ഡാളസ് : യുഎസിലെ ഡാളസിലെ രണ്ട് വിമാനത്താവളങ്ങളിലായി വെള്ളിയാഴ്ച 1,800-ലധികം വിമാനങ്ങള്‍ വൈകിയതായി റിപ്പോര്‍ട്ട്. നൂറുകണക്കിന് വിമാനങ്ങള്‍ റദ്ദാക്കുകയും ചെയ്തിട്ടുണ്ട്. ആശയവിനിമയവുമായി ബന്ധപ്പെട്ട ടെലികോം തകരാറിനെ തുടര്‍ന്നാണ് ഈ സംഭവവികാസങ്ങളെന്ന് ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ അറിയിച്ചിട്ടുണ്ട്. ഡാളസ് ലവ് ഫീല്‍ഡ്, ഡാളസ്-ഫോര്‍ട്ട് വര്‍ത്ത് എന്നീ അന്താരാഷ്ട്ര വിമാനത്താവളിലെ പ്രവര്‍ത്തനങ്ങളെയാണ് തടസ്സം ബാധിച്ചത്. അന്വേഷണം തുടരുകയാണ്. ഈ വര്‍ഷം എഫ്എഎ നിരവധി ആശയവിനിമയ പ്രശ്നങ്ങള്‍ നേരിട്ടിട്ടുണ്ട്.
ഡാളസിലെ ടെലികോം തടസ്സവുമായി ബന്ധപ്പെട്ട് അമേരിക്കന്‍ എയര്‍ലൈന്‍സ് 200-ലധികം വിമാനങ്ങള്‍ റദ്ദാക്കുകയും 500-ലധികം വിമാനങ്ങള്‍ വൈകിപ്പിക്കുകയും ചെയ്തു. ഇത് കമ്പനിയുടെ നാലിലൊന്ന് വിഭാഗത്തെ ബാധിച്ചു. സൗത്ത് വെസ്റ്റ് എയര്‍ലൈന്‍സിന്റെ 1,100-ലധികം വിമാനങ്ങള്‍ വൈകി. അപ്രോച്ച് കണ്‍ട്രോള്‍ ടവറും വിമാനത്താവളങ്ങളിലെ എയര്‍ ട്രാഫിക് കണ്‍ട്രോളും തമ്മിലുള്ള ഓട്ടോമേഷന്‍ പ്രശ്നങ്ങള്‍ കാരണം സര്‍വീസുകള്‍ 30 മുതല്‍ 45 മിനിറ്റ് വരെ വൈകുകയായിരുന്നു.
