ജയ്പുർ: യുഎസ് പ്രസിഡന്‍റ് ഡോണൾഡ് ട്രംപിന്റെ മകനും വ്യവസായിയുമായ ഡോണൾഡ് ട്രംപ് ജൂനിയർ ഈ വാരാന്ത്യത്തിൽ ഇന്ത്യ സന്ദർശിക്കാൻ സാധ്യത. രാജസ്ഥാനിലെ ഉദയ്പൂരിൽ നടക്കുന്ന ഇന്ത്യൻ-അമേരിക്കൻ ദമ്പതികളുടെ വിവാഹ ചടങ്ങിൽ അദ്ദേഹം പങ്കെടുക്കുമെന്നാണ് പ്രതീക്ഷിക്കുന്നത്. ട്രംപ് ജൂനിയറിന്‍റെ സാധ്യമായ വരവ് കണക്കിലെടുത്ത്, ഒരു യുഎസ് സുരക്ഷാ ഏജൻസിയുടെ ടീം ഇതിനകം ഉദയ്പൂരിൽ എത്തുകയും സുരക്ഷാ ക്രമീകരണങ്ങൾ വിലയിരുത്തുകയും ചെയ്യുന്നതായി രാജസ്ഥാൻ പൊലീസ് വൃത്തങ്ങൾ എൻഡിടിവിയോട് പറഞ്ഞു.
നവംബർ 21, 22 തീയതികളിലാണ് വിവാഹം നടക്കുന്നത്. പിച്ചോള തടാകത്തിന് നടുവിലുള്ള ചരിത്രപ്രസിദ്ധമായ ജഗ് മന്ദിർ പാലസിലായിരിക്കും പ്രധാന ചടങ്ങ് നടക്കുക. മറ്റ് ആഘോഷങ്ങൾ സിറ്റി പാലസിനുള്ളിലെ മാനക് ചൗക്കിൽ വെച്ച് നടക്കും. ട്രംപ് ജൂനിയർ ദി ലീല പാലസ് ഉദയ്പൂരിൽ ആയിരിക്കും താമസിക്കുക എന്നും വൃത്തങ്ങൾ അറിയിച്ചു.
ട്രംപ് ജൂനിയറിനെ കൂടാതെ നിരവധി രാഷ്ട്രീയക്കാരും ഇന്ത്യൻ സെലിബ്രിറ്റികളും വിവാഹത്തിൽ പങ്കെടുക്കാൻ എത്തുമെന്നാണ് പ്രതീക്ഷിക്കുന്നത്.
വിഐപി അതിഥികളുടെ വരവിന് മുന്നോടിയായി നഗരത്തിൽ പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തിത്തുടങ്ങിയതായി ഉദയ്പൂർ പൊലീസ് സൂപ്രണ്ട് യോഗേഷ് ഗോയൽ എൻഡിടിവിയോട് പറഞ്ഞു. രണ്ട് ദിവസത്തെ വിവാഹാഘോഷ വേളയിൽ ഉദയ്പൂർ കനത്ത ജാഗ്രതയിലായിരിക്കും. വിമാനത്താവളം മുതൽ പിച്ചോള തടാകം വരെയുള്ള വഴിയിൽ പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തുമെന്നും വൃത്തങ്ങൾ അറിയിച്ചു.
