായ പതിനായിരം പേർക്ക് ആയിരിക്കും ആദ്യമായി സഹായം നൽകുക. അതിൽ വീടില്ലാത്തവരും, ആഹാരത്തിനു ബുദ്ധിമുട്ടുന്നവരും പഠനം നടത്താൻ സഹായം തേടുന്ന വിദ്യാർഥികളും ഒക്കെയുള്ള ഒരു നീണ്ട നിരതന്നെയുണ്ട്. ഒപ്പം കേരളത്തിൽ വീട് വക്കാനും വിവാഹം നടത്താനും കുട്ടികളുടെ പഠനത്തിനും വയനാട്ടിലെ പ്രകൃതി ദുരന്തത്തിൽ എല്ലാം നഷ്ടപ്പെട്ടവരെയും ചേർത്തു പിടിക്കാനും ഇവർ മറക്കുന്നില്ല.
ഹ്യൂസ്റ്റൺ സെന്റ് തോമസ് ദേവാലയത്തിൻറെ ചരിത്രം ഓർമിപ്പിക്കുന്ന ഹൃദയ സ്പർശിയായ ഒരു ഡോക്യൂമെന്ററിയും കോശി പി ജോണിന്റെ നേതൃത്വത്തിൽ ത യ്യാറാക്കുന്നുണ്ട്. ഈ ഇടവകക്ക് രുപം നൽകിയവരെയും ഇവിടെ നിന്ന് സ്ഥലം മാറി പോയവരെയും ഒരുമിച്ചു കൂട്ടുന്ന ഒരു ചടങ്ങും ജൂബിലിയുടെ ഭാഗമായി നടക്കുന്നുണ്ട്. പരിസരങ്ങളിലുള്ള മറ്റു ദേവാലയങ്ങളിലെ പുരോഹിതർ ഉൾപ്പടെയുള്ളവരും ചടങ്ങുകളിൽ പങ്കെടുപ്പിക്കുന്നുണ്ട്.
സെപ്തംബർ 21 നു ഹ്യൂസ്റ്റൺ പൊതുസമൂഹത്തെ ആദരിച്ചുകൊണ്ടു ജനപ്രതിനിധികളും മറ്റു പ്രമുഖരും പങ്കെടുക്കുന്ന പൊതു സമ്മേളനം നടക്കും. സെപ്റ്റംബർ 22 നു സ്റ്റാഫോർഡ് സിറ്റിയുടെ പ്രത്യേക പ്രൊക്ലമേഷൻ ഉണ്ടാവുമെന്ന് മാധ്യമപ്രവർത്തകരുടെ ചോദ്യത്തിന് മറുപടിയായി മേയർ കെൻ മാത്യു പറഞ്ഞു.
സ്റ്റാഫോർഡ് സെന്റ് തോമസ് കത്തീഡ്രൽ അങ്കണത്തിലെ മീഡിയ റൂമിൽ ഇന്നലെ വിളിച്ചു ചേർത്ത പത്രസമ്മേളനത്തിൽ ഇടവക വികാരിയും പ്രസിഡന്റുമായ ഫാ. പി എം ചെറിയാൻ ആണ് വിവരങ്ങൾ വിശദീകരിച്ചത്. സഹ വികാരിമാരായ ഫാ. രാജേഷ് കെ ജോൺ, ഫാ.ക്രിസ്റ്റഫർ മാത്യു, ഇടവകാംഗം കൂടിയായ സ്റ്റാഫോർഡ് മേയർ കെൻ മാത്യു, ജൂബിലി ആഘോഷങ്ങൾക്ക് ചുക്കാൻ പിടിക്കുന്ന കൺവീനർ മനോജ് മാത്യു, പാരിഷ് സെക്രട്ടറി ജിനു തോമസ്, മാർക്കറ്റിംഗ് പബ്ലിസിറ്റി കമ്മിറ്റി ചെയർ ചാക്കോ പി തോമസ്, സുവനീർ കമ്മിറ്റി ജേക്കബ് കുരുവിള, കോശി പി ജോൺ, ചാരിറ്റി കമ്മിറ്റി ചെയർഎൽസി എബ്രഹാം, കൾച്ചറൽ പ്രോഗ്രാം ചെയർ സിബു വർഗീസ്, ഫുഡ് കമ്മിറ്റി ചെയർ പോൾ വർഗീസ്, പ്രോഗ്രാം കമ്മറ്റി ചെയർ ജോൺസി വർഗീസ്, റിസെപ്ഷൻ കമ്മിറ്റി ചെയർ ഡാർലി ജോർജ്, സ്പോർട്സ് കമ്മിറ്റി ചെയർ സെബി എബ്രഹാം തുടങ്ങി നിരവധി അംഗങ്ങൾ പത്രസമ്മേളനത്തിൽ പങ്കെടുത്തു.
എല്ലാംകൊണ്ടും ചരിത്രത്തിൽ ഇടംപിടിക്കുന്നു വേറിട്ട അനുഭവമായിരിക്കും സ്റ്റാഫോർഡിന്റെ ഹൃദയത്തിൽ തലയുയർത്തി നിൽക്കുന്ന സെന്റ് തോമസ് ഇന്ത്യൻ ഓർത്തഡോക്സ് കത്തീഡ്രലിന്റെ അൻപതാം പിറന്നാൾ ആഘോഷം.
Golden Jubilee celebration At Houston St. Thomas Orthodox Cathedral
