ടെക്‌സസ് : സെന്‍ട്രല്‍ ടെക്‌സസിലെ വെള്ളപ്പൊക്കത്തില്‍ മരണസംഖ്യ 104 ആയി ഉയര്‍ന്നു. ഡസന്‍ കണക്കിന് ആളുകളെ ഇപ്പോഴും കാണാനില്ല. വെള്ളിയാഴ്ച പുലര്‍ച്ചെയുണ്ടായ മിന്നല്‍ പ്രളയത്തില്‍ ഗ്വാഡലൂപ്പ് നദിയില്‍ അസാധാരണമായി ജലനിരപ്പ് ഉയര്‍ന്ന് നിരവധി പേരെ കാണാതാകുകയായിരുന്നു. രണ്ട് നില കെട്ടിടത്തിന്റെ ഉയരത്തിലേക്കാണ് നദിയിലെ ജലനിരപ്പ് ഉയര്‍ന്നത്.
പെണ്‍കുട്ടികളുടെ വേനല്‍ക്കാല ക്യാമ്പായ കെര്‍ കൗണ്ടിയിലെ ക്യാമ്പ് മിസ്റ്റില്‍ നിന്ന് 27 പെണ്‍കുട്ടികളെ കാണാതായിരുന്നു. ഇവരുടെ മരണം പിന്നീട് സ്ഥിരീകരിക്കുകയായിരുന്നു. നദിക്കരയിലെവീടുകളിലുള്ളവരും ദാരുണ ദുരന്തത്തിന് ഇരകളായി. ഇതുവരെയുള്ള മരണങ്ങളില്‍ 84 എണ്ണം കെര്‍ കൗണ്ടിയിലാണ് സംഭവിച്ചതെന്ന് തിങ്കളാഴ്ച ഉദ്യോഗസ്ഥര്‍ പറഞ്ഞു.
പത്തോളം ക്യാമ്പ് മിസ്റ്റിക് ക്യാമ്പര്‍മാരെയും ഒരു കൗണ്‍സിലറെയും ഇപ്പോഴും കാണാനില്ലെന്ന് കെര്‍ കൗണ്ടി ഷെരീഫ് ലാറി ലീത്ത പറഞ്ഞു. വെള്ളപ്പൊക്കം ഉണ്ടായപ്പോള്‍ ക്യാമ്പ് മിസ്റ്റില്‍ ഏകദേശം 750 കുട്ടികളുണ്ടായിരുന്നുവെന്ന് ഷെരീഫ് നേരത്തെ പറഞ്ഞിരുന്നു.
ടെക്‌സസ് ഗവര്‍ണര്‍ ഗ്രെഗ് ആബട്ടിന്റെ അഭ്യര്‍ത്ഥനപ്രകാരം കെര്‍ കൗണ്ടിയിലേത് ഒരു വലിയ ദുരന്തമാണെന്ന പ്രഖ്യാപനത്തില്‍ പ്രസിഡന്റ് ട്രംപ് ഒപ്പുവച്ചു. ട്രംപ് ഈയാഴ്ച ദുരന്തഭൂമി സന്ദര്‍ശിക്കുമെന്ന് അറിയിച്ചിട്ടുണ്ട്.
ദുരന്തത്തില്‍ കുടുങ്ങിയ ആരെങ്കിലും ജീവനോടെ അവശേഷിക്കുന്നുണ്ടോ എന്ന് കണ്ടെത്തുന്നതിനായി പ്രവര്‍ത്തനങ്ങള്‍ 24 മണിക്കൂറും തുടരുമെന്ന് ഗവര്‍ണര്‍ പറഞ്ഞു.യഥാര്‍ത്ഥത്തില്‍ എത്ര പേരെ കാണാതായിട്ടുണ്ടെന്നത് ഇപ്പോഴും വ്യക്തമല്ല.
