വാഷിംഗ്ടൺ: ചൈനീസ് പ്രസിഡന്റ് ഷി ജിൻപിങ്ങുമായി ഉച്ചകോടിക്ക് താൻ ശ്രമിക്കുന്നില്ലെന്ന് യുഎസ് പ്രസിഡന്റ് ഡോണൾഡ് ട്രംപ്. എന്നാൽ ഷിയുടെ ക്ഷണം ലഭിച്ചാൽ ചൈന സന്ദർശിക്കാൻ സാധ്യതയുണ്ടെന്നും അദ്ദേഹം കൂട്ടിച്ചേർത്തു.
“ഞാൻ ചൈനയിൽ പോയേക്കാം, പക്ഷേ അത് പ്രസിഡന്റ് ഷിയുടെ ക്ഷണം ലഭിച്ചാൽ മാത്രമായിരിക്കും, ആ ക്ഷണം എനിക്ക് ലഭിച്ചിട്ടുണ്ട്. അല്ലാത്തപക്ഷം എനിക്ക് താൽപ്പര്യമില്ല!” ട്രംപ് ട്രൂത്ത് സോഷ്യലിൽ കുറിച്ചു.
ഈ വർഷം അവസാനം യുഎസ് പ്രസിഡന്റ് ഏഷ്യൻ പര്യടനം നടത്തുമ്പോൾ ഇരു നേതാക്കളും തമ്മിൽ കൂടിക്കാഴ്ച നടത്താൻ സാധ്യതയുണ്ടെന്ന് ട്രംപിന്റെയും ഷിയുടെയും സഹായികൾ നേരത്തെ റോയിട്ടേഴ്സിനോട് പറഞ്ഞിരുന്നു.
ട്രംപിന്റെ രണ്ടാം ഭരണകാലത്ത് ഇരു നേതാക്കളും തമ്മിലുള്ള ആദ്യ കൂടിക്കാഴ്ചയായിരിക്കും ഈ യാത്ര. ഇരു ശക്തികൾക്കുമിടയിൽ വ്യാപാര, സുരക്ഷാ സംഘർഷങ്ങൾ വർദ്ധിച്ചുകൊണ്ടിരിക്കുന്ന സമയത്താണ് ഈ കൂടിക്കാഴ്ച നടക്കുന്നത്.
