ഇന്ത്യയെ തകർക്കുമെന്ന് വീണ്ടും ഭീഷണി മുഴക്കി സിഖ് വിഘടനവാദി നേതാവ് ഗുർപട്വന്ത് സിങ് പന്നൂൻ. ഇന്ത്യയുടെ തീവ്രവാദ പട്ടികയിലുള്ള പന്നൂൻ സിഖ് ഫോർ ജസ്റ്റിസ്( SFJ) എന്ന നിരോധിത സംഘടനയുടെ നേതാവാണ്. ഇന്ത്യയുടെ പരമാധികാരത്തിനെതിരെ ഭീഷണി മുഴക്കിയ പന്നൂൻ ഇന്ത്യൻ യൂണിയനെ പലതായി വെട്ടിമുറിച്ച് വിഭജിച്ച് ഇന്ത്യയെ ഭൂപടത്തിൽ നിന്നു തന്നെ തുടച്ചു നീക്കുമെന്നും പഞ്ചാബിനു പുറമെ മറ്റു സംസ്ഥാനങ്ങളിലും ഇന്ത്യക്ക് എതിരെ പുതിയ മുന്നേറ്റങ്ങൾ ആരംഭിക്കുമെന്നും ഭീഷണി വിഡിയോയിൽ അവകാശപ്പെട്ടു. യുഎസിലെ ന്യൂയോർക്കിൽ അഭിഭാഷകനായ പന്നൂൻ യുഎസ് – കാനേഡിയൻ പൌരനാണ്.
“SFJ 2024 ONE India To 2047 NONE India,” 2024 ലെ ഇന്ത്യ 2047 ൽ എത്തുമ്പോൾ ഇല്ലാതാകും അതാണ് സിഖ് ഫോർ ജസ്റ്റിസിൻ്റെ ലക്ഷ്യം എന്നാണ് പന്നൂൻ്റെ വിഡിയോ സന്ദേശം. കാനഡയുടെ വിദേശകാര്യ ഉപമന്ത്രി ഡേവിഡ് മോറിസണുള്ള മറുപടിയായാണ് പന്നൂൻ്റെ പ്രതികരണം. “ഇന്ത്യയുടെ സമഗ്രതയെയും പരമാധികാരത്തേയും മാനിക്കണമെന്നാണ് കാനഡയുടെ നയംഎന്ന് കഴിഞ്ഞ ദിവസം മോറിസൺ വ്യക്തമാക്കിയിരുന്നു. ഒറ്റ ഇന്ത്യയേയുള്ളു അത് എന്നും അങ്ങനെ തന്നെയായിരിക്കും എന്ന് മോറിസണ വ്യക്തമാക്കിയിരുന്നു.
പഞ്ചാബികൾ പോലും ഉപേക്ഷിച്ച ഖലിസ്ഥാൻ എന്ന ആശയവും ലക്ഷ്യവുമായി മുന്നോട്ടുപോകുന്ന പന്നൂൻ്റെ SFJ മണിപ്പൂരിലും ജമ്മുകശ്മിരിലും അസാമിലും നാഗലാൻഡിലും വിഘടനവാദ പ്രസ്ഥാനങ്ങൾ ആരംഭിക്കുമെന്ന് മുന്നറിയിപ്പ് നൽകുന്നു.
ചൈനീസ് പ്രസിഡൻ്റ് ഷി ജിൻപിങ്ങിനെ വിഡിയോയിൽ അഭിസംബോധന ചെയ്യുന്നുണ്ട്, “ഇപ്പോൾ അരുണാചൽ പ്രദേശ് തിരികെ പിടിക്കാൻ ചൈനീസ് സൈന്യത്തോട് ആവശ്യപ്പെടേണ്ട സമയമാണ്” എന്നും “അരുണാചൽ പ്രദേശ് ചൈനയുടെ പ്രദേശമാണ്” എന്നും തെറ്റായ അവകാശവാദം ഉന്നയിക്കുകയും ചെയ്യുന്നുണ്ട്.
ഇന്ത്യൻ യൂണിയനെ ശിഥിലമാക്കാനുമുള്ള പ്രസ്ഥാനങ്ങൾക്കായി പ്രചാരണം നടത്താൻ കനേഡിയൻ, അമേരിക്കൻ നിയമങ്ങളുടെ സംരക്ഷണവും പിന്തുണയും എസ്എഫ്‌ജെ ഉപയോഗിക്കുന്നത് തുടരുമെന്നും,” 2047 NONE India” എന്ന വാചകമുള്ള ഒരു പോസ്റ്ററിന് മുന്നിൽ ഇരുന്നാണ് പന്നൂൻ ഭീഷണിപ്പെടുത്തുന്നത്. ഇടി മിന്നലോടെയാണ് വിഡിയോ അവസാനിക്കുന്നത്.
ഇതേ പന്നൂനെ വധിക്കാൻ ഇന്ത്യ ഗൂഡാലോചന നടത്തിയെന്നും വാടക കൊലയാളിയെ ഏർപ്പെടുത്തിയെന്നും ആരോപിച്ച് അമേരിക്കൻ കോടതിയിൽ ഇന്ത്യയ്ക്ക് എതിരെ കേസ് നടത്തുന്നുണ്ട്. ഇന്ത്യ – യുഎസ് നയതന്ത്ര ബന്ധങ്ങളിൽ അസ്വാരസ്യമുണ്ടായത് ഈ വിഷയത്തെ തുടർന്നായിരുന്നു.
Gurpatwant Singh Pannun Threatens to balkanize India from US
