ലണ്ടൻ: യുഎസിലേക്ക് യാത്ര ചെയ്യുന്ന പൗരന്മാര്‍ക്കുള്ള മാര്‍ഗ നിര്‍ദേശങ്ങള്‍ പുതുക്കി യൂറോപ്യൻ രാജ്യങ്ങൾ. ഡോണൾഡ് ട്രംപ് പ്രസിഡന്‍റായതിന് ശേഷം യുഎസ്. ഇമിഗ്രേഷൻ നിയമങ്ങൾ കർശനമാക്കിയിട്ടുണ്ട്. സാധുവായ വിസയോ ESTA അംഗീകാരമോ കൈവശം വെച്ചിരിക്കുന്നത് യുഎസിലേക്കുള്ള പ്രവേശനം ഉറപ്പാക്കുന്നില്ലെന്ന് പൗരന്മാർക്ക് യുണൈറ്റഡ് കിംഗ്ഡവും ജർമ്മനിയും പൗരന്മാര്‍ക്ക് മുന്നറിയിപ്പ് നൽകി.
യുഎസ് അതിർത്തികളിൽ പ്രവേശനം നിഷേധിക്കപ്പെട്ട യൂറോപ്യൻ യാത്രക്കാരുടെ തടങ്കലുമായി ബന്ധപ്പെട്ട സംഭവങ്ങളെ തുടർന്നാണ് പുതുക്കിയ മാർഗ്ഗനിർദ്ദേശങ്ങൾ പുറത്തിറക്കിയത്. ചിലർ അറസ്റ്റിലാവുകയും നാട്ടിലേക്ക് അയക്കുന്നതിന് മുമ്പ് തടങ്കലിൽ വെക്കുകയും ചെയ്തു. ഈ ആഴ്ച ആദ്യം രണ്ട് ജർമ്മൻ പൗരന്മാരെ തെക്കൻ അതിർത്തിയിൽ തടഞ്ഞു.
ഈ കേസുകളിലൊന്ന് ജർമ്മൻ വിദേശകാര്യ മന്ത്രാലയം അന്വേഷിക്കുകയാണെന്നും ഇപ്പോഴും ബുദ്ധിമുട്ടനുഭവിക്കുന്ന വ്യക്തിയെ സഹായിക്കാൻ ബോസ്റ്റണിലെ കോൺസുലേറ്റ് ശ്രമിക്കുന്നുണ്ടെന്നും അധികൃതര്‍ അറിയിച്ചു. ഒരാൾക്ക് യുഎസിലേക്ക് പ്രവേശിക്കാൻ കഴിയുമോ എന്നതിനെക്കുറിച്ചുള്ള അന്തിമ തീരുമാനം യുഎസ് അതിർത്തി അധികാരികളുടേതാണെന്ന് ജർമ്മൻ വിദേശകാര്യ ഓഫീസിലെ വക്താവ് പറഞ്ഞു. തെറ്റായ വിവരങ്ങൾ, മുൻകാല ക്രിമിനൽ രേഖകൾ അല്ലെങ്കിൽ മുൻ യാത്രകളിൽ ചെറിയ കാലയളവ് അധികമായി താമസിച്ചാൽ പോലും അറസ്റ്റ്, നാടുകടത്തൽ അല്ലെങ്കിൽ തടങ്കൽ എന്നിവയിലേക്ക് നയിച്ചേക്കാമെന്നും മുന്നറിയിപ്പിൽ വ്യക്തമാക്കിയിട്ടുണ്ട്.
