വാഷിംഗ്ടൺ: വെനസ്വേലയുടെ പ്രസിഡന്റായ നിക്കോളാസ് മഡൂറോയെ അധികാരഭ്രഷ്ടനാക്കാന് കഴിഞ്ഞ നാല് മാസമായി പെടാപാട് പെടുന്ന യുഎസ് പ്രസിഡൻ്റ് ഡോണൾഡ് ട്രംപ് വീണ്ടും മറ്റൊരു കടുത്ത നീക്കത്തിലേക്ക്. വെനസ്വേലയിലേക്കും പുറത്തേക്കും അനുമതിയുള്ള എണ്ണ ടാങ്കറുകൾ ഉപരോധിക്കാനാണ് പുതിയ നീക്കം. ഇതിനായി താൻ ഉത്തരവിട്ടെന്ന് ട്രംപ് പ്രഖ്യാപിച്ചു.
ട്രൂത്ത് സോഷ്യലിലെ ഒരു പോസ്റ്റിൽ, വെനസ്വേലൻ നേതാവ് നിക്കോളാസ് മഡുറോയുടെ സർക്കാരിനെ ഒരു വിദേശ ഭീകര സംഘടനയായി പ്രഖ്യാപിച്ചിട്ടുണ്ടെന്നും അത് യുഎസ് ആസ്തികൾ മോഷ്ടിച്ചതിനും “ഭീകരത, മയക്കുമരുന്ന് കടത്ത്, മനുഷ്യക്കടത്ത്” എന്നിവയ്ക്കും കാരണക്കാരാണെന്നും ട്രംപ് ആരോപിച്ചു. “അതിനാൽ, ഇന്ന്, വെനസ്വേലയിലേക്കും പുറത്തേക്കും പോകുന്ന എല്ലാ അനുമതിയുള്ള എണ്ണ ടാങ്കറുകളും പൂർണ്ണമായും ഉപരോധിക്കാൻ ഞാൻ ഉത്തരവിടുന്നു,” അദ്ദേഹം കൂട്ടിച്ചേർത്തു. അതേസമയം, ട്രംപിന്റെ ഏറ്റവും പുതിയ പരാമർശങ്ങളോട് വെനസ്വേല ഇതുവരെ പ്രതികരിച്ചിട്ടില്ല.
വെനസ്വേലയുടെ തീരത്ത് നിന്ന് യുഎസ് ഒരു എണ്ണ ടാങ്കർ പിടിച്ചെടുത്തതിന് ഒരാഴ്ചയ്ക്കിപ്പുറമാണ് ട്രംപിൻ്റെ പുതിയ നീക്കം. ലോകത്തില് ഏറ്റവും അധികം എണ്ണ ഉല്പാദിപ്പിക്കുന്ന രാജ്യമാണ് വെനസ്വേല. ദിവസേന 300 കോടി ബാരല് എണ്ണ ഉല്പാദിപ്പിക്കാന് ഇവിടുത്തെ എണ്ണപ്പാടങ്ങള്ക്ക് ശേഷിയുണ്ട്.
വെനസ്വേല മയക്കുമരുന്ന് കള്ളക്കടത്ത് നടത്തിയതായി ട്രംപ് ഭരണകൂടം ആവർത്തിച്ച് ആരോപിച്ചിട്ടുണ്ട്, സെപ്റ്റംബർ മുതൽ യുഎസ് സൈന്യം ഫെന്റനൈലും മറ്റ് നിയമവിരുദ്ധ മരുന്നുകളും യുഎസിലേക്ക് കൊണ്ടുപോകുന്നുവെന്ന് ആരോപിച്ച് ബോട്ടുകൾക്ക് നേരെ നടത്തിയ ആക്രമണങ്ങളിൽ കുറഞ്ഞത് 90 പേരെങ്കിലും കൊല്ലപ്പെട്ടിട്ടുണ്ട്. യുദ്ധകാഹളമെന്ന് വിശേഷിപ്പിക്കപ്പെടുന്ന പല നീക്കങ്ങളും യുഎസിൻ്റെ ഭാഗത്തുനിന്നും കഴിഞ്ഞ ഏതാനും മാസങ്ങളായി ഉണ്ടാകുന്നുണ്ട്. യുഎസ് യുദ്ധക്കപ്പലുകളും സൈന്യത്തെയും ഈ മേഖലയിലേക്ക് മാറ്റിയിട്ടുണ്ട്.
ട്രംപിന്റെയും മുൻ പ്രസിഡന്റ് ജോ ബൈഡന്റെയും കീഴിലുള്ള യുഎസ് ഭരണകൂടങ്ങൾ, വർഷങ്ങളായി മഡുറോ സർക്കാരിനെ എതിർക്കുകയും കർശന ഉപരോധങ്ങൾ ഏർപ്പെടുത്തി അദ്ദേഹത്തെ ഭരണത്തിൽനിന്നും താഴെയിറക്കാൻ സമ്മർദ്ദം ചെലുത്തുകയും ചെയ്തു.
Another tough move, Trump orders blockade of oil tankers traveling to and from Venezuela.
