പെൻസിൽവാനിയ: പെൻസിൽവാനിയയിലെ ഹെർഷിപാർക്കിലെ വാട്ടർ പാർക്കിലെ വേവ് പൂളിൽ നിന്ന് ബോധരഹിതയായി പുറത്തെടുത്ത ഒമ്പത് വയസുകാരിക്ക് ദാരുണാന്ത്യം. സംഭവം നടന്ന ദിവസം ഏകദേശം 92 ഡിഗ്രി ചൂടുള്ള ഒരു ദിനമായിരുന്നു എന്നും, കുട്ടി വേവ് പൂളിൽ നിന്നും ബോധരഹിതയായി പുറത്തെടുക്കുമ്പോൾ കുടുംബം അവിടേക്ക് എത്തിയതേ ഉണ്ടായിരുന്നുള്ളൂ എന്നും ദൃക്സാക്ഷി പറഞ്ഞു. ജീവനക്കാരും സുരക്ഷാ ഉദ്യോഗസ്ഥരും സിപിആർ (CPR) നൽകാൻ ഓടിയെത്തി. ലൈഫ് ഗാർഡുകളുടെയും അടിയന്തര രക്ഷാപ്രവർത്തകരുടെയും ശ്രമങ്ങൾക്കിടയിലും കുട്ടിയെ പിന്നീട് പ്രാദേശിക ആശുപത്രിയിൽ മരിച്ചതായി പ്രഖ്യാപിച്ചു.
വേവ് പൂളിൽ വെച്ച് കുട്ടിക്ക് അസ്വസ്ഥതകൾ പ്രകടിപ്പിച്ചതിന് ശേഷമാണ് രക്ഷപ്പെടുത്തിയതെന്ന് റിപ്പോർട്ടുകൾ സൂചിപ്പിക്കുന്നു. കുട്ടിയുടെ വിവരങ്ങളോ സംഭവത്തിലേക്ക് നയിച്ച കാരണങ്ങളോ പാർക്ക് അധികൃതർ ഇതുവരെ പുറത്തുവിട്ടിട്ടില്ല. “കഴിഞ്ഞ ദിവസം ഹെർഷിപാർക്കിൽ ഹൃദയം നുറുങ്ങുന്ന ഒരു കാഴ്ചയ്ക്ക് ഞാൻ സാക്ഷിയായി. 92 ഡിഗ്രി ചൂടുള്ള ഒരു ദിവസമായിരുന്നു അത്, എന്റെ കുടുംബം അവിടെയെത്തിയതേ ഉണ്ടായിരുന്നുള്ളൂ, അപ്പോഴാണ് ഞാൻ ഒരു കുട്ടിയെ വേവ് പൂളിൽ നിന്ന് നിർജ്ജീവമായി പുറത്തേക്ക് വലിക്കുന്നത് കണ്ടത്,” പേര് വെളിപ്പെടുത്താൻ ആഗ്രഹിക്കാത്ത ദൃക്സാക്ഷി പറഞ്ഞു.
