ന്യൂഡല്‍ഹി: വയനാടിന്റെ നിയുക്ത എം.പി പ്രിയങ്ക ഗാന്ധിയുടെ സത്യപ്രതിജ്ഞ നാളെ നടക്കും. പാര്‍ലമെന്റില്‍ വയനാട് ഉരുള്‍പൊട്ടല്‍ ദുരന്തമായിരിക്കും പ്രിയങ്ക ആദ്യം ഉന്നയിക്കുന്ന വിഷയമെന്ന് സംഘടനാ ചുമതലയുള്ള ജനറല്‍ സെക്രട്ടറി കെ.സി. വേണുഗോപാല്‍ അറിയിച്ചു.
അതേസമയം, പാര്‍ലമെന്റിന്റെ ശീതകാല സമ്മേളനത്തിനു നാളെ തുടക്കമാകും. ഡിസംബര്‍ 20 വരെയാണ് സമ്മേളനം. പാര്‍ലമെന്റ് സമ്മേളനത്തിനു മുന്നോടിയായി ഇന്ന് സര്‍വകക്ഷി യോഗം ചേരും. ഏതു ഭാഷയും എളുപ്പത്തില്‍ വഴങ്ങുന്ന പ്രിയങ്ക മലയാളം പഠിക്കാനും താത്പര്യം പ്രകടിപ്പിച്ചതായും വിവരമുണ്ട്. കന്നിയങ്കത്തിലെ മിന്നും വിജയം ആഘോഷമാക്കാനും ജനങ്ങളെ നേരില്‍ കണ്ട് നന്ദി അറിയിക്കാനും പ്രിയങ്ക ഗാന്ധി വയനാട്ടിലേക്ക് വരും. അടുത്ത രണ്ടുമൂന്നു ദിവസത്തിനുള്ളില്‍ മണ്ഡലത്തില്‍ എത്തുമെന്നാണ് സൂചന. തന്റെ സഹോദരന്‍ മണ്ഡലത്തില്‍ പ്രവര്‍ത്തിച്ചു എന്നതിന്റെ തെളിവാണ് ഇപ്പോഴത്തെ വിജയമെന്നും അതൊരു വലിയ ബഹുമതിയായി തനിക്ക് തോന്നുന്നുവെന്നും പ്രിയങ്ക ഗാന്ധി കൂട്ടിച്ചേര്‍ത്തു.
നേരത്തെ വയനാട് ലോക്‌സഭ ഉപതെരഞ്ഞെടുപ്പില്‍ ചരിത്രത്തിലെ രണ്ടാമത്തെ മഹാ ഭൂരിപക്ഷത്തില്‍ ജയിച്ചുകയറിയ പ്രിയങ്ക ഗാന്ധി എക്‌സിലൂടെയും നന്ദി പ്രകടിപ്പിച്ച് രംഗത്തെത്തിയിരുന്നു. വമ്പന്‍ വിജയം നേടിയതിന് പിന്നാലെ വയനാട്ടിലെ വോട്ടര്‍മാര്‍ക്കെല്ലാം പ്രിയങ്ക നന്ദി പറഞ്ഞു. തന്നിലര്‍പ്പിച്ച വിശ്വാസത്തിനും സ്‌നേഹത്തിനും നന്ദിയുണ്ടെന്നും ഈ വിജയം വയനാട്ടിലെ എല്ലാവരുടേതുമാണെന്നാണ് പ്രിയങ്ക ഗാന്ധി എക്‌സില്‍ കുറിച്ചു.
