വിര്‍ജീനിയ: 2023-ല്‍ ക്ലാസ് മുറിയില്‍ വെച്ച് 6 വയസ്സുള്ള ഒരു വിദ്യാര്‍ത്ഥിയുടെ വെടിയേറ്റ മുന്‍ വിര്‍ജീനിയ അധ്യാപിക വ്യാഴാഴ്ച കോടതിയില്‍ തന്റെ അനുഭവം പങ്കുവെച്ചത് ഏവരേയും ഞെട്ടിച്ചു. താന്‍ മരിച്ചുപോയെന്നാണ് കരുതിയതെന്നും അവര്‍ ഞെട്ടലോടെ ഓര്‍ത്തെടുക്കുന്നു. ഇരയായ ആബി സ്വെര്‍നര്‍ എന്ന അധ്യാപികയാണ് പൊള്ളുന്ന അനുഭവങ്ങളും അധ്യാപനം ഉപേക്ഷിച്ച വിവരവും പങ്കുവെച്ചത്.
വിദ്യാര്‍ത്ഥിയുടെ കൈവശം തോക്കുണ്ടെന്ന ഒന്നിലധികം മുന്നറിയിപ്പുകള്‍ അവഗണിച്ചതിന് മുന്‍ അസിസ്റ്റന്റ് പ്രിന്‍സിപ്പലിനെതിരെ ഫയല്‍ ചെയ്ത 40 മില്യണ്‍ ഡോളറിന്റെ കേസിന്റെ ഭാഗമായി കോടതിയിലെത്തിയതായിരുന്നു ആബി സ്വെര്‍നര്‍.
2023 ജനുവരിയില്‍ ന്യൂപോര്‍ട്ട് ന്യൂസിലെ റിച്ച്‌നെക്ക് എലിമെന്ററി സ്‌കൂളിലെ ഒന്നാം ക്ലാസ് മുറിയിലായിരുന്നു ആബി സ്വെര്‍നറിന്റെ ജീവിതം മാറ്റിമറിച്ച ഞെട്ടിക്കുന്ന സംഭവമുണ്ടായത്. ക്ലാസിലെ മേശയ്ക്കരുകിലിരിക്കുമ്പോള്‍ അപ്രതീക്ഷിതമായാണ് സ്വെര്‍നറിന് നേരെ ആറുവയസുള്ള കുട്ടി വെടിയുതിര്‍ത്തത്. കൈയിലും നെഞ്ചിലും വെടിയേറ്റു. ഹൃദയത്തിന് തൊട്ടടുത്തായിരുന്നു ഒരു വെടിയുണ്ട പതിച്ചത്.ഞെട്ടലോടെ അവര്‍ മറ്റുകുട്ടികളെ സുരക്ഷിതമായി ക്ലാസിന് പുറത്തെത്തിച്ച് പിന്നീട് ബോധ രഹിതയായി വീഴുകയായിരുന്നു. സ്വെര്‍നര്‍ ഏകദേശം രണ്ടാഴ്ച ആശുപത്രിയില്‍ കഴിഞ്ഞു. ആറ് ശസ്ത്രക്രിയകള്‍ ആവശ്യമായി വന്നു. ഇടതുകൈ ഇപ്പോഴും പൂര്‍ണമായി ചലിപ്പിക്കാനാകില്ല.
‘ഞാന്‍ മരിച്ചുപോയി എന്ന് ഞാന്‍ കരുതി. ഞാന്‍ സ്വര്‍ഗത്തിലേക്ക് പോകുകയാണെന്ന് കരുതി, പക്ഷേ പിന്നീട് എല്ലാം ഇരുണ്ടുപോയി. പിന്നെ ഞാന്‍ എന്റെ ചുറ്റും രണ്ട് സഹപ്രവര്‍ത്തകരെ കണ്ടു, എനിക്ക് പരുക്കേറ്റതായി ഞാന്‍ മനസ്സിലാക്കി, പിന്നീടൊന്നും ഓർമ ഇല്ല.”- രാജ്യത്തുടനീളം ഞെട്ടലുണ്ടാക്കിയ ആക്രമണത്തിന്റെ ഇരയായ ആബി സ്വെര്‍നര്‍ ഓര്‍ത്തെടുത്തു. ഇത്രയും ചെറിയ ഒരു കുട്ടിക്ക് എങ്ങനെ തോക്ക് കൈയിലെടുത്ത് തന്റെ അധ്യാപികയെ വെടിവയ്ക്കാന്‍ കഴിയുമെന്ന് പലരും ആശ്ചര്യപ്പെട്ട ഒരു സംഭവം കൂടിയായിരുന്നു ഇത്.
താന്‍ അധ്യാപനം ഉപേക്ഷിച്ചതായും ഇനി പഠിപ്പിക്കാന്‍ പദ്ധതിയില്ലെന്നും അവര്‍ പറഞ്ഞു. ലൈസന്‍സുള്ള ഒരു കോസ്മെറ്റോളജിസ്റ്റായി താന്‍ മാറിയെന്നും അവര്‍ ബുധനാഴ്ച കോടതിയില്‍ വെളിപ്പെടുത്തി.
വെടിവയ്പ്പിന് മണിക്കൂറുകള്‍ക്കുമുമ്പുതന്നെ വിദ്യാര്‍ത്ഥിയുടെ ബാഗില്‍ തോക്കുണ്ടെന്ന് നിരവധിപേര്‍ ആശങ്ക പ്രകടിപ്പിച്ചിട്ടും നടപടിയെടുക്കാന്‍ അന്ന് അസിസ്റ്റന്റ് പ്രിന്‍സിപ്പലായിരുന്നു എബോണി പാര്‍ക്കര്‍ തയ്യാറായില്ലെന്നാണ് കേസിലുള്ളത്. പാര്‍ക്കര്‍ മാത്രമാണ് കേസിലെ ഏക പ്രതി. സംഭവത്തിനു പിന്നാലെ ജില്ലാ സൂപ്രണ്ടിനെയും സ്‌കൂള്‍ പ്രിന്‍സിപ്പലിനെയും പുറത്താക്കിയിരുന്നു. എട്ട് കുറ്റങ്ങള്‍ക്ക് പാര്‍ക്കര്‍ അടുത്ത മാസം പ്രത്യേക ക്രിമിനല്‍ വിചാരണ നേരിടണം. കുറ്റം തെളിഞ്ഞാല്‍ ഓരോന്നിനും അഞ്ച് വര്‍ഷം വരെ തടവ് ശിക്ഷ ലഭിക്കാം.
കുട്ടിയെ അശ്രദ്ധമായി പരിപാലിച്ചുവെന്നും ആയുധങ്ങള്‍ ഉപയോഗിച്ചതിനും വിദ്യാര്‍ത്ഥിയുടെ അമ്മയ്ക്ക് ഏകദേശം നാല് വര്‍ഷം തടവ് ശിക്ഷ വിധിച്ചു. അമ്മയുടെ പേഴ്‌സില്‍ തോക്ക് ഉണ്ടായിരുന്നെന്നും അലമാരയുടെ മുകളില്‍ നിന്നാണ് താന്‍ അതെടുത്തതെന്നും അവരുടെ മകന്‍ അധികൃതരോട് വെളിപ്പെടുത്തിയിരുന്നു.
A former Virginia teacher who was shot by a 6-year-old student in her classroom in 2023 testified Thursday that she thought she had died.
