സക്രാമെന്റോ: പ്രാദേശിക ടെലിവിഷൻ സ്റ്റേഷനായ കെഎക്സ്ടിവി (ABC10)-യുടെ ലോബിയിലേക്ക് വെടിയുതിർത്ത ഒരാളെ എഫ്ബിഐ അറസ്റ്റ് ചെയ്തു. വെള്ളിയാഴ്ച ഉച്ചതിരിഞ്ഞാണ് സംഭവം നടന്നത്. സംഭവം നടക്കുമ്പോൾ കെട്ടിടത്തിൽ ആളുകളുണ്ടായിരുന്നെങ്കിലും, ആർക്കും പരിക്കില്ലെന്നും എല്ലാവരും സുരക്ഷിതരാണെന്നും ചാനലിന്‍റെ ഉടമസ്ഥരായ ടെഗ്ന അറിയിച്ചു. എബിസി, സിഎൻഎൻ എന്നീ ചാനലുകളുമായി കെഎക്സ്ടിവിക്ക് ബന്ധമുണ്ട്.
വെള്ളിയാഴ്ച ഉച്ചയ്ക്ക് 1:30-നാണ് വെടിവെപ്പ് നടന്നത്. മണിക്കൂറുകൾക്ക് ശേഷം, 64-കാരനായ അനിബൽ ഹെർണാണ്ടസ് സാന്റാനയെ മാരകായുധം ഉപയോഗിച്ച് ആക്രമിക്കൽ, ആളുകളുള്ള കെട്ടിടത്തിലേക്ക് വെടിവെക്കൽ, തോക്ക് അശ്രദ്ധമായി കൈകാര്യം ചെയ്യൽ എന്നീ കുറ്റങ്ങൾ ചുമത്തി അറസ്റ്റ് ചെയ്തതായി സക്രാമെന്റോ പൊലീസ് അറിയിച്ചു.
200,000 ഡോളർ ജാമ്യത്തിൽ സാക്രമെന്റോ കൗണ്ടി മെയിൻ ജയിലിൽ അടച്ച അദ്ദേഹത്തെ ദിവസം അവസാനിക്കുന്നതിന് മുമ്പ് വിട്ടയച്ചതായി രേഖകൾ കാണിക്കുന്നു. എന്നാൽ ശനിയാഴ്ച അവസാനത്തോടെ, ഹെർണാണ്ടസ് സാന്റാനയെ വീണ്ടും എഫ്ബിഐ അറസ്റ്റ് ചെയ്തു, പബ്ലിക് അഫയേഴ്‌സ് ഓഫീസർ ഗിന സ്വാങ്കി സിഎൻഎന്നിനോട് പറഞ്ഞു.
