കീവ്: റഷ്യ-യുക്രൈൻ യുദ്ധം അവസാനിപ്പിക്കാൻ യുഎസ് പ്രസിഡൻ്റ് ഡോണൾഡ് ട്രംപ് എല്ലാ ഇടപെടലുകളും നടത്തണമെന്ന് യുക്രൈൻ പ്രസിഡൻ്റ് വോളോഡിമിർ സെലെൻസ്കി. അലാസ്കയിൽ റഷ്യൻ പ്രസിഡൻ്റ് വ്ലാഡിമിർ പുടിനുമായി നടക്കാനിരിക്കുന്ന നിർണായക ഉച്ചകോടിയിൽ ട്രംപ് ഈ ആവശ്യം ഉന്നയിക്കണമെന്ന് സെലെൻസ്കി അഭ്യർത്ഥിച്ചു. വെള്ളിയാഴ്ച സമൂഹമാധ്യമങ്ങളിൽ പങ്കുവെച്ച ഒരു പോസ്റ്റിലൂടെയാണ് അദ്ദേഹം ഈ ആവശ്യം ഉന്നയിച്ചത്. “യുദ്ധം അവസാനിപ്പിക്കേണ്ട സമയം അതിക്രമിച്ചിരിക്കുന്നു, അതിനുള്ള നടപടികൾ റഷ്യയാണ് സ്വീകരിക്കേണ്ടത്. ഈ വിഷയത്തിൽ ഞങ്ങൾ അമേരിക്കയെയാണ് വിശ്വസിക്കുന്നത്,” സെലെൻസ്കി തൻ്റെ പോസ്റ്റിൽ കുറിച്ചു. റഷ്യയുടെ ആക്രമണം ആരംഭിച്ച് ഏകദേശം മൂന്ന് വർഷം പിന്നിടുമ്പോഴും യുദ്ധം അവസാനിക്കാത്ത സാഹചര്യത്തിലാണ് സെലെൻസ്കി ട്രംപിനോട് നേരിട്ട് അഭ്യർത്ഥനയുമായി രംഗത്തെത്തിയത്. ട്രംപും പുടിനും തമ്മിലുള്ള ഈ കൂടിക്കാഴ്ചയെ ലോകം ഉറ്റുനോക്കുകയാണ്.
ലോകം ആകാംക്ഷയോടെ ഉറ്റുനോക്കുന്ന ട്രംപ് – പുടിൻ കൂടിക്കാഴ്ചയ്ക്ക് മുമ്പ് നിലപാട് വ്യക്തമാക്കി യുഎസ് പ്രസിഡന്റ്. വ്ലാഡിമിർ പുട്ടിനുമായുള്ള കൂടിക്കാഴ്ച മോശമാണെങ്കിൽ വളരെ വേഗം അവസാനിപ്പിക്കുമെന്നാണ് ഡോണൾഡ് ട്രംപ് പറയുന്നത്. എന്നാൽ കൂടിക്കാഴ്ച നന്നായി മുന്നോട്ടുപോയാൽ സമീപഭാവിയിൽ തന്നെ സമാധാനമുണ്ടാകുമെന്നും അലാസ്കയിൽ പുട്ടിനുമായുള്ള കൂടിക്കാഴ്ചയ്ക്ക് പുറപ്പെടുന്നതിനു മുൻപ് ട്രംപ് പറഞ്ഞു. പുട്ടിനുമായുള്ള ചർച്ച ‘വളരെ നിർണായകം’ എന്ന് ട്രംപ് സോഷ്യൽ മീഡിയയിൽ കുറിച്ചിട്ടുമുണ്ട്.
