ന്യൂയോർക്ക്: ന്യൂയോർക്ക് നഗരത്തിലെ തെരഞ്ഞെടുപ്പുകളിൽ പൗരന്മാരല്ലാത്തവർക്ക് വോട്ട് ചെയ്യാൻ അനുമതി നൽകുന്ന വിവാദ നിയമം റദ്ദാക്കി പരമോന്നത കോടതി. 2021ൽ സിറ്റി കൗൺസിൽ പാസാക്കിയ നിയമം ഭരണഘടനാ വിരുദ്ധമെന്ന് വ്യക്തമാക്കിയാണ് ന്യൂയോർക്ക് അപ്പീൽ കോടതി വിധി പ്രസ്താവിച്ചത്. നിലവിലെ മേയർ എറിക് ആഡംസിന്റെ ഗതാഗത കമ്മിഷണറായ യാഡനിസ് റോഡ്രിഗസ് അവതരിപ്പിച്ച ബില്ലാണ് റദ്ദാക്കിയിട്ടുള്ളത്.
നികുതി അടയ്ക്കുകയും സമൂഹത്തിന് സംഭാവന നൽകുകയും ചെയ്യുന്നതിനാൽ പൗരന്മാരല്ലാത്തവർക്ക് വോട്ട് ചെയ്യാം എന്നായിരുന്നു യാഡനിസ് റോഡ്രിഗസിന്‍റെ വാദം. കോടതി ഇത് അംഗീകരിച്ചില്ല.
നിലവിലെ സിറ്റി കൺട്രോളർ സ്ഥാനാർഥികളായ ജസ്റ്റിൻ ബ്രാനൻ, മാർക്ക് ലെവിൻ എന്നിവര്‍ ബില്ലിനെ പിന്തുണച്ചിരുന്നു. റിപ്പബ്ലിക്കൻമാരുടെ എതിർപ്പ് മറികടന്നാണ് കൗൺസിൽ നിയമം പാസാക്കിയത്. എന്നാൽ, മേയർ എറിക് ആഡംസ് ബില്ലിൽ ഒപ്പുവെച്ചില്ല. പക്ഷേ, വീറ്റോ ചെയ്യാതിരുന്നതിനാൽ ഇത് നിയമമായി അംഗീകരിക്കപ്പെടുകയായിരുന്നു. കോടതി വിധിയോടെ ന്യൂയോർക്കിലെ ഏകദേശം 800,000 ഗ്രീൻ കാർഡ് ഉടമകളുടെ വോട്ടവകാശം എന്ന പ്രതീക്ഷയാണ് അസ്തമിച്ചത്.
