കൊച്ചി: എറണാകുളം മഹാരാജാസ് കോളേജില് എസ്എഫ്ഐ യൂണിറ്റ് സെക്രട്ടറിക്ക് കുത്തേറ്റു. നാസര് അബ്ദുള് റഹ്മാനാണ് കുത്തേറ്റത്. വിദ്യാര്ത്ഥിയുടെ കാലിനും വയറിന്റെ ഭാഗത്തും കൈക്കുമാണ് കുത്തേറ്റത്. പുലര്ച്ചെ ഒരു മണിയോടെയാണ് നാസര് അബ്ദുള് റഹ്മാന് ആക്രമിക്കപ്പെട്ടത്. ഉടന് തന്നെ ജനറല് ആശുപത്രിയിലെത്തിച്ച വിദ്യാര്ത്ഥിയെ ഐസിയുവില് പ്രവേശിപ്പിക്കുകയായിരുന്നു.
പിന്നീട് എറണാകുളം മെഡിക്കല് ട്രസ്റ്റ് ആശുപത്രിയിലേക്ക് മാറ്റി. നിലവില് വിദ്യാര്ത്ഥി അപകടനില തരണം ചെയ്തിട്ടില്ലെന്ന് ഡോക്ടര്മാര് അറിയിച്ചു. അക്രമണത്തിന് പിന്നില് ഫ്രറ്റേണിറ്റി പ്രവര്ത്തകരാണെന്ന് എസ്എഫ്ഐ ആരോപിക്കുന്നു. കഴിഞ്ഞ ദിവസങ്ങളില് കോളേജില് എസ്എഫ്ഐ-ഫ്രറ്റേണിറ്റി പ്രവര്ത്തകര് തമ്മിലുണ്ടായ സംഘര്ഷത്തില് ഒന്പത് വിദ്യാര്ത്ഥികള്ക്ക് പരുക്കേറ്റിരുന്നു. പിന്നാലെ ഫ്രട്ടേണിറ്റി പ്രവര്ത്തകരായ ചില വിദ്യാര്ത്ഥികളെ സസ്പെന്ഡ് ചെയ്തിരുന്നു.
