പി.പി ചെറിയാന്‍
ഹൂസ്റ്റണ്‍: കോണ്‍ഗ്രസ് പാര്‍ട്ടി കേരളത്തില്‍ തിരിച്ചുവരവിന്റെ പാതയിലാണെന്നും കോളജുകളില്‍ കെഎസ്‌യു നേടിയ വിജയങ്ങള്‍ താന്‍ നല്‍കിയ സംരക്ഷണത്തിന്റെ ബലത്തിലാണെന്നും നേതാക്കന്‍മാര്‍ ആത്മാര്‍ഥമായി പ്രവര്‍ത്തിച്ചാല്‍ കേരളത്തില്‍ കോണ്‍ഗ്രസ് മാത്രമേ കാണൂകയുള്ളൂവെന്നും കെപിസിസി അധ്യക്ഷന്‍ കെ. സുധാകരന്‍ പറഞ്ഞു.
ഹൃസ്വ സന്ദര്‍ശനാര്‍ത്ഥം അമേരിക്കയില്‍ എത്തിയ കെപിസിസി പ്രസിഡണ്ട് കെ.സുധാകരന്‍ എംപിക്ക് ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ് (ഒഐസിസിയുഎസ്എ) ഹൂസ്റ്റണ്‍ ഡാളസ് ചാപ്റ്ററുകളുടെ ആഭിമുഖ്യത്തില്‍ ആവേശോജ്വല സ്വീകരണം നല്‍കി. ചെണ്ടമേളത്തിന്റെയും താലപ്പൊലിയുടെയും അകമ്പടിയോടെ സെന്റ് തോമസ് കത്തീഡ്രല്‍ ദേവാലയഹാളിലേക്ക് പ്രവേശിച്ച നേതാവിന് ഹൂസ്റ്റണില്‍ നല്‍കിയ സ്വീകരണം അക്ഷരാര്‍ത്ഥത്തില്‍ വേറിട്ട കാഴ്ചകയായി.
ജനുവരി 20 ശനിയഴ്ച വൈകുന്നേരം 6 മണിയോടു കൂടി ഇന്ത്യന്‍ നാഷണല്‍ കോണ്‍ഗ്രസ് നേതാവിനെ കാണാന്‍ ദേവാലയ പരിസരത്തേക്ക് നൂറു കണക്കിനാളുകള്‍ ഒഴുകിയെത്തി. ചെണ്ടമേളത്തിന്റെയും താലപ്പൊലിയുടെയും അകമ്പടിയോടെ ഹാളിനുള്ളിലേക്ക് പ്രവേശിച്ച കെ സുധാകരനെ പുഷ്പവൃഷ്ടി കൊണ്ടാണ് സദസ്സ് എതിരേറ്റത്. ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ് (ഒഐസിസിയുഎസ്എ) ഹൂസ്റ്റണ്‍ ഡാളസ് ചാപ്റ്ററുകളുടെ ആഭിമുഖ്യത്തില്‍ നടന്ന ചടങ്ങു വൈവിധ്യമാര്‍ന്ന പരിപാടികള്‍ കൊണ്ട് വര്‍ണ്ണാഭമായി.
കലാപരിപടികളോടെ ആരംഭിച്ച സംഗമത്തില്‍ നൂപുര സ്‌കൂള്‍ ഓഫ് ഡാന്‍സിലെ നേസ, ആഞ്ജലീന, ഇസബെല്‍ എന്നിവരവതരിപ്പിച്ച ഭരതനാട്യം നയനമനോഹരമായിരുന്നു. ഹൂസ്റ്റണിലെ സുപ്രസിദ്ധ ഗായകരായ ഷിനു, റോഷി സി മാലേത്ത് എന്നിവരുടെ ശ്രുതിമധുര ഗാനങ്ങള്‍, നേസ ചാക്കോയുടെ മനോഹര നൃത്തം എന്നിവയോടെ കലാപരിപാടികള്‍ക്ക് സമാപനമായി. തുടര്‍ന്ന് ഒഐസിസി യുഎസ്എ ജനറല്‍ സെക്രട്ടറി ജീമോന്‍ റാന്നി എംസിയായ മഞ്ജു മേനോനെ വേദിയിയിലേക്കു ക്ഷണിച്ചു. ദേശഭക്തി ഗാനം വന്ദേ മാതരം, അമേരിക്കന്‍ ഇന്ത്യന്‍ ദേശീയ ഗാനങ്ങളോടെ പരിപാടികള്‍ക്ക് തുടക്കം കുറിച്ചു. ജുഅനിറ്റ ജോയ്, ജ്യോത്സ്‌ന ജോയ്, ക്രിസ്റ്റല്‍ റോസ് ജോസഫ്, ആനി ജോസ്, ഷീല ചെറു എന്നിവര്‍ നേതൃത്വം നല്‍കി.
ഒഐസിസി യൂഎസ്എ ജനറല്‍ സെക്രട്ടറി ജീമോന്‍ റാന്നി സമരാഗ്‌നി സംഗമത്തെ പറ്റി ആമുഖ പ്രസ്താവന നടത്തി. 2023 ഡിസംബര്‍ 31 നു കേരളത്തില്‍ നിന്നും ഒരു ചെറിയ കാറ്റായി തുടങ്ങി 2024 ന്റെ പുത്തന്‍ പുലരിയില്‍ ചരിത്ര പ്രസിദ്ധമായ ഷിക്കാഗൊ നഗരത്തില്‍ എത്തിയപ്പോള്‍ ഒരു ചുഴലിക്കാറ്റായി മാറി ന്യൂ ജേഴ്‌സി വഴി ഫ്ലോറിഡായില്‍ എത്തിയപ്പോള്‍ ഒരു കൊടുങ്കാറ്റായി മാറിയ കെ സുധാകരന്‍ എന്ന കരുത്തനായ നേതാവ് ഹൂസ്റ്റണ്‍ നഗരത്തില്‍ എത്തിയപ്പോള്‍ ശാന്തത കൈവന്നു എന്ന് കരുതിയാല്‍ അത് തെറ്റി. ഫെബ്രുവരി 7 മുതല്‍ കേരളത്തില്‍ ആരംഭിക്കുന്ന സമരാഗ്‌നി യാത്രയുടെ അഗ്‌നി ജ്വാല കത്തിക്കുവാനാണ് പ്രസിഡണ്ട് ഇവിടെ എത്തിയിരിക്കുന്നത് എന്ന സൂചനയോടൊപ്പം ഒഐസിസിയൂഎസ്എ സംഘടിപ്പിച്ച നിരവധി സമ്മേളനങ്ങളേയും കെപിസിസി പ്രസിഡണ്ട് പുതുതായി പ്രഖ്യാപിച്ച ന്യൂജേര്‍സി, ന്യൂയോര്‍ക്, പെന്‍സില്‍വാനിയ, അരിസോണ, ഫ്‌ലോറിഡ, നോര്‍ത്ത് കരോലിന, സാന്‍ അന്റോണിയ ചാപ്റ്ററുകളെ പറ്റിയും ജീമോന്‍ പരാമര്‍ശിച്ചു.
നാഷണല്‍ പ്രസിഡണ്ട് ബേബി മണക്കുന്നേല്‍ അദ്ധ്യക്ഷത വഹിച്ച യോഗത്തില്‍ ഹൂസ്റ്റണ്‍ ചാപ്റ്റര്‍ പ്രസിഡണ്ട് വാവച്ചന്‍ മത്തായി സ്വാഗതം പറഞ്ഞു. അദ്ധ്യക്ഷ പ്രസംഗത്തില്‍ കെ സുധാകരന്‍ ചുമതലയേറ്റത്തിനുശേഷം കേരളത്തിലെ കോണ്‍ഗ്രെസ്സിനുണ്ടായ വിജയങ്ങളെ പറ്റി, യൂണിവേഴ്‌സിറ്റി തലങ്ങളില്‍ കെഎസ് യു നടത്തിയ തിരിച്ചു വരവിനെ പറ്റി ബേബി മണക്കുന്നേല്‍ പ്രതിപാദിച്ചു. തുടര്‍ന്ന് നാഷണല്‍ ചെയര്‍മാന്‍ ജെയിംസ് കൂടല്‍ നടത്തിയ പ്രസംഗത്തില്‍ ദുര്‍ഭരണത്തെ തൂത്തെറിയുന്ന അഗ്‌നിഗോളമായി മുന്നേറുകയാണ് കെ.സുധാകരന്‍ എന്ന് ആവേശം നിറഞ്ഞു നിന്ന പ്രസംഗത്തില്‍ ചൂണ്ടികാട്ടി.
അതിനു ശേഷം തുടര്‍ന്ന് കെ.സുധാകരന്‍ അമേരിക്കയിലെ തിരഞ്ഞെടുക്കപെട്ട പ്രതിനിധികളായ ഫോര്‍ട്ട് ബന്ദ് കൗണ്ടി ജഡ്ജ് കെ.പി.ജോര്‍ജ്., മിസോറി സിറ്റി മേയര്‍ റോബിന്‍ ഇലക്കാട്ടു, സ്റ്റാഫോര്‍ഡ് സിറ്റി മേയര്‍ കെന്‍ മാത്യു, ഫോര്‍ട്ട് ബെന്‍ഡ് 240 ഡിസ്ട്രിക്ട് ജഡ്ജ് സുരേന്ദ്രന്‍ കെ പട്ടേല്‍, ഫോര്‍ട്ട് ബെന്‍ഡ് കോര്‍ട്ട് ജഡ്ജ് ജൂലി മാത്യൂ എന്നിവരോടൊപ്പം നാഷണല്‍, റീജിയന്‍, ഹൂസ്റ്റണ്‍ – ഡാളസ് ചാപ്റ്റര്‍ എക്‌സിക്യൂട്ടീവ് അംഗങ്ങളുടെ സാന്നിധ്യത്തില്‍ നിലവിളക്കു കൊളുത്തി. തുടര്‍ന്ന് അമേരിക്കയിലെ തിരഞ്ഞെടുക്കപെട്ട നേതാക്കളെ പൊന്നാട നല്‍കി ആദരിച്ചു.
തുടര്‍ന്ന് മൂന്നു നാല് ദശകങ്ങള്‍ക്ക് മുന്‍പ് ഹൂസ്റ്റണില്‍ എത്തി കോണ്‍ഗ്രസ് പ്രസ്ഥാനത്തിന് ശക്തി പകര്‍ന്നു നല്‍കിയ പൊന്നു പിള്ള, എബ്രഹാം തോമസ് (അച്ചന്കുഞ്ഞു) തോമസ് വര്‍ക്കി (മൈസൂര്‍ തമ്പി) എന്നിവരെ പൊന്നാട നല്‍കി ആദരിച്ചു. ഏറ്റവും സീനിയറായ ജോര്‍ജ് എബ്രഹാമിന്റെ അഭാവത്തില്‍ അദ്ദേ ഹത്തിന്റെ വിലപ്പെട്ട സേവനങ്ങളെ എടുത്തു പറഞ്ഞു. ഒഐസിസിയുടെ ടെക്‌സസിലെ ഹൂസ്റ്റണ്‍, ഡാളസ് ചാപ്റ്ററുകള്‍ക്കു ശേഷം പുതുതായി രൂപം കൊള്ളുന്ന സാന്‍ അന്റോണിയോ ചാപ്റ്ററിന്റെ കെപിസിസി പ്രസിഡണ്ട് പ്രഖ്യാപിച്ചു. അതൊടൊപ്പം പ്രസിഡണ്റ്റായി നിയമിക്കപ്പെട്ട സ്റ്റീഫന്‍ മറ്റത്തിലിനെ കെപിസിസി പ്രസിഡണ്ട് പൊന്നാട നല്‍കി ആദരിച്ചു.
തുടര്‍ന്ന് ന്യൂജേര്‍സിയില്‍ നിന്നും എത്തിയ ഡബ്‌ളിയുഎംസി ഗ്ലോബല്‍ പ്രസിഡണ്ട് തോമസ് മൊട്ടക്കല്‍, ഒഐസിസി സതേണ്‍ റീജിയണല്‍ ജനറല്‍ സെക്രട്ടറി ജോമോന്‍ ഇടയാടി, സാമൂഹ്യ സാംസ്‌കാരിക സമുദായീക മാധ്യമ രംഗത്തെ പ്രമുഖരായ റവ. എ.വി.തോമസ്. റവ.കെ.ബി.കുരുവിള, ശശിധരന്‍ നായര്‍, ജി.കെ.പിള്ള,സൈമണ്‍ വളാച്ചേരില്‍, ജേക്കബ് കുടശ്ശനാട്, ബ്രൂസ് കൊളമ്പയില്‍, അജിത് പിള്ള , ബിജു ഇട്ടന്‍ ടോം വിരിപ്പന്‍ തുടങ്ങിയവര്‍ ആശംസകളര്‍പ്പിച്ചു സംസാരിച്ചു.
തുടര്‍ന്ന് കെ സുധാകരന്‍ എംപി മറുപടി പ്രസംഗം നടത്തി. യുഎസിലെ ആദ്യ സന്ദര്ശനമാണ് ഇത്. ഇവിടെ എത്തിയതോടെ അമേരിക്കയെക്കുറിച്ചുള്ള സങ്കല്‍പ്പങ്ങള്‍ മാറി. അമേരിക്ക ‘റോള്‍ മോഡല്‍ ടു വേള്‍ഡ്’ എന്നാണ് ഇപ്പോള്‍ മനസിലാക്കുന്നത്. ഈ രാജ്യത്തെ സര്‍ക്കാര്‍ ഇന്ത്യയില്‍ നിന്ന് കുടിയേറിയവരോട് അടക്കം കാട്ടുന്ന സ്നേഹവും കരുതലും അനുകമ്പയുമെല്ലാം ഇന്ത്യയില്‍ സ്വപ്നത്തില്‍ പോലും കാണാന്‍ കഴിയുന്നതല്ല. അത്ഭുതം തോന്നുകയാണ്. വിശാലമായ റോഡുകള്‍, രമ്യഹര്‍മ്യങ്ങള്‍. ഓരോ പൗരന്റെയും ജീവിത്തില്‍ സര്‍ക്കാര്‍ ഇടപെടുന്നു. ജോലി നഷ്ടപ്പെട്ട ചില മലയാളികളെ കണ്ടു. ജോലി പോയെങ്കിലും അവര്‍ക്ക ജീവിക്കാനുള്ള എല്ലാ സൗകര്യങ്ങളും സര്‍ക്കാര്‍ ഒരുക്കുന്നുണ്ട്. കേട്ടപ്പോള്‍ വലിയ സന്തോഷം തോന്നിയെന്നും സുധാകരന്‍ പറഞ്ഞു.
നാട്ടിലെ സ്ഥിതി എന്താണ്. മാറി മാറി വരുന്ന സര്‍ക്കാരുകള്‍ ജനങ്ങള്‍ക്ക് എന്തു മെച്ചമാണ് ചെയ്യുന്നത് എന്ന് ചിന്തിച്ചു പോവുകയാണെന്നും സുധാകരന്‍ പറഞ്ഞു. യുഎസില്‍ എത്തിയിട്ടും മലയാളികള്‍ കേരളത്തിലെയും ഇന്ത്യയിലെയും രാഷ്ട്രീയത്തെക്കുറിച്ച് ചര്‍ച്ച ചെയ്യുന്നത് ഭാഗ്യമായി കരുതുന്നു. ലോകത്ത് ഏതു ഭാഗത്താണെങ്കിലും സ്വന്തം മണ്ണിനെക്കുറിച്ച് ചിന്തിക്കാന്‍ സമയം കണ്ടെത്തുന്ന നിങ്ങളുടെ മനസ്സ് വിശാലമാണെന്നും അദ്ദേഹം പറഞ്ഞു. യുഎസിലെ ഡോക്ടര്‍മാരുടെ പെരുമാറ്റവും കൃത്യനിഷ്ടയും കരുതലും ചികിത്സയ്ക്കായി അമേരിക്കയില്‍ എത്തിയ തന്നെ ആശ്ചര്യപ്പെടുത്തിയതായും അദ്ദേഹം പറഞ്ഞു.
ഒഐസിസി ചാപ്റ്റര്‍ സെക്രട്ടറി ജോജി ജോസഫ് നന്ദി പ്രകാശിപ്പിച്ചു. മൈസൂര്‍ തമ്പി ജനറല്‍ കണ്‍വീനര്‍ ജോര്‍ജ് കൊച്ചുമ്മന്‍ , ജോമോന്‍ ഇടയാടി, പൊന്നു പിള്ള, ഷീല ചെറു, എബ്രഹാം തോമസ്, ജോജി ജോസഫ്, രാജീവ് റൊണാള്‍ഡ് തുടങ്ങിയവരുടെ നേതൃത്വത്തില്‍ നിരവധി കമ്മിറ്റികള്‍ തുടങ്ങിയവരുടെ നേതൃത്വത്തില്‍ വിവിധ കമ്മിറ്റികള്‍ സമ്മളനത്തിന്റെ വിജയത്തിനായി പ്രവര്‍ത്തിച്ചു. സമ്മേളന ശേഷം ഡിന്നറും ഉണ്ടായിരുന്നു.
