ഖലിസ്ഥാൻ വാദി നേതാവും യുഎസ് പൌരനുമായ ഗുർപത്വന്ത് സിങ് പന്നൂനെ അമേരിക്കയിൽ വച്ച് വധിക്കാൻ ഇന്ത്യൻ രഹസ്യാന്വേഷണ ഉദ്യോഗസ്ഥൻ ഗൂഢാലോചന നടത്തിയ കേസിൽ ഇന്ത്യയിൽ നിന്ന് അമേരിക്ക ഉത്തവാദിത്വ പൂർണമായ മറുപടി പ്രതീക്ഷിക്കുന്നു എന്ന് യുഎസ് വിദേശകാര്യ വക്താവ് വേദാന്ത് പട്ടേൽ.
ഈ കേസുമായി ബന്ധപ്പെട്ട് നിഖിൽ ഗുപ്ത എന്ന ഇന്ത്യക്കാരനെതിരെ കഴിഞ്ഞ വർഷം നവംബറിൽ ന്യൂയോർക്കിൽ കേസ് റജിസ്റ്റർ ചെയ്യുകയും ചെപ്പ് റിപബ്ളിക്കിൽ വച്ച് ഇയാളെ പിടികൂടി അമേരിക്കയിൽ എത്തിക്കുകയും ചെയ്തിട്ടുണ്ട്. ഇയാൾ അമേരിക്കൻ ജയിലിലാണ് ഇപ്പോൾ. ഇയാളുടെ കേസ് നടന്നുകൊണ്ടിരിക്കുകയാണ്.
“കഴിഞ്ഞ വേനൽക്കാലത്ത് യുഎസ് മണ്ണിൽ യുഎസ് പൗരനെ വധിക്കാനുള്ള പരാജയപ്പെട്ട ശ്രമത്തിൽ ഒരു ഇന്ത്യൻ സർക്കാർ ജീവനക്കാരൻ്റെ പങ്കിനെക്കുറിച്ച് ഞങ്ങൾ ഇന്ത്യൻ സർക്കാരിൽ നിന്ന് മറുപടി പ്രതീക്ഷിക്കുന്നു, ” വേദാന്ത് പട്ടേൽ മാധ്യമപ്രവർത്തകരോട് പ്രതികരിച്ചു.“ഞങ്ങൾ ഞങ്ങളുടെ ആശങ്കകൾ മുതിർന്ന തലങ്ങളിൽ ഇന്ത്യൻ സർക്കാരുമായി നേരിട്ട് ഉന്നയിക്കുന്നത് തുടരുന്നു,” അദ്ദേഹം പറഞ്ഞു.
ആരോപണങ്ങൾ ഇന്ത്യ നിഷേധിച്ചെങ്കിലും ഇത് പരിശോധിക്കാൻ ആഭ്യന്തര അന്വേഷണ സംഘത്തെ നിയോഗിച്ചിട്ടുണ്ട്.
ഇന്ത്യ എതിർക്കുന്ന ഖലിസ്ഥാൻ വാദി നേതാവ് പന്നൂനെ വധിക്കാൻ ഇന്ത്യക്കാരനായ നിഖിൽ ഗുപ്ത എന്നയാളെ ഒരു ഇന്ത്യൻ രഹസ്യാന്വേഷണ ഉദ്യോഗസ്ഥൻ ചുമതലപ്പെടുത്തിയിരുന്നു എന്നും നിഖിൽ ഗുപ്ത ആ ദൌത്യം അമേരിക്കയിലെ ഒരു വാടകക്കൊലയാളിയെ ഏൽപ്പിച്ചെന്നും അമേരിക്ക ആരോപിക്കുന്നു. ആ വാടക കൊലയാളി അമേരിക്കൻ രഹസ്യാന്വേഷണ ഏജൻസികളുടെ ഒരു ഏജൻ്റായിരുന്നു. അങ്ങനെയാണ് ആ ഗൂഢാലോചന പുറത്തു വന്നതെന്ന് അമേരിക്ക പറയുന്നു. എന്നാൽ എല്ലാ ആരോപണങ്ങളേയും ഇന്ത്യ തള്ളികളഞ്ഞിരിക്കുകയാണ്. ഇതിൽ ഉൾപ്പെട്ടു എന്ന് അമേരിക്ക ആരോപിച്ച ഉദ്യോഗസ്ഥനെ ഇന്ത്യ ജോലിയിൽ നിന്ന് നീക്കം ചെയ്തിട്ടുണ്ട്.
US expect accountability from India on Pannun’s assassination bid
