യുഎസിലെ ഇന്ത്യൻ ദമ്പതികൾക്ക് വിവാഹ രജിസ്ട്രേഷന് ഓൺലൈനിൽ ഹാജരാകാം: ഡൽഹി ഹൈക്കോടതി

ന്യൂഡൽഹി: യുഎസിൽ താമസിക്കുന്ന ഇന്ത്യൻ ദമ്പതികൾക്ക് തങ്ങളുടെ വിവാഹം രജിസ്റ്റർ ചെയ്യുന്നതിനായി ന്യൂഡൽഹിയിലെ രജിസ്‌ട്രേഷൻ അതോറിറ്റിക്ക് മുന്നിൽ വീഡിയോ കോൺഫറൻസിങ് വഴി ഹാജരാകാൻ ഡൽഹി ഹൈക്കോടതി അനുമതി നൽകി.

സ്ത്രീയും പുരുഷനും സാൻ ഫ്രാൻസിസ്കോയിലുള്ള കോൺസുലേറ്റ് ജനറലിന് മുന്നിൽ ഹാജരാകാനും അവിടെ നിന്ന് വീഡിയോ കോൺഫറൻസിൽ പങ്കെടുക്കാനും ജസ്റ്റിസ് സുബ്രമണ്യം നിർദ്ദേശം നൽകി

“വിവാഹ രജിസ്ട്രേഷനായി വീഡിയോ കോൺഫറൻസിംഗിലൂടെ പങ്കെടുക്കാൻ അപേക്ഷകരെ അനുവദിക്കാൻ ഇന്ത്യൻ കോൺസുലേറ്റ് ജനറൽ, സാൻ ഫ്രാൻസിസ്കോ, കാലിഫോർണിയയോട് അഭ്യർത്ഥിക്കുന്നു,” ഹൈക്കോടതി പറഞ്ഞു.

2022 മെയ് 10 ന് ഗാസിയാബാദിലെ കൗശാമ്പിയിലെ ഒരു ഹോട്ടലിൽ വച്ച് ഹിന്ദു ആചാരം അനുസരിച്ച് വിവാഹിതരാകുകയും ഉദ്യോഗത്തിനായി യുഎസിലേക്ക് പോകുകയും ചെയ്ത ദമ്പതികൾ സമർപ്പിച്ച ഹർജിയിലാണ് കോടതി വിധി. എച്ച് 1 ബി (തൊഴിൽ) വിസയിൽ താമസിച്ചിരുന്ന യുവതിക്ക് ഈ വർഷം ജനുവരിയിൽ കൂട്ട പിരിച്ചുവിടലിനിടെ ജോലി നഷ്‌ടപ്പെട്ടതായും ഹർജിയിൽ പറയുന്നു.

യുഎസിൽ തുടർന്നും താമസിക്കണമെങ്കിൽ വിവാഹ രജിസ്ട്രേഷൻ സർട്ടിഫിക്കറ്റ് ആവശ്യമുള്ള ആശ്രിത വിസ ലഭിക്കേണ്ടതുണ്ടെന്നും ഹർജിയിൽ പറയുന്നു.

വിവാഹ രജിസ്ട്രേഷനായി ബന്ധപ്പെട്ട അധികാരികൾക്ക് മുമ്പാകെ ഹാജരാകാൻ ദമ്പതികളെ അനുവദിച്ചുകൊണ്ട് ഹൈക്കോടതി പുറപ്പെടുവിച്ച മുൻ ഉത്തരവിനെയാണ് ഹർജിക്കാർ ആശ്രയിച്ചത്.

“ഇപ്പോഴത്തെ റിട്ട് ഹർജി തീർപ്പാക്കാനും ഹർജിക്കാർക്ക് അവരുടെ വിവാഹം രജിസ്റ്റർ ചെയ്യുന്നതിനായി വീഡിയോ കോൺഫറൻസിംഗ് വഴി രജിസ്ട്രേഷൻ അതോറിറ്റിക്ക് മുന്നിൽ ഹാജരാകാനും ഈ കോടതി അനുവദിക്കുന്നു,” ഹർജി തീർപ്പാക്കിക്കൊണ്ട് കോടതി പറഞ്ഞു.

AI സാങ്കേതിക വിദ്യയുടെ പുരോഗതി കണക്കിലെടുത്ത് ആരെങ്കിലും ഹരജിക്കാരായി ആൾമാറാട്ടം നടത്താനുള്ള സാധ്യത തള്ളിക്കളയാനാവില്ലെന്നും ഇതൊഴിവാക്കാൻ സാൻഫ്രാൻസിസ്കോയിലെ ഇന്ത്യൻ കോൺസുലേറ്റ് ജനറലിനു മുന്നിൽ ഹാജരായി അവിടെ നിന്ന് വീഡിയോ കോൺഫറൻസിൽ പങ്കെടുക്കാൻ നിർദേശിക്കണമെന്നും ഡൽഹി സർക്കാരിൻ്റെ അഭിഭാഷകൻ വാദിച്ചു.

More Stories from this section

dental-431-x-127
witywide