ഫ്ലോറിഡ: അഫ്ഗാൻ അഭയാർത്ഥികളുടെ വിഷയത്തിൽ ചോദ്യങ്ങൾ നേരിടുന്നതിനിടെ, ഒരു വനിതാ റിപ്പോർട്ടറെ വ്യാഴാഴ്ച മണ്ടി എന്ന് വിളിച്ച് അധിക്ഷേപിച്ച് യുഎസ് പ്രസിഡന്‍റ് ഡോണൾഡ് ട്രംപ്. ചോദ്യങ്ങൾ ഇഷ്ടപ്പെടാത്തപ്പോൾ മാധ്യമങ്ങളിലെ സ്ത്രീകൾക്കെതിരെ അദ്ദേഹം നടത്തുന്ന അധിക്ഷേപങ്ങളുടെ പട്ടികയിലേക്ക് പുതിയൊരെണ്ണം കൂടിയാണ് ഇപ്പോൾ വന്നിട്ടുള്ളത്. “നിങ്ങൾ മണ്ടിയാണോ? നിങ്ങൾ ഒരു മണ്ടിയായ വ്യക്തിയാണോ?” റിപ്പോർട്ടറുടെ ചോദ്യം തടസ്സപ്പെടുത്തി ട്രംപ് ചോദിച്ചു.
അഫ്ഗാനിസ്ഥാനിൽ നിന്ന് യുഎസ് സേന പെട്ടെന്ന് പിൻവാങ്ങിയതിനെത്തുടർന്ന് രാജ്യത്തേക്ക് കൊണ്ടുവന്ന ഒരു അഫ്ഗാൻ പൗരനാണ് ബുധനാഴ്ച വൈറ്റ് ഹൗസിനടുത്ത് വെച്ച് രണ്ട് നാഷണൽ ഗാർഡ് സൈനികരെ വെടിവെച്ചത്. ട്രംപിന്‍റെ സ്വന്തം ഭരണകൂടത്തിലെ ചിലർ പോലും അഫ്ഗാൻ അഭയാർത്ഥികൾക്ക് സമഗ്രമായ പരിശോധന നൽകിയിട്ടുണ്ടെന്ന് പറഞ്ഞിട്ടും, എന്തുകൊണ്ടാണ് മുൻഗാമി ജോ ബൈഡനെ കുറ്റപ്പെടുത്തുന്നത് എന്ന് റിപ്പോർട്ടർ ട്രംപിനോട് ചോദിച്ചു.
“കാരണം അവരാണ് അവരെ അകത്തേക്ക് കടത്തിയത്,” എന്ന് പ്രതികരിച്ച ട്രംപ്, താലിബാൻ അധികാരം തിരിച്ചുപിടിച്ചപ്പോൾ പലായനം ചെയ്യുന്ന ആളുകളെ നിറച്ച യുഎസ് സൈനിക വിമാനത്തിന്‍റെ ചിത്രവും ഉയർത്തിക്കാട്ടി. “ഇവിടെ ഉണ്ടാകാൻ പാടില്ലാത്ത ആയിരക്കണക്കിന് ആളുകളോടൊപ്പമാണ് അവർ വന്നത്. നിങ്ങൾ ചോദ്യങ്ങൾ ചോദിക്കുന്നത് നിങ്ങൾ ഒരു മണ്ടിയായ വ്യക്തിയായതുകൊണ്ടാണ്,” ട്രംപ് പറഞ്ഞു.
