ന്യൂയോര്‍ക്/ തിരുവല്ല: വയനാട്ടിലെ ദുരിതബാധിത പ്രദേശങ്ങളുടെ പുനരുദ്ധാരണ പ്രവര്‍ത്തനങ്ങള്‍ക്കും പുനരധിവാസത്തിനുമാവശ്യമായ ഫണ്ട് സ്വരൂപിക്കുന്നതിന് നോര്‍ത്ത് അമേരിക്ക ദദ്രാസന, ഇടവക അംഗങ്ങള്‍ ഉള്‍പ്പെടെ എല്ലാവരുടെയും ആത്മാര്‍ത്ഥമായ സഹകരണം ഡോ. മാര്‍ത്തോമാ സഭാ പരമാധ്യക്ഷന്‍ ഡോ. തിയോഡോഷ്യസ് മാര്‍ത്തോമ്മാ മെത്രാപ്പോലീത്ത അഭ്യര്‍ത്ഥിച്ചു.
ജൂലൈ 30 ന് വയനാട്ടിലെ ചൂരല്‍മല, മുണ്ടക്കൈ പ്രദേശങ്ങളില്‍ ഉണ്ടായ ഉരുള്‍പൊട്ടലില്‍ ഇരുന്നൂറിലധികം ആളുകളുടെ ജീവന്‍ അപഹരിക്കുകയും നിരവധിപേര്‍ ആശുപത്രിയിലാവുകയും ചെയ്തു. വീടുകള്‍, വിദ്യാഭ്യാസ സ്ഥാപനങ്ങള്‍, ഉപജീവനമാര്‍ഗങ്ങള്‍ എന്നിവ നഷ്ടപ്പെട്ടു. പ്രദേശം തന്നെ ഇല്ലാതാകുന്ന അവസ്ഥയാണ് നേരിടുന്നത്. അതിനാല്‍, ആ പ്രദേശത്തെ ഈ അവസ്ഥയില്‍ നിന്ന് വീണ്ടെടുക്കുകയും നമ്മുടെ സഹോദരങ്ങളുടെ പുനരധിവാസത്തില്‍ സ്‌നേഹത്തിന്റെ സഹായഹസ്തങ്ങളായി സഹകരിക്കുകയും ചെയ്യേണ്ടത് നമ്മുടെ കടമയാണ്. ഒരു സഭ എന്ന നിലയില്‍, ആ പ്രദേശത്ത് പുനരുദ്ധാരണ പ്രവര്‍ത്തനങ്ങള്‍ നടത്താന്‍ ഞങ്ങള്‍ ഉദ്ദേശിക്കുന്നു. ദുരിതബാധിത പ്രദേശങ്ങളുടെ പുനരധിവാസത്തിനാവശ്യമായ ഫണ്ട് സ്വരൂപിക്കുന്നതിന് എല്ലാവരും ആത്മാര്‍ത്ഥമായി സഹകരിക്കണം.
ആഗസ്റ്റ് 11, ഞായറാഴ്ച, നമ്മുടെ ഇടവകകളില്‍ സമാഹരിച്ച സ്‌തോത്രകാഴ്ച ഈ ആവശ്യത്തിനായി സമര്‍പ്പിക്കണം. കൂടാതെ, വ്യക്തികളില്‍ നിന്നും സ്ഥാപനങ്ങളില്‍ നിന്നുമുള്ള സംഭാവനകളും പ്രതീക്ഷിക്കുന്നു. ഇടവക അംഗങ്ങളില്‍ നിന്നുള്ള ഓഫറുകളും പ്രത്യേക സംഭാവനകളും ഓഗസ്റ്റ് 31-നകം സഭാ ഓഫീസിലേക്ക് അയയ്ക്കേണ്ടതാണ്. സംഭാവനയ്ക്ക് ആദായനികുതി കിഴിവ് ലഭിക്കാന്‍ ആഗ്രഹിക്കുന്നവര്‍ അത് സെക്രട്ടറി, മാര്‍ത്തോമ്മാ പബ്ലിക് ചാരിറ്റബിള്‍ ട്രസ്റ്റ്, സി/ മാര്‍ത്തോമ്മാ എന്ന വിലാസത്തില്‍ അയക്കണം. സഭാ ഓഫീസ്, തിരുവല്ല. ഈ ദുഃഖകരമായ സാഹചര്യത്തില്‍ എല്ലാം നഷ്ടപ്പെട്ടവരെ പരിചരിക്കാനും അവരോട് ഐക്യദാര്‍ഢ്യം പ്രഖ്യാപിക്കാനും അവരുടെ ആവശ്യങ്ങളോട് ക്രിയാത്മകമായി പ്രതികരിക്കാനുമുള്ള സഭയുടെ ഈ ഉദ്യമത്തില്‍ പങ്കാളികള്‍ എന്ന നിലയില്‍ നമുക്കെല്ലാവര്‍ക്കും നമ്മുടെ ക്രിസ്തീയ ഉത്തരവാദിത്തം നിറവേറ്റാം. ഇതു സംബന്ധിച്ച് ‘ജൂലൈ 31നു തിരുവല്ല പൂലാത്തീനില്‍ നിന്ന് ഡോ. തിയോഡോഷ്യസ് മാര്‍ത്തോമ്മാ മെത്രാപ്പോലീത്ത പുറത്തിറക്കിയ അഭ്യര്‍ഥനയില്‍ ചൂണ്ടിക്കാട്ടി.
(വാര്‍ത്ത: പി.പി ചെറിയാന്‍)
