ന്യൂയോര്‍ക്ക് : ചൊവ്വാഴ്ച യുഎന്‍ ജനറല്‍ അസംബ്ലിയില്‍ സന്ദര്‍ശനം നടത്തുന്നതിനിടെ ഐക്യരാഷ്ട്രസഭ ആസ്ഥാനത്ത് നടന്ന മൂന്ന് സംഭവങ്ങള്‍ ആസൂത്രിതമാണോ എന്ന സംശയം പ്രകടിപ്പിച്ച് യുഎസ് പ്രസിഡന്റ് ഡോണള്‍ഡ് ട്രംപ്. ഇതേക്കുറിച്ച് അന്വേഷണം വേണമെന്നും ട്രംപ് ആവശ്യപ്പെട്ടു.
സ്തംഭിച്ച എസ്‌കലേറ്റര്‍, തകരാറിലായ ടെലിപ്രോംപ്റ്റര്‍, അസംബ്ലി ഹാളിലെ ശബ്ദ പ്രശ്‌നങ്ങള്‍ എന്നിവയുടെ കാര്യത്തിലാണ് വ്യക്തത തേടി ട്രംപ് അന്വേഷണം ആവശ്യപ്പെട്ടത്. സംഭവങ്ങള്‍ തന്റെ ഇമേജിനെ ദുര്‍ബലപ്പെടുത്താനുള്ള മനഃപൂര്‍വമായ ശ്രമങ്ങളാണെന്ന് ട്രംപ് എടുത്തുപറഞ്ഞു.
ബുധനാഴ്ച ട്രൂത്ത് സോഷ്യലിലെ ഒരു പോസ്റ്റില്‍, യുഎന്‍ സ്വയം ലജ്ജിക്കണമെന്ന് പറഞ്ഞ ട്രംപ്, ഇന്നലെ ഐക്യരാഷ്ട്രസഭയില്‍ ഒരു യഥാര്‍ത്ഥ അപമാനം നടന്നുവെന്നാണ് പരാമര്‍ശിച്ചത്. ‘ഒന്നല്ല, രണ്ടല്ല, മൂന്ന് ദുഷ്ട സംഭവങ്ങള്‍!’ അദ്ദേഹം എഴുതി.
ട്രംപിനെ ചൊടിപ്പിച്ച ആ സംഭവങ്ങള്‍ ഇതാണ്
ട്രംപും ഭാര്യ മെലനിയയും കയറിയ യുഎന്നിലെ എസ്‌കലേറ്റര്‍ സ്തംഭിച്ചു. കയറിയതിന് പിന്നാലെയാണ് സ്തംഭിച്ചത്. യുഎസ് പ്രസിഡന്റിന്റെ വീഡിയോഗ്രഫര്‍ ട്രംപ് എസ്‌കലേറ്റര്‍ കയറുന്ന ദൃശ്യങ്ങള്‍ പകര്‍ത്താനായി ക്യാമറയുമായി പിന്നോട്ടുനടന്നു എസ്‌കലേറ്ററില്‍ കയറിപ്പോയിരുന്നു. ഇയാള്‍ അബദ്ധത്തില്‍ എസ്‌കലേറ്ററിലെ ഏതോ സുരക്ഷാ ബ്രേക്ക് അമര്‍ത്തിയതാണ് സ്തംഭിക്കാനുള്ള കാരണമെന്നാണ് റിപ്പോര്‍ട്ട്. എന്നാല്‍ ഇതിലും ദുരൂഹതയുണ്ടെന്നാണ് ട്രംപ് ആരോപിക്കുന്നത്.
”മെലാനിയയും ഞാനും മുന്നോട്ട് വീഴാതിരുന്നത് അതിശയകരമാണ്. ഞങ്ങള്‍ ഓരോരുത്തരും കൈവരി മുറുകെ പിടിച്ചിരുന്നു അല്ലെങ്കില്‍ അത് ഒരു ദുരന്തമാകുമായിരുന്നു. ഇത് തികച്ചും അട്ടിമറിയായിരുന്നു,” ട്രംപ് പറഞ്ഞതിങ്ങനെ, ഉത്തരവാദികളെ അറസ്റ്റ് ചെയ്യണമെന്നും അദ്ദേഹം കൂട്ടിച്ചേര്‍ത്തു.
80-ാമത് യുഎന്‍ ജനറല്‍ അസംബ്ലി സെഷനില്‍ അദ്ദേഹം പ്രസംഗിക്കാന്‍ തുടങ്ങിയപ്പോള്‍, ടെലിപ്രോംപ്റ്റര്‍ പരാജയപ്പെട്ടു. ഇതാണ് ട്രംപ് പറഞ്ഞ രണ്ടാമത്തെ സംഭവം. ടെലിപ്രോംപ്റ്റര്‍ ഇല്ലാതെ ട്രംപ് 57 മിനിറ്റ് പ്രസംഗം നടത്തി, ഏകദേശം 15 മിനിറ്റിനുശേഷം അത് വീണ്ടും പ്രവര്‍ത്തിക്കുകയായിരുന്നു. ‘സന്തോഷകരമായ വാര്‍ത്ത എന്തെന്നാല്‍, പ്രസംഗത്തിന് മികച്ച അവലോകനങ്ങള്‍ ലഭിച്ചു. വളരെ കുറച്ച് ആളുകള്‍ക്ക് മാത്രമേ ഞാന്‍ ചെയ്തതുപോലെ ചെയ്യാന്‍ കഴിയൂ എന്ന വസ്തുതകൊണ്ടാണ് അവര്‍ അഭിനന്ദിച്ചത്,’ ട്രംപ് പ്രതികരിച്ചു.
യുഎന്‍ ജനറല്‍ അസംബ്ലി ഹാളിലെ ശബ്ദ സംവിധാനം തന്റെ പ്രസംഗ സമയത്ത് ഓഫാക്കിയെന്നാണ് ട്രംപിന്റെ മൂന്നാമത്തെ ആരോപണം. ഇത് ഇയര്‍പീസുകള്‍ ഉപയോഗിച്ചില്ലെങ്കില്‍ ലോക നേതാക്കള്‍ക്ക് തന്റെ വാക്കുകള്‍ കേള്‍ക്കാന്‍ കഴിയാതെ വരുന്ന അവസ്ഥയിലേക്ക് എത്തിച്ചുവെന്നാണ് ട്രംപ് ചൂണ്ടിക്കാട്ടിയത്.
