വാഷിംഗ്ടൺ: വാഷിംഗ്ടൺ ഡി സി വെടിവെപ്പുമായി ബന്ധപ്പെട്ട് അഫ്ഗാൻ വംശജനായ റഹ്മാനുല്ല ലകൺവാൽ അറസ്റ്റിലായതിന് പിന്നാലെ അഫ്ഗാൻ കുടിയേറ്റക്കാർക്കെതിരെ ട്രംപ് ഭരണകൂടം സ്വീകരിക്കുന്ന നടപടികൾക്കെതിരെ മുൻ യുഎസ് സൈനികൻ അഹമ്മദ് ഷാ മോഹിബി രംഗത്ത്. അഫ്ഗാനിസ്ഥാനെ അന്യായമായി ബലിയാടാക്കുകയാണെന്നും രാജ്യമല്ല പ്രശ്നമെന്നും മോഹിബി വാദിച്ചു.
യുഎസ് സേനയെ സഹായിച്ച അഫ്ഗാൻ, ഇറാഖി ദ്വിഭാഷികൾക്കും വിവർത്തകർക്കും വേണ്ടിയാണ് സ്‌പെഷ്യൽ ഇമിഗ്രന്റ് വിസ (SIV) പ്രോഗ്രാം ആദ്യം രൂപകൽപ്പന ചെയ്‌തതെന്നും, എന്നാൽ കാലക്രമേണ ഇത് മറ്റെല്ലാവരിലേക്കും വ്യാപിച്ചുവെന്നും മോഹിബി വിശദീകരിച്ചു. വെടിവെപ്പ് കേസിൽ പ്രതിയായ ലകൺവാൽ എസ്ഐവി പ്രോഗ്രാമിന് കീഴിലല്ല യുഎസിൽ എത്തിയത്.
യുഎസ് പിൻവാങ്ങലിനും താലിബാൻ അധികാരം പിടിച്ചടക്കലിനും ശേഷം ജോ ബൈഡന്‍റെ ഭരണത്തിൽ ആരംഭിച്ച ഓപ്പറേഷൻ അല്ലൈസ് വെൽക്കം പദ്ധതി വഴിയാണ് ഇയാൾ യുണൈറ്റഡ് സ്റ്റേറ്റ്സിൽ പ്രവേശിച്ചത്. അപകടത്തിൽ നിന്ന് പലായനം ചെയ്യുന്ന ദുർബലരായ അഫ്ഗാനികളെ സംരക്ഷിക്കാൻ ലക്ഷ്യമിട്ടാണ് ഈ പരിപാടി ആരംഭിച്ചത്. ലകൺവാൽ പിന്നീട് സിഐഎയുമായി ചേർന്ന് പ്രവർത്തിച്ചിരുന്നു. തുടർന്ന് 2024-ൽ ഇയാൾ അഭയാർത്ഥി പദവിക്ക് അപേക്ഷിക്കുകയും ഈ വർഷം ആദ്യം ട്രംപ് ഭരണകൂടത്തിന്‍റെ കീഴിൽ അംഗീകാരം നേടുകയും ചെയ്തു.
