വാഷിംഗ്ടൺ: അമേരിക്കൻ പൊലീസ് ഉദ്യോഗസ്ഥർ നാടുകടത്തുന്നതിനായി വിമാനത്താവളത്തിൽ എത്തിച്ച ഇന്ത്യൻ വിദ്യാർത്ഥിയെ നിലത്ത് കിടത്തി കൈകാലുകളിൽ വിലങ്ങ് അണിയിക്കുന്നതിൻ്റെ ന്യൂജേഴ്‌സിയിലെ നെവാർക്ക് എയർപോർട്ടിലെ ദൃശ്യങ്ങൾ പുറത്ത്. ഫോണിൽ ഇന്ത്യൻ-അമേരിക്കൻ സംരംഭകനായ കുനാൽ ജെയിൻ പകർത്തിയ വീഡിയോ ദൃശ്യങ്ങളാണ് സാമൂഹ മാധ്യമങ്ങളിൽ വൈറലായത്.
വീഡിയോയിൽ വിദ്യാർത്ഥിയോട് അധികാരികൾ കുറ്റവാളിയെ പോലെ പെരുമാറുന്നത് കാണാം. കാലുകളും കൈകളും ബന്ധിച്ച വിദ്യാർഥിയുടെ പുറകിൽ രണ്ട് ഉദ്യോഗസ്ഥർ മുട്ടുകുത്തി നിൽക്കുന്നതും വീഡിയോയിൽ കാണാം.
സംഭവത്തിൽ ന്യൂയോർക്കിലെ ഇന്ത്യൻ എംബസി ന്യൂജേഴ്‌സിയിലെ നെവാർക്ക് എയർപോർട്ടിൽ വെച്ച് ഒരു ഇന്ത്യൻ പൗരന് ഉദ്യോഗസ്ഥരിൽ നിന്നും ബുദ്ധിമുട്ട് നേരിടുന്നതിന്റെ വീഡിയോ ശ്രദ്ധയിൽ പെട്ടിട്ടുണ്ട്. ഇക്കാര്യത്തിൽ പ്രാദേശിക അധികാരികളുമായി ഇന്ത്യൻ എംബസി ബന്ധപ്പെട്ടുകൊണ്ടിരിക്കുകയാണ്. ഇന്ത്യൻ പൗരന്മാരുടെ ക്ഷേമത്തിനായി ഇന്ത്യൻ പ്രതിനിധിമാർ പ്രതിജ്ഞാബദ്ധമാണെന്നും പ്രതികരിച്ചു.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ കുടിയേറ്റത്തിനെതിരായ കർശന നടപടിയുടെ ഭാഗമായി 100-ലധികം ഇന്ത്യക്കാരെ തിരിച്ചയച്ചിരുന്നു. സംഭവത്തിൽ കുടിയേറ്റക്കാരെ കൈകൾ കെട്ടിയും കാലുകൾ ചങ്ങലയിട്ടതും വലിയ വിമർശനങ്ങൾ നേരിട്ടിരുന്നു.
