തിരുവനന്തപുരം: പതിമൂന്ന് ജില്ലകളിലെ 49 തദ്ദേശ സ്ഥാപന വാര്‍ഡുകളിലേക്ക് നടന്ന ഉപതിരഞ്ഞെടുപ്പില്‍ എല്‍ഡിഎഫും യുഡിഎഫും 23 വാര്‍ഡുകളില്‍ വീതം വിജയിച്ചു. ശേഷിച്ച മൂന്ന് സീറ്റുകളില്‍ എന്‍ഡിഎ സ്ഥാനാര്‍ത്ഥികളും വിജയിച്ചു.
തിരുവനന്തപുരത്ത് എട്ട് സീറ്റിലും എല്‍ഡിഎഫ് വിജയിച്ചു. തിരുവനന്തപുരം ജില്ലാ പഞ്ചായത്തിലെ വെള്ളനാട് ഡിവിഷനില്‍ മുന്‍കോണ്‍ഗ്രസ് നേതാവ് വെള്ളനാട് ശശി വിജയിച്ചു. പെരിങ്ങമല പഞ്ചായത്തിലെ മൂന്ന് വാര്‍ഡുകളില്‍ നടന്ന തിരഞ്ഞെടുപ്പില്‍ യുഡിഎഫ് സീറ്റുകള്‍ എല്‍ഡിഎഫ് പിടിച്ചെടുത്തു. കല്ലമ്പലം കരവാരം പഞ്ചായത്ത് പട്ട്ള വാര്‍ഡ് ബിജെപിയില്‍നിന്ന് എല്‍ഡിഎഫ് സ്വന്തമാക്കി. എല്‍ഡിഎഫിലെ ബേബി ഗിരിജ 261 വോട്ടുകള്‍ക്കാണ് വിജയിച്ചത്.
കൊല്ലം ജില്ലയില്‍ നാല് വാര്‍ഡുകളിലാണ് ഉപതിരഞ്ഞെടുപ്പ് നടന്നത്. മൂന്നിടത്ത് യുഡിഎഫും ഒരിടത്ത് എല്‍ഡിഎഫും വിജയിച്ചു. പത്തനംതിട്ട ജില്ലയില്‍ രണ്ട് വാര്‍ഡുകളില്‍ നടന്ന ഉപതിരഞ്ഞെടുപ്പില്‍ രണ്ട് സീറ്റുകളിലും യുഡിഎഫ് വിജയിച്ചു. ആലപ്പുഴ ജില്ലയിലെ മൂന്ന് വാര്‍ഡുകളില്‍ രണ്ടിടത്ത് എല്‍ഡിഎഫും ഒരിടത്ത് ബിജെപിയും വിജയിച്ചു. കോട്ടയം ജില്ലയില്‍ മൂന്ന് വാര്‍ഡുകളിലാണ് ഉപതിരഞ്ഞെടുപ്പ് നടന്നത്. രണ്ടിടത്ത് എല്‍ഡിഎഫും ഒരിടത്ത് യുഡിഎഫും വിജയിച്ചു. ഇടുക്കി ജില്ലയില്‍ നാല് വാര്‍ഡുകളിലാണ് ഉപതിരഞ്ഞെടുപ്പ് നടന്നത്. യുഡിഎഫ് രണ്ട് സീറ്റിലും എല്‍ഡിഎഫ് ഒരു സീറ്റിലും ബിജെപി ഒരു സീറ്റിലും വിജയം നേടി.
എറണാകുളം ജില്ലയില്‍ മൂന്ന് വാര്‍ഡുകളില്‍ രണ്ടിടത്ത് യുഡിഎഫും ഒരിടത്ത് എല്‍ഡിഎഫും വിജയിച്ചു. തൃശ്ശൂരിലാകട്ടെ, രണ്ടിടത്ത് എല്‍ഡിഎഫും ഒരിടത്ത് യുഡിഎഫും വിജയിച്ചു. പാലക്കാട് മൂന്നിടത്ത് യുഡിഎഫും രണ്ടിടത്ത് എല്‍ഡിഎഫും വിജയിച്ചു. തച്ചമ്പാറ പഞ്ചായത്തിലെ അഞ്ചാംവാര്‍ഡ് എല്‍ഡിഎഫില്‍നിന്ന് യുഡിഎഫ് പിടിച്ചെടുത്തു. മലപ്പുറത്ത് തിരഞ്ഞെടുപ്പ് നടന്ന നാല് വാര്‍ഡുകളിലും യുഡിഎഫിനായിരുന്നു വിജയം.
