ഷോളി കുമ്പിളുവേലി (പി.ആര്‍.ഒ. ഫോമ)
പെന്‍സില്‍വാനിയ: ഫെഡറേഷന്‍ ഓഫ് മലയാളി അസോസിയേഷന്‍സ് ഓഫ് അമേരിക്കാസ് (ഫോമാ), ‘സഖി’ എന്നപേരില്‍ ആദ്യമായി ദേശീയ തലത്തില്‍ വനിതാ സംഗമം(വിമന്‍സമ്മിറ്റ്) സംഘടിപ്പിക്കുന്നു.
2025 സെപ്റ്റംബര്‍ 26 മുതല്‍ 28 വരെ പെന്‍സില്‍വാനിയയിലെ വില്‍ക്‌സ്-ബാരെയിലുള്ള വുഡ്‌ലാന്‍ഡ്‌സ് ഇന്‍ ആന്‍ഡ് റിസോര്‍ട്ടില്‍ വെച്ചാണ് പരിപാടി സംഘടിപ്പിക്കുക.
‘ശാക്തീകരിക്കുക, ഉയര്‍ത്തുക, നയിക്കുക’ എന്നതാണ് ഇക്കൊല്ലത്തെ വനിതാ സംഗമത്തിന്റെ പ്രമേയം. സ്ത്രീകളുടെ നേട്ടങ്ങളും സൗഹൃദങ്ങളും ആഘോഷിക്കാനും, വെല്ലുവിളികളെ മറികടക്കുന്നതിന് വനിതകളെ പ്രാപ്തരാക്കുന്നതിനുവേണ്ടി, സമൂഹത്തിലെ ഉന്നതസ്ഥാനങ്ങളിലിരിക്കുന്നവര്‍, സംരംഭകര്‍, പ്രൊഫഷണലുകള്‍, വിദ്യാര്‍ത്ഥികള്‍, വീട്ടമ്മമാര്‍ എന്നിങ്ങനെ വിവിധതലങ്ങളിലെ വനിതകളെ ഒരുമിച്ചുകൊണ്ടുവരികഎന്നതാണ് പരിപാടിയുടെ ലക്ഷ്യം.
ഫോമായുടെ ദേശീയ വനിതാഫോറം നേതൃത്വംനല്‍കുന്ന ഈ മഹാസംഗമം, പ്രവാസികളും അല്ലാത്തവരുമായ മലയാളി സ്ത്രീകളുടെ ശബ്ദം മലയാളി സമൂഹത്തിന്റെ ഉന്നമനത്തിനായി ഉയര്‍ന്നു കേള്‍ക്കേണ്ടതിന്റെ ആവശ്യകത ബോധ്യപ്പെടുത്തുക എന്ന ഉദ്ദേശത്തോടെയാണ് നടപ്പാക്കുന്നത്.
വിമന്‍സ്‌ഫോറം ചെയര്‍പേഴ്‌സണ്‍ സ്മിത നോബിന്റെ നേതൃത്വത്തില്‍, ഫോമാ ജോയിന്റ് ട്രഷറര്‍ അനുപമ കൃഷ്ണന്‍, ഫോമാനാഷണല്‍ വിമന്‍സ് ഫോറം ഭാരവാഹികളായ ആശമാത്യു, ജൂലി ബിനോയ്, ഗ്രേസിജെയിംസ്, വിഷിന്‍ജോ, സ്വപ്‌നസജി, മഞ്ജുപിള്ള എന്നിവര്‍ ഈ സംഗമത്തിന്റെ വിജയകരമായ നടത്തിപ്പിനായുള്ള വിവിധ പ്രവര്‍ത്തനങ്ങള്‍ക്ക് നേതൃത്വം നല്‍കിവരുന്നു.
‘വനിതാസംഗമം’ സംഘടനയില്‍ ഒരു സുപ്രധാന നാഴികക്കല്ലായിരിക്കുമെന്ന് ഭാരവാഹികള്‍ അറിയിച്ചു. ഫോമായുടെ സാമൂഹിക പ്രതിബദ്ധതയുടെ ഭാഗമായി, വനിതാസംഗമത്തിലെ വരുമാനത്തിന്റെ ഒരുഭാഗം ഇന്ത്യയിലെ സ്ത്രീകളുടെ വിദ്യാഭ്യാസം, ആരോഗ്യം, സമൂഹ്യക്ഷേമം എന്നിവക്കും മറ്റുജീവകാരുണ്യ പ്രവര്‍ത്തനങ്ങള്‍ക്കുമായി വിനിയോഗിക്കുമെന്നും അവര്‍ കൂട്ടിച്ചേര്‍ത്തു. ഈസംഗമത്തിലേക്ക് ഏവരുടെയും സാന്നിധ്യം പ്രതീക്ഷിക്കുന്നതായി സംഘാടകര്‍ അഭിപ്രായപ്പെട്ടു.
പരിപാടിയുടെ സവിശേഷതകള്‍
- ബിസിനസ് രംഗത്തെ പ്രമുഖര്‍ പങ്കെടുക്കുന്ന പ്രഭാഷണങ്ങള്‍.
- നേതൃത്വം, സംരംഭകത്വം, ആരോഗ്യം, ക്ഷേമം, സാംസ്‌കാരികസ്വത്വം എന്നിവയെക്കുറിച്ചുള്ള പാനല്‍ ചര്‍ച്ചകള്‍
- സ്ത്രീകളുടെ ഉന്നമനത്തിനും നേതൃപാടവത്തിനും നെറ്റ്വര്‍ക്കിങ്ങിനും സഹായിക്കുന്ന ശില്പശാലകള്‍.
രജിസ്‌ട്രേഷന്‍ ഇതിനോടകം ആരംഭിച്ചു കഴിഞ്ഞു .www.fomaa.org/womenssummit2025 എന്നവെബ്‌സൈറ്റിലൂടെ സീറ്റ് ബുക്ക്‌ചെയ്യാം. 2025 ഓഗസ്റ്റ് 1 വരെ ബുക്ക്‌ചെയ്യുന്നവര്‍ക്ക് പ്രീബുക്കിംഗ് ഡിസ്‌കൗണ്ട് ലഭ്യമാണ്.
ഈ മഹാസംഗമം വെറുമൊരു ഒത്തുചേരലല്ല, സ്ത്രീശാക്തീകരണത്തിനുള്ള ഒരു സമ്മേളനമാണെന്ന് ഫോമാ പ്രസിഡന്റ് ബേബി മണക്കുന്നേല്‍ അഭിപ്രായപ്പെട്ടു. ഇത്തരത്തിലുള്ള ഒരു വനിതാസംഗമം സംഘടിപ്പിക്കുന്നതില്‍ അഭിമാനിക്കുന്നതായി ഫോമാസെക്രട്ടറി ബൈജു വര്‍ഗീസ്, ട്രഷറര്‍ സിജില്‍ പാലക്കലോടി, വൈസ് പ്രസിഡന്റ് ഷാലു പുന്നൂസ്, ജോയിന്റ് സെക്രട്ടറി പോള്‍ പി. ജോസ്, ജോയിന്റ് ട്രഷറര്‍ അനുപമ കൃഷ്ണന്‍ എന്നിവര്‍ അറിയിച്ചു.
